Nzyobasyoma bamwi

Ba Hindu

basyoma kuti kupenga kulaboola akaambo kazintu zibi nzyacita lino muntu naa nzyaakacita kaindi. Basyoma kuti kupenga kulamana ciindi muntu nasika muciimo ciitwa kuti moksha, naa kwaanguluka kumulongo wakuzyalululwa. Ulasika muciimo eeci kwiinda mukwiiya kutabikkila maano kuzintu zyamunyika.

Ba Mozilemu

basyoma kuti kupenga ncisubulo akaambo kakucita zibi alimwi akuti nkusunka lusyomo. Mweendelezi wambunga iitegwa Islamic Society of North America wazina lya Dr. Sayyid Syeed wakaamba kuti mapenzi nciyeekezyo cakuti “tweelede kuzumanana kumulumba Leza akaambo kazintu zyoonse nzyatucitila alimwi akuzyiba kuti tweelede kubagwasya aabo bayandika lugwasyo.”

Nzyobasyoma ba Juda

basyoma kuti kupenga kulaboola akaambo kazintu nzyacita muntu. Ba Juda bamwi baamba kuti kuyooba bubuke, mwalo bululami mobuyoocitwa kuli baabo ibakali kupenga kakunyina cibi ncobakacita. Aboobo bukombi bumwi bwaci Juda oomo mobasyoma nguzu zyamyuuya, bayiisya kuti kuli kuzyalululwa, kwalo ikupa muntu zyoolwe zyakubambulula kulubizya kwakwe.

Ba Bbuda

basyoma kuti kupenga kulacitika kwaziindi zinji nzyapona muntu, nkokuti kulaba kuzyalululwa ikuzumanana kusikila mane muntu waleka kucita zintu zibi. Aboobo kwiinda mukuba abusongo, kucita milimo mibotu alimwi akuba amizeezo iili kabotu, muntu ulakonzya kusika muciimo ciitwa kuti nirvana, nkokuti ciimo mwalo muntu mwatacipengi naaceya.

Ba Confucian

basyoma kuti bunji bwamapenzi alaboola akaambo “kazintu nzyobatakonzyi kucinca bantu alimwi akulubizya nkobacita,” kweelana abbuku litegwa A Dictionary of Comparative Religion. Bukombi bwabo bwaamba kuti nokuba kuti mapenzi alakonzya kucesyegwa kwiinda mukuba abukkale buli kabotu, pele bunji bwangayo alaboola akaambo “kazilenge zyamuuya zyalo izilaanguzu kapati kwiinda bantu. Aboobo mubukkale buli boobu, bantu beelede kwaazumina buyo mapenzi aayo aakabambilwa limwi kuti abacitikile.”

Zikombelo izisyoma tunsiyansiya

zisyoma kuti kupenga kulaboola akaambo kabulozi. Kweelana anjiisyo eeyi, zisyoma kuti balozi balakonzya kumupa coolwe muntu naa kumuletela mapenzi, alimwi mapenzi ngobaleta balozi aaba alakonzya kucesyegwa kwiinda mukucita zilengwa ziindene-indene. Aboobo ciindi muntu naaciswa akaambo kakuloogwa, zikombelo eezyi zisyoma kuti nzyacita muŋanga alimwi amisamu njapa zilakonzya kumuponya.

Banakristo

basyoma kuti kupenga kulaboola akaambo kacibi cabantu bakusaanguna bobilo, kweelana ambokwaambidwe mubbuku lyamu Bbaibbele lya Matalikilo. Nokuba boobo, zikombelo zinji zyayungizya mizeezo yanzizyo kunjiisyo eeyi. Mucikozyanyo, bana Katolika bamwi baamba kuti Leza ulakonzya kubelesya kupenga kwamuntu uumwi kutegwa acigwasye cikombelo naa ape kuti kupenga ooko kufwutule muntu umwi.