Mbuti Tekinoloji Mboikonzya Kujatikizya Cikwati Canu?
Ikuti naa yabelesyegwa kabotu, tekinoloji ilakonzya kuyumya cilongwe akati kamulumi amukaintu. Mucikozyanyo, ilakonzya kugwasya banabukwetene kunoobandika buzuba boonse.
Nokuba boobo, banabukwetene bamwi babelesya tekinoloji munzila iitali kabotu. Eeci cilakonzya kuleta mapenzi mbuli yaaya aatobela:
kunyonganya ciindi ncobeelede kuba antoomwe.
kutalika kubeleka aciindi nobatayandiki kucita boobo.
kutalika kusisana zintu naa kutasyomeka buya kuli umwi amweenzinyina.
NCOMWEELEDE KUZYIBA
CIINDI NOMULI ANGOMUKWETENE LIMWI
Mulumi umwi uutegwa Michael wakaamba kuti: “Zimwi ziindi inga notuli antoomwe abakaintu bangu, pele inga cili mbuli kuti tabawo pe. Nkaambo inga bajisi bubi kulanga afooni yabo, akwaamba kuti, ‘Lino nondajana ciindi cakulanga izili afooni yangu.’” Mulumi umwi uutegwa Jonathan wakaamba kuti mubukkale buli boobu, “banabukwetene balakonzya kuti kabakkede antoomwe, pele aumwi kasakene.”
NCOMWEELEDE KUYEEYA: Ino nzinji buti ziindi nomujanika kuti mubandika afooni naa kulembela muntu kagwalo kaafooni ciindi nomweelede kubandika angomukwetene limwi?—BAEFESO 5:33.
MULIMO
Bantu bamwi babeleka milimo iibapa kubeleka noliba leelyo nobali aŋanda. Pele nobaba baabo ibabeleka milimo iitayandiki kubeleka boobo, cilabakatazya kwiileka ciindi nobali aŋanda. Mulumi umwi uutegwa Lee wakaamba kuti: “Cilakatazya kutaingula fooni naa kutalanga kagwalo kali koonse kaboola kajatikizya mulimo ciindi nondili aabakaintu bangu. Mukaintu uutegwa Joy wakaamba kuti: “Ndibelekela aŋanda, aboobo cilakatazya kapati kuleka kubeleka. Ciyandika kubeleka canguzu kuzilanga munzila yeelede zintu.”
NCOMWEELEDE KUYEEYA: Sena mulaswiilila cakubikkila maano ciindi ngomukwetene limwi nabandika andinywe?—LUKA 8:18.
KUSYOMEKA
Bantu banji bakaamba kuti bakalizwangene kale angobakwetene limwi, akaambo kakuti ngobakwetene limwi tanaakakkomana akaambo kazintu nzyaakabikka awebbusaiti yakubandikila a Intaneti ooyo ngobakwetene limwi. Aboobo 10 pesenti yabantu bakabuzyigwa-buzyigwa, bakazumina kuti bakabikka zintu zimwi a Intaneti nzyobatakali kuyanda kuti ngobakwetene limwi azibone.
Bantu banji balazumina kuti kubelesya mawebbusaiti aakubandikila a Intaneti kulakonzya kubabikka muntenda zinji kapati aabo bakwete naa bakwetwe alimwi akubapa kucita bwaamu. Aboobo tacigambyi kuti bamaloya baamba kuti mawebbusaiti aakubandikila a Intaneti apa kuti zikwati zinji zimane.
NCOMWEELEDE KUYEEYA: Sena mulamusisa ngomukwetene limwi mibandi njomubandika amuntu ngomwiindene limwi zizo?—TUSIMPI 4:23.
NCOMUKONZYA KUCITA
AMUBIKKE ZINTU ZIYANDIKA KAPATI MUBUSENA BWAKUSAANGUNA
Muntu kuti waleka kulya takonzyi kuzumanana kuba abuumi buli kabotu. Mbubwenya buyo, ikuti muntu waleka kuba aciindi cakuyanzana angobakwetene limwi ulakonzya kuba amapenzi mucikwati cakwe.—Baefeso 5:28, 29.
NJIISYO YAMU BBAIBBELE: ‘Amusinizye zintu ziyandika kapati.’—BAFILIPI 1:10.
Amubandike angomukwetene limwi kujatikizya nzila nzyomuyanda kusola kubelesya akati kazeezyi izili ansi aawa, naa kulilembela mizeezo yanu iikonzya kumugwasya kutegwa tekinoloji itanyonganyi cikwati canu.
Kulida antoomwe cakulya ambweni ciindi comwe abuzuba
Kubikka ciindi cakutabelesya tuncini
Kubikka buzuba bwakucita cintu cimwi caalubazu antoomwe
Kuzima tuncini twesu masiku akutubikka kumbi kutali nkotoona
Kubikka maminiti aali 15 buzuba abuzuba aakubandika antoomwe angomukwetene limwi kakunyina kunyonganizyigwa afooni naa tuncini tumbi buyo
Kuleka kubelesya intaneti aciindi cigaminide ncomwasala buzuba abuzuba