1. Sena Leza Nguweelede Kupegwa Mulandu Akaambo Kakupenga Kwesu?
Ikaambo Ncociyandika
Bantu banji tabayandi kumubelekela Leza nkaambo bayeeya kuti nguupa kuti katupenga.
Ncomweelede Kuyeeya
Munzila yacigaminina naa iitali yacigaminina, basololi bazikombelo banji bazumanana kuyiisya kuti Leza nguupa kuti katupenga. Mucikozyanyo, bamwi baamba kuti:
Ntenda zilicitikila ncisubulo kuzwa kuli Leza.
Bana balafwa akaambo kakuti Leza uciyanda bangelo bambi kujulu.
Leza ulazigwasyilizya nkondo calo cipa kuti kube kupenga kutaambiki.
Pele sena nzyobayiisya basololi bazikombelo kujatikizya Leza inga kazili zyakubeja? Ino mbuti kuti Leza katabakkomanini akaambo kakuti bayiisya zyakubeja kujatikizya nguwe, sena tweelede kubasyoma?
AMWIIYE ZINJI
Amweebelele kavidiyo kakuti Nkaambo Nzi Ncomweelede Kwiiya Bbaibbele? ikali a jw.org.
Ncolyaamba Bbaibbele
Leza talinguwe uupa kuti katupenga.
Kuti nocali boobo, nkokuti eeco inga caindana abube bwakwe mbotubala mu Bbaibbele. Mucikozyanyo:
“Nzila [zya Leza] zyoonse zililuleme. . . . Uliluleme alimwi uliluzi.”—DEUTERONOMO 32:4.
“Leza mwini-mwini takonzyi kucita bubi nokuceya, alimwi Singuzuzyoonse takonzyi kubisya pe!”—JOBU 34:10.
“Singuzuzyoonse tanyonganyi bululami.”—JOBU 34:12.
Leza tazikkomanini zikombelo ziyiisya zyakubeja kujatikizya nguwe.
Eeci cilabikkilizya azikombelo iziyiisya kuti Leza nguupa kuti katupenga alimwi azeezyo zigwasyilizya munkondo amumanyongwe.
“Nzyakubeja eezyo basinsimi nzyobasinsima muzina lyangu [nkokuti lya Leza]. Kunyina nendabatuma, nokuba kubalailila naa kubaambila pe. Nobasinsima kulindinywe, bamwaambila cilengaano cakubeja . . . alimwi alweeno lwamumyoyo yabo beni.”—JEREMIYA 14:14.
Jesu wakakusulaika kuupaupa ameso kwabukombi.
“Tabali boonse bandiita kuti ‘Mwami, Mwami,’ ibayoonjila mu Bwami bwakujulu, pele buyo ooyo uucita kuyanda kwa Taata uuli kujulu. Mubuzuba oobo, bantu banji bayoondaambila kuti: ‘Mwami, Mwami, sena tiitwakasinsima muzina lyako, kutanda madaimona muzina lyako akucita milimo mipati minji muzina lyako?’ Pele mebo ndiyoobaambila kuti: ‘Tiindakamuzyi pe! Amuzwe kulindime, nywebo nobasimucita zibi!’”—MATAYO 7:21-23.