Kwaabelesya Kabotu Mali
Bantu banji bacikonzya kucesya penzi lyamali kwiinda mukutobela njiisyo zyamu Bbaibbele.
AMUBE ABUBAMBE BUBOTU
NJIISYO YAMU BBAIBBELE: “Makanze aabankutwe masimpe apa kuzwidilila, pele bantu boonse baingana kucita zintu ncobeni balacetaala.”—Tusimpi 21:5.
NCOCAAMBA: Mweelede kulemba mulongo wazintu nzyomuyanda kuula alimwi akubona masimpe kuti mwautobela. Aboobo amukkale ansi akuyeeya mbomweelede kwaabelesya mali. Amuyeeye kuti, tamukonzyi kuula zintu zyoonse nzyomuyanda. Aboobo, amwaabelesye kabotu mali aanu.
NCOMUKONZYA KUCITA:
Amuutobele mulongo uutondezya zintu nzyomweelede kuula. Amulembe mulongo wazintu zyoonse nzyomuyanda kuula, akuzibikka muzibeela-beela, mbuli zyakulya, zyakusama alimwi aŋanda. Mpoonya amulembe mali ngomuyanda kubelesya mucibeela cimwi acimwi. Ikuti naa mwabelesya mali manji mucibeela cimwi kwiinda ngomwalembede, amubelesye mali kuzwa mucibeela cimbi. Mucikozyanyo, ikuti naa mwabelesya mali manji kuula mungwimba wamumoota kwiinda ngomwalembede, amubelesye mali aacintu citayandiki kapati, mbuli mali aakubelesya kuya kukuvwakacca.
Amusoleke kutakweleta mali. Ikuti kacikonzyeka, amusoleke kutakweleta. Muciindi caboobo, amuyobole mali kutegwa muule cintu ncomuyanda. Ikuti naa mubelesya ka credit card (kakkaadi kakubelesya kuula naa kukweleta zintu), amusoleke kwaabbadela mali oonse kumamanino aamwezi umwi aumwi kutegwa mutakabbadeli cinyona mucila. Pele ikuti naa kamujisi cikwelete, amubikke bubambe bwakunoobbadela asyoonto-syoonto mpoonya akubutobela.
Buvwuntauzi bumwi bwakatondezya kuti ciindi bantu nobabelesya ka credit card, kanji-kanji cipa kuti babelesye mali manji. Aboobo kuti naa kamubelesya kakkaadi aaka, kamucita oobo cabupampu.
AMUBUCENJELELE BUBE BUTALI KABOTU
NJIISYO YAMU BBAIBBELE: “Mutolo talimi pe ciindi camupeyo, aboobo unoolombelela ciindi cakutebula, ciindi natajisi cili coonse.”—Tusimpi 20:4.
NCOCAAMBA: Butolo bulakonzya kupa kuti muntu acetaale. Aboobo, amube babelesi basungu alimwi amusoleke kwaabelesya kabotu mali kutegwa mukacikonzye kuyobola aamwi ngomuyoobelesya kumbele.
NCOMUKONZYA KUCITA:
Amubeleke canguzu. Kuti kamubeleka canguzu, basikumulemba mulimo banoomuyanda alimwi banooyanda kuti muzumanane kuba babelesi babo.
Amusyomeke. Mutanikubabbidi basikumulemba mulimo. Kutasyomeka inga kwanyonganya mpuwo yanu alimwi kulakonzya kupa kuti cikamukatazye kujana mulimo uumbi kumbele.
Amubutantamuke bulyato. Kuti ciindi coonse kamuyandisya kuba amali manji, mukuya kwaciindi muyoonyonganya buumi bwanu alimwi acilongwe ncomujisi abamwi. Amuyeeye kuti, mali tacili ncecintu ciyandika kapati mubuumi.
NJIISYO ZIMBI ZYAMU BBAIBBELE
Amubale Bbaibbele aa Intaneti mumyaambo minji a jw.org
MUTANOOSOWI CIINDI CANU ALIMWI AMALI KUCITA ZILENGWA ZIBYAABI.
“Mukolwi amulyato bayoocetaala, alimwi butolo bupa kusama mazazawu.”—TUSIMPI 23:21.
MUTANOOLIBILIKI KAPATI KUJATIKIZYA MALI.
“Amuleke kulibilika kujatikizya buumi bwanu kuti naa muyoolya nzi naa kuti muyoonywa nzi, noiba mibili yanu kuti muyoosama nzi.”—MATAYO 6:25.
AMUBUTANTAMUKE BUSYAACIVWULEMWANGU.
“Syaacivwulemwangu ulayandisya kuvwuba, pele tazyi kuti bucete bulamusikila.”—TUSIMPI 28:22.