Amujane balongwe Baindene-indene

Penzi

Kuti katubatantamuka bantu ibamukabunga kabantu mbotutayandi, tulakonzya kwiindila kuba alusalululo. Ikuti katujisi buyo balongwe ibali mbuli ndiswe, tulakonzya kulimvwa kuti mbotuyeeya, mbotulimvwa alimwi ambotucita zintu njenzila ilikke iiluzi.

Njiisyo Yamu Bbaibbele

“Amujalule myoyo yanu.”—2 BAKORINTO 6:13.

Ino eeci caamba nzi? “Moyo” ulakonzya kwaamba mbotulimvwa. Ikuti katuyanda buyo bantu ibali mbuli ndiswe, moyo wesu ulakonzya kujala. Kutegwa tweelebe penzi eeli, tweelede kulyaaba kuba abalongwe ibaindene andiswe.

Mbocigwasya Kuba Abalongwe Baindene Andiswe

Ciindi notubazyiba kabotu bamwi, tulatalika kumvwisya kaambo ncobacitila zintu munzila yiindene. Alimwi ciindi notuyumya cilongwe ambabo, tulaleka kubabona kuti tuliindene ambabo. Tulatalika kubabona kuti balayandika kapati alimwi akubeetela.

Amubone cikozyanyo caba Nazaré. Aciindi cimwi bakali kutondezya lusalululo kuli bamuzwakule. Bakapandulula icakabagwasya ciindi nobakaamba kuti: “Ndakali kujana ciindi cakuba ambabo alimwi akubeleka ambabo. Ndakajana bantu bakaindene kapati anzyobakali kwaambwa abantu. Ciindi noba mulongwe wabantu bazilengwa ziindene-indene, ulazyiba kuti tabakozyenye, aboobo ulatalika kubayanda alimwi akubona umwi aumwi wabo kuti ulayandika kapati.”

Ncomukonzya Kucita

Amujane nzila mbomukonzya kubandika abantu bazwa kucisi cimbi, bamubala uumbi naa bamwaambo uumbi. Mulakonzya

Kubalomba kuti bamwaambile makani masyoonto kujatikizya mbabo.
Kubatamba kucakulya.
Kuswiililisya ciindi nobaamba makani aajatikizya buumi bwabo, mpoonya akubabuzya kujatikizya cintu ncobayandisya.

Ikuti mwasola kumvwisya zintu zyakabacitikila mubuumi, mulakonzya kuzyiba kaambo ncobacitila zintu munzila iili boobo. Alimwi eeci cilakonzya kumupa kuti mubayande kapati balo alimwi aabaabo ibali mukabunga kabo.

Cikozyanyo Icakacitika Ncobeni: Ba Kandasamy aba Sookammah (Baku Canada)

“Twakakomenena ku South Africa ciindi nokwakali kusalululana musyobo. Bantu bamusyobo wiindene bakali kusinikizyigwa kukkala balikke, calo icakapa kuti kube lusalululo akati katubunga twabantu bamisyobo yiindene-indene. Swebo tatuli bamakuwa, aboobo tiitwakali kubayanda bamakuwa akaambo kakuti ibamwi bakali kutweendelezya mbuli kuti tunyina mpindu. Aciindi eeco, tiitwakazyi kuti twakali kusalulula buya. Muciindi caboobo, twakalimvwa kuti ndiswe twakali kusalululwa.

Kutegwa tucince mbotwakali kuzilanga zintu, twakasala kuba abalongwe ibazwa mubukkale bwiindene-indene. Ciindi notwakatalika kuyanzana abamakuwa, twakazyiba kuti kuli buyo zintu zisyoonto izyakali kutupa kwiindana ambabo. Toonse tulajana mapenzi aakozyenye.

Mane buya twakaba acoolwe acakukkala abanabukwetene bakuwa kuŋanda yesu kwaciindi cili mbocibede. Aboobo twakabazyiba kabotu. Tiilyakalampa twakatalika kubabona kuti mbalongwe alimwi twakabona kuti tatwiindene ambabo. Akaambo kaceeci, twakatalika kubabona munzila iili kabotu bamakuwa.”