Ino Kulibilika Ninzi?

Kulibilika ncintu cicitika mumubili akaambo kabukkale buliko naa bwacitika. Bongo bulatalika kugwisya mahomoni manji akwaamwaya muzizo zyamubili zyoonse. Eeci cipa kuti moyo utalike kubalika kapati, bulowa bucince mbobweenda, kuyoya cakufwambaana alimwi amilambi ilayuma kapati. Kamutana akuzyiba cini cicitika, mubili wanu inga walibambila kale kubweza ntaamu. Cainda cintu icamupa kulibilika, mubili wanu ulatalika alimwi kubeleka kabotu.

KULIBILIKA KUBOTU AKUTALI KABOTU

Kulibilika ncintu cilicitikila calo icimugwasya kulibambila kulwana bukkale bukatazya naa buyoosya. Eeci citalikila kubongo. Kulibilika kubotu kumupa kubweza ntaamu cakufwambaana. Alimwi kulibilika kubotu kulakonzya kumugwasya kuzuzikizya mbaakani zyanu naa kucita kabotu, ambweni ciindi camisunko, nomubuzyigwa-buzyigwa kutegwa munjile mulimo naa ciindi nomucita cisobano cimwi.

Nokuba boobo, kulibilika kwaciindi cilamfwu naa kulibilika kapati kulakonzya kumuletela ntenda. Ikuti cakwiinduluka-induluka naa ciindi coonse kamulibilika kapati mulakonzya kuciswa, kuba apenzi lyakunyema naa kuusa, kuba apenzi lyakuluba, kutayeeya kabotu naa kutakkalikana mumizeezo. Mulakonzya kucinca kujatikizya mbomucita zintu alimwi ambomweendelezya bamwi. Alimwi penzi lyakulibilika kapati lilakonzya kupa muntu kuba azilengwa zitali kabotu mbuli kuciindizya kunywa bukoko, kubelesya misamu iikola, kufweba alimwi azilengwa zimbi zibyaabi. Mane buya kulakonzya kupa muntu kuba apenzi lyakutyompwa kapati, kukatala citaambiki naa kuyanda kulijaya.

Nokuba kuti kulibilika kapati takukonzyi kumujatikizya munzila iikozyenye muntu umwi aumwi, kulakonzya kusololela kumalwazi aasiyene-siyene. Alimwi kulakonzya kuzijatikizya zizo zinji zyamubili.