Nzila Zikonzya Kutupa Kukkutila
Toonse, kufwumbwa naa tuli mucikwati naa pe, tuli bapati naa bana, tulayanda kukkomana alimwi akukkutila mubuumi. Awalo Mulengi wesu mbwayanda kuti katulimvwa oobo. Aboobo watupa lulayo lukonzya kutugwasya kapati.
Amubeleke Canguzu
“Abeleke mulimo canguzu, acite mulimo mubotu amaanzaakwe, kutegwa abe acintu cakupa yooyo uubulide.”—BAEFESO 4:28.
Mulengi wesu uyanda kuti katubona mulimo kuti ncintu cibotu. Nkaambo nzi? Akaambo kakuti muntu uubeleka canguzu ulijisi lukkomano nkaambo ulakonzya kulijanina nzyayandika walo alimwi amukwasyi wakwe. Mane buya, ambweni ulakonzya akugwasya umbi uuyandika lugwasyo. Basikumulemba mulimo inga kabamuyanda kapati abalo. Aboobo mubelesi musungu ulalangilwa kuzumanana amulimo wakwe. Cakweelela, Magwalo aamba bubotu buboola akaambo kakubeleka canguzu kuti “ncipego ca Leza.”—Mukambausi 3:13.
Kamusyomeka
“Tusyoma kuti tujisi manjezyeezya aasalala, mbwaanga tuyanda kuti katusyomeka muzintu zyoonse.”—BAHEBRAYO 13:18.
Ikuti katusyomeka, tunoolimvwa kuba ampindu, tunoojisi luumuno lwamumizeezo alimwi tunikoona kabotu. Kuyungizya waawo, bamwi banootusyoma alimwi akutulemeka. Bantu batasyomeki tabakonzyi kuba azintu eezyi zyoonse zibotu. Alimwi lyoonse manjezeezya aabo inga kaabakatazya alimwi akuyoowa kuti bumwi buzuba bantu inga baakuzyiba ncobacita.
Amwaabone Munzila Yeelede Mali
“Ibukkale bwanu butabi bwakuyandisya mali pe, pele amukkutile azintu nzyomujisi lino.”—BAHEBRAYO 13:5.
Tuyandika mali aakuula zyakulya alimwi azintu zimbi ziyandika. Nokuba boobo, ‘kuyandisya mali’ kuletela ntenda kapati. Kulakonzya kupa muntu kubelesya ciindi cakwe coonse alimwi anguzu zyakwe mukusola kuyanda kujana mali manji. Kuyandisya mali kuli boobu, kulakonzya kunyonganya cikwati cakwe, kwaalilwa kujana ciindi cakuba abana bakwe, mane buya akunyonganya buumi bwakwe. (1 Timoteyo 6:9, 10) Kuyungizya waawo, muntu uuyandisya mali ulakonzya kusunkwa kutasyomeka. Mwaalumi musongo wakaamba kuti: “Muntu uusyomeka uyoojana zileleko zinji, pele ooyo uufwamvwaanya kujana buvwubi takoozumanana kubula mulandu.”—Tusimpi 28:20.
Amusale Lwiiyo Lwiinda Kubota
“Kobambilila busongo bugwasya alimwi akuyeeya kabotu.”—TUSIMPI 3:21.
Lwiiyo lubotu lulakonzya kutugwasya kuba bantu basyomeka alimwi bali kabotu. Pele lwiiyo lubotu lwakumubili lulikke talukonzyi kutupa kuba azintu zyoonse nzyotuyandika alimwi alukkomano. Ikuti katuyanda kuzwidilila muzintu zyoonse nzyotucita, tuyandika lwiiyo luzwa kuli Leza. Magwalo aamba kuti muntu uuswiilila kuli Leza: “Zyoonse nzyacita ziyoozwidilila.”—Intembauzyo 1:1-3.