Lusalululo Sena Mulilujisi?
Lusalululo luli mbuli kazunda. Kalabalwana aabo bakajisi alimwi bantu tabakonzyi kuzyiba kuti balaciswa akaambo kakazunda.
Bantu balakonzya kuba alusalululo kutali buyo kubantu bazwa kucisi cimbi, mubala, musyobo naa mwaambo uumbi pele alimwi akubantu bacikombelo cimbi, kubasankwa naa basimbi naa kubantu mbobaindene bukkale. Bamwi balabasalulula bantu akaambo kaciimo cabo, lwiiyo, bulema naa mbobalibonya. Nokuba boobo, balimvwa kuti banyina lusalululo.
Sena inga kamulujisi lusalululo? Bunji bwesu tulakonzya kulubona lusalululo muli bamwi. Pele cilakonzya kukatazya kubona lusalululo mulindiswe. Masimpe ngakuti toonse tulasalulula munzila zimwi. Syaabusongo mubukkale bwabantu David Williams wakaamba kuti, ciindi bantu nobayeeya munzila iitaluzi kujatikizya kakamu kabantu bamwi, mpoonya bajana muntu umwi uuzulilwa mukakamu aako, “balamweendelezya cakutalulama kakunyina kuzyiba.”
Mucikozyanyo, kucisi cimwi caku Europe kwalo nkobakkala ba Jovica, kuli kabunga kabantu kamwi nkobasulaika bantu banji. Ba Jovica bakaamba kuti: “Ndakali kuyeeya kuti kunyina muntu uuli kabotu mukabunga aaka. Pele tiindakazyi kuti ndakali kusalulula buya, nkaambo ndakali kuyeeya kuti ndakalaazyi masimpe kujatikizya kabunga kabantu aaba.”
Mfwulumende zinji zyabikka milawo kutegwa zilwane kusalana mubala alimwi nzila zimbi zyalusalululo. Nokuba boobo, lusalululo lwazumanana. Nkaambo nzi? Akaambo kakuti milawo eeyi ikasya buyo cintu ncacita muntu. Taikonzyi kweendelezya kuyeeya kwamuntu alimwi ambwalimvwa. Alimwi lusalululo lutalikila mumizeezo amumoyo. Aboobo, sena cilakonzyeka kuzunda lusalululo? Sena kuli musamu wakulwana lusalululo?
Zibalo zitobela zilalanga-langa njiisyo zyosanwe izyagwasya bantu banji kulwana lusalululo mumizeezo alimwi amumoyo