Amutondezye Luyando

Penzi

Bube bwakusalulula butola ciindi kumana. Mucikozyanyo, kujaya kazunda kutola ciindi alimwi kuyandika kubeleka canguzu. Mbubwenya buyo, kutola ciindi kumana bube bwakusalulula alimwi kuyandika kubeleka canguzu. Ino ncinzi ncomweelede kucita kutegwa mugwisye lusalululo ndomujisi?

Njiisyo Yamu Bbaibbele

Zifwanikiso: 1. Mwaalumi waku Asia wajatilila cidoolo kutegwa ayinde mwaalumi muntu uusiya walo uujisi nkapu zyakkofi. 2. Mwaalumi nguwenya muntu uusiya waabila babelesinyina kkofi, kubikkilizya amukaintu waku India iwatondezyegwa kumatalikilo.

“Amulisamike luyando, nkaambo ncecaanzyo calukamantano cilondokede.”—BAKOLOSE 3:14.

Ino eeci caamba nzi? Kucitila bamwi zintu zibotu kupa bantu kuyanzana. Kuti kamutondezya luyando kubantu, ciyoopa kuti lusalululo ndomujisi luceye-ceye. Ikuti mwayiya kubayanda kapati bantu, eeci ciyoomugwasya kuleka kubasulaika.

Ncomukonzya Kucita

Amusole kuyeeya zintu zigaminide nzyomukonzya kucita ikutondezya luyando kubantu ibazwa mukabunga kabantu mbomutayandi. Zintu eezyi tazyeelede kuba zyaalubazu buya pe. Amusole kucita cintu comwe naa kwiinda waawo akati kazintu eezyi zitobela:

Ciindi nomucita zintu eezyi izitondezya luyando, muyootantamuka kuba amuuya walusalululo

Amutondezye bube bubotu kubantu bamukabunga aako kwiinda mukubajatila citendele kuti citajali naa kwiinda mukupa umwi wamukabunga aako cuuno ncomukkede muzyeendelo zyabanamaleya.
Amusole kutalisya mubandi ambabo, nokuba kuti tabauzyi kabotu mwaambo wanu.
Amubakkazikile moyo ciindi nobacita zintu munzila njomutamvwisyi.
Amubeetelele ciindi nobaamba mapenzi ngobajisi.

Cikozyanyo Icakacitika Ncobeni: Ba Nazaré (Baku Guinea-Bissau)

“Aciindi cimwi tiindakali kubayanda bamuzwakule. Ndakaambilidwe kuti bunji bwabamuzwakule bakabeja buya kumfwulumende kutegwa bapegwe mali naa bagwasyigwe, alimwi akuti bunji bwabo zyakali zigwebenga. Eeci cakapa kuti cindikatazye kapati kubayanda. Nokuba boobo, tiindakali kuyeeya kuti ndakali alusalululo nkaambo kayi bunji bwabantu mbobakali kubabona oobo bamuzwakule.

“Pele mukuya kwaciindi, ndakazyiba kuti mbondakali kulimvwa kujatikizya bamuzwakule lwakali lusalululo. Aboobo busongo bwamu Bbaibbele bwandigwasya kutalika kubayanda bamuzwakule. Lino tandibatantamuki pe. Pele, ndilabaanzya alimwi akubandika ambabo. Ndilasola kumuzyiba kabotu umwi aumwi wabo kumugama. Lino ndibalanga munzila yeelede alimwi ndilimvwa kwaanguluka kuba aambabo.”