Sena Mulijatikizidwe Mukulangwa Ciimo?
MUUNZILA nzi mozikozyenye zintu ezi, ikulwana kwamisyobo, ikwamibala, ikusalaula, kuzandukana, alimwi ankondo zyakumana misyobo yabantu? Zyoonse ziletwaa kampenda kabuntu ikavwulide kapati—ikulangana ziimo!
Ino kulanga ciimo camuntu nkutyani? Encyclopedia imwi ikupandulula kuti “mmuzeezo uuyeeyegwa kakutakwe akutola ciindi nokuba kulanganya kuti kubonwe kabotu.” Mbotuli bantu batalondokede, tulikajisi nokaceya buti aka kampenda kakulanga ciimo camuntu. Ndiza mulakonzya kuyeeya zimwi ziindi nomwakakosola makani ngomutamaninide kwaaziba kumbazu zyoonse. Ibbaibbele lyalo ikampenda aka kakulanga ciimo lilakaindanya ambuli Jehova Leza mbwazibona zintu. Lyaamba kuti: “Jehova talangi mbuli mbwalanga muntu pe. Muntu ulabona busyu buyo, pele Jehova ulabona moyo.”—1 Samuele 16:7.
Kulanga Ciimo Kulakonzya Kucisa
Cakutadooneka muntu amuntu kuli ciindi naatakalangwa munzila yeelede kumuntu umbi. (Amweezyanye a Mukambausi 7:21, 22.) Toonse kuli batulanga ziimo. Pesi kuti yafwambaana kugwisyigwa, imizeezo yakulanga ciimo camuntu tiilangilwi kucisa muntu kapati naaba asyoonto. Ikwiivwundika mizeezo ili boobu nkokunga kwaleta macise. Kulakonzya kutucenga cakuti twaakusyoma cintu cakubeja. Mucikozyanyo, kabayungwa amizeezo yakulanga ciimo, bamwi bantu balasyoma ncobeni kuti muntu ulakonzya kuba mulyato, mutolo, uuziima, naa uulisumpula akaambo buyo kakuti ngwacikombelo cimwi, nuuba musyobo naa cisi.
Bunji bwaziindi ooku kulanga kutaluzi kupa kuti bantu beendelezegwe munzila iitaluleme, yakupenzya, niiba yakulwanwa kuli bamwi. Mamiliyoni aabantu ajaigwa ankondo yacijaye-jaye, munkondo zyakumana musyobo, izyaakati kamisyobo, alimwi anzila zimwi zyakwiindilizya kusalana.
Inyika yoonse mbwiizulwa, imfwulumende zyalikukulwana ikulangana ziimo kwiinda mukubikka milawo iisinizya kuti bantu tabanyangwi nguzu zyabo zyalwaanguluko, kuliiba alimwi akweelana. Kuti mwabala mulawo naa mulongo wamilawo yacisi cakwenu, cakutadooneka mulalangilwa kujana kapango kamulawo naa mulawo wakabambulula ikukwabilila nguzu zyabasicisi boonse, nobaba bamubala uli buti, babe baalumi naa bakaintu, naa bacikombelo nzi. Pele kulangana ziimo akusalaula kucivwulide kapati nyika yoonse mbwiizulwa.
Sena kuli bamulanga ciimo nywebo? Sena mulategwa muli balyato, batolo, mulaziima, naa mulalisumpula akaambo buyo kamubala wenu, musela wenu, kuba mwaalumi naa mukaintu, cisi cenu, naa nzyomusyoma mubukombi bwenu? Sena mulasinkililwa kukujana lwiiyo lubotu, mulimo mubotu, iŋanda, alimwi azintu ziyandika mubukkale akaambo kakulangwa ciimo? Kuti kakuli boobo, mbuti mbomunga mwaligwasya?
[Cifwanikiso icili apeeji 3]
Kuvwundika muuya wakulangana ciimo kuleta lusulano akati kamibala
[Kulumba]
Nina Berman/Sipa Press