MUNYIKA IIZWIDE MAPENZI

2 | Amwaakwabilile Mali Aanu Azintu Nzyomujisi

IKAAMBO NCOCIYANDIKA

Bantu banji balapenga kujana buyo zintu ziyandika zyabuzuba abuzuba. Cuusisya ncakuti, mapenzi aali munyika alakonzya kupa kuti ciindile buya kukatazya. Nkaambo nzi?

Ciindi nokwacita ntenda naa nokwabbuka bulwazi mucilawo, zintu mbuli cakulya alimwi amaanda inga zitalika kudula kapati.
Mapenzi aali boobu alakonzya kupa kuti bantu bamaninwe milimo naa kupa kuti kababeleka nokuba kuti bajana buyo mali masyoonto.
Ntenda zilicitikila zilakonzya kunyonganya naa kunyonyoona makwebo aabantu, maanda alimwi azintu zimwi. Alimwi eeci cilakonzya kupa kuti banji bacetaale.

Ncomweelede Kuzyiba

Ikuti kamwaabelesya kabotu mali aanu, inga camugwasya kuliyumya ciindi nokwacitika ntenda naa nokwabbuka bulwazi.
Kamuyeeya kuti mali ngomujana, ngomuyobwede alimwi azintu nzyomujisi zilakonzya kubula mulimo.
Kuli zintu zimwi izitakonzyi kuulwa amali, izintu mbuli lukkomano alimwi alukamantano lwamukwasyi.

Ncomukonzya Kucita Lino

Bbaibbele lyaamba kuti: “Twanoojisi cakulya azisani, tunookkutila azintu eezyi.”—1 Timoteyo 6:8.

Ikuti katuli bantu bakkutila, tunookkomene kuba azintu nzyotuyandika kapati ikutali nzyotuyanda. Eeci cilayandika kapati ciindi notujisi buyo mali masyoonto.

Kutegwa mukkutile azintu nzyomujisi, ambweni inga mwayandika kuubya-ubya buumi bwanu. Ikuti lyoonse kamuyanda kuula zintu nzyomutakonzyi, mulakonzya kupa buyo kuti penzi lyamali ndyomujisi liindile buya.

MBOMUKONZYA KULIYUMYA—Nzila Zigwasya

Ciindi nokwacitika ntenda naa nokwabbuka bulwazi bumwi, amwaakwabilile mali aanu azintu zyanu kwiinda mukutobela nzila eezyi

AMUCESYE ZINTU ZYAKUULA

Amucesye Zintu Zyakuula

Mutanoobelesyi mali kuula cintu cili coonse ccita kuti cintu eeco kaciyandika ncobeni. Amulibuzye kuti: ‘Sena inga ndapona kanditajisi moota? Sena inga cagwasya kulima kagaadeni?’
Kamutanaula cintu cimwi, amulibuzye kuti: ‘Sena ncobeni ndiyandika kuba acintu eeci? Sena inga ndakonzya kucuula?’
Amulembele kumfwulumende naa kumbunga imwi kulomba lugwasyo, ikuti naa kakuli bubambe buli boobo.

“Twakakkala ansi amukwasyi woonse akulanga-langa bukkale bwesu. Aboobo twakacesya mali aakubelesya mukulikondelezya. Alimwi twakatalika kujika zyakulya zitaduli kapati.”—Mbobakaamba ba Gift.

AMULEMBE BBAJETI

Kamulemba Bbajeti

Bbaibbele lyaamba kuti: “Makanze aabankutwe masimpe apa kuzwidilila, pele bantu boonse baingana kucita zintu ncobeni balacetaala.” (Tusimpi 21:5) Kuba abbajeti kulakonzya kumugwasya kutabelesya mali aayindilila ali yaayo ngomujisi.

Cakusaanguna, amulembe mali ngomulangila kujana kumamanino aamwezi.
Mpoonya amulembe mweelwe wamali aavwula kubelesyegwa amukwasyi mwezi amwezi kuzintu mbuli zyakulya, malaiti alimwi aleenti. Kucita boobu inga kwaugwasya mukwasyi kubona mbwaabelesyegwa mali alimwi akucinca ikuti kakuyandika kucita boobo.
Mwamana, amweezyanisye mali ngomujisi azintu ziyandika kuulwa. Ikuti mwabona kuti mali masyoonto, amuzicesye naa kuzigwisya zintu zitayandiki kapati.

“Mwezi amwezi, mebo abakaintu bangu tulalemba mali ngotujisi alimwi azintu iziyandika kuulwa. Mpoonya tulasola kubamba mali aakubelesya muzintu zyacibukilambuta alimwi azintu nzyotuzyi kuti ziyandika kuyoowulwa. Kucita boobu, kulatugwasya kutalibilika kapati nkaambo inga twazyibila limwi mbotuyakwaabelesya mali eesu.”—Mbobakaamba ba Carlos.

AMUZYEELEBE ZIKWELETE / KAMUYOBOLA MALI

Amuzyeelebe Zikwelete / Kamuyobola Mali

Amujane nzila yakucesya cikwelete ncomujisi. Ikuti kacikonzyeka, mutanoosoli kukweleta mali naa kubweza looni. Muciindi caboobo, amusole kubambilila mali kutegwa muule ceeco ncomuyanda.
Mwezi amwezi, amubikke ambali mali amwi aakubbadelela ziyandika naa aakubelesya nokwaba zintu zyacibukilambuta.

AMUBELEKE CANGUZU / AMUZUMANANE KUBELEKA MULIMO WANU

Bbaibbele lyaamba kuti: “Mulimo uuli woonse uubelekwa canguzu ujanya mpindu.”—Tusimpi 14:23.

Amubeleke Canguzu / Amuzumanane Kubeleka Mulimo Wanu

Amuzumanane kuulanga munzila yeelede mulimo wanu. Nokuba kuti tauli nguwe ngomwakali kuyanda, pele umupa kujana mali.
Amusolekesye kubeleka canguzu alimwi akuba bankutwe. Kucita boobu kulakonzya kumugwasya kuzumanana kubeleka mulimo wanu, alimwi buya ambweni inga camugwasya akuyoojana mulimo uumbi kumbele.

“Ndilazumina kubeleka mulimo uuli woonse wajanika nokuba kuti tanduuyandi naa kuti mali ngondivwola masyoonto. Lyoonse ndilasolekesya kubikkila maano kumulimo ngondibeleka alimwi akuubeleka kabotu mbuli kuti nguwangu.”—Mbobakaamba ba Dmitriy.

Ikuti naa muyandaula mulimo . . .

Amubweze ntaamu. Amutume ooko nkomuyeeyela kuti inga kabajisi mulimo ngomukonzya kubeleka, nokuba kuti tiibaambilizya kuti bayanda basikubeleka. Amubazyibye balongwe alimwi abanamukwasyi kuti muyandaula mulimo.
Amulibambile kucinca. Zimwi ziindi inga tiimwaujana mulimo ngomuyanda.