Nkaambo nzi Bantu Ncobatacilemekani Mumikwasyi?

NKAAMBO NZI BANAMUKWASYI NCOBAYANDIKA KULEMEKANA?

• Bbuku litegwa The Seven Principles for Making Marriage Work lyaamba kuti, ikuti banabukwetene kabalemekana, balatalika kumvwana kapati “kutali buyo muzintu zipati pele amubukkale boonse bwabuzuba-abuzuba.”

• Buvwuntauzi butondezya kuti bana ibakaiya kulemeka bamwi balalikwaya, balaba acilongwe cibotu abazyali babo alimwi balacesya-cesya mapenzi aamumizeezo.

MBUTI MBOMUKONZYA KUTONDEZYA KUTI MULABALEMEKA BAMWI MUMUKWASYI WANU?

Amupange cakusala antoomwe abanamukwasyi. Cakusaanguna, nobazyali amube masimpe kuti boonse balamvwisya ncocaamba “kulemekana.” Cabili, amulembe nzyobeelede kunoocita banamukwasyi alimwi anzyobateelede kunoocita. Catatu, amucibandike amukwasyi eeco ncomwasala kutegwa aumwi azyibe mbwayelede kutondezya bulemu.

Amube cikozyanyo cibotu. Amuyeeye mbomubeendelezya banamukwasyi. Sena mubikkila kapati maano kujatikizya kulezya kwabo, mulabafwubaazya akaambo kamizeezo yabo, mutulanga buyo twaambo ntobaamba naa mulabanjila mukanwa ciindi nobaambaula?

Nzila iigwasya: Kuti kamubalemeka bakaintu banu alimwi abana banu, abalo ciyoobaubila kumulemeka.

Amutondezye bulemu nokuba kuti tamuzuminani mutwaambo. Ciindi nomwaamba mbomulimvwa mutanikwaambi majwi aatyompwa mbuli aakuti “nywebo lyoonse mbomucita oobu” naa kuti “kunyina nomuyoocita boobu.” Majwi aali boobu alakonzya kumunyemya munamukwasyi alimwi akupa kuti mazwanga aindile buya.

MBUTI BAKAMBONI BA JEHOVA MBOBAKULWAIZYA KULEMEKANA MUMIKWASYI?

Bakamboni ba Jehova bakulwaizya banamukwasyi kulemekana. Bunji bwaziindi makani aaya alabikkilizyigwa muzyakumwaya zyesu mbuli mumabbuku, muzibalo, mabroshuwa alimwi amumavidiyo kakunyina kubbadela.

KULI BANABUKWETENE: Zibalo zyakuti Lugwasyo Kumukwasyi zilakonzya kubagwasya banabukwetene . . .

• kuba muswiilizi mubotu

• kuleka cilengwa cakutaambauzyanya

• kuleka kukazyanya

(Amubone cibeela cakuti “Lugwasyo Kumukwasyi” a jw.org)

KUBAZYALI: Zibalo zyakuti Lugwasyo Kumukwasyi zilakonzya kubagwasya bazyali kuyiisya bana babo . . .

• kumvwida

• kubeleka milimo yaaŋanda

• kwaamba kuti “ndalomba” alimwi akuti “ndalumba”

(Amubone cibalo cakuti “Kukomezya Bana” alimwi acakuti “Kukomezya Bakubusi” a jw.org)

Amubone cibalo cakuti, “Bube Buli 6 Mbobeelede Kwiiya Bana,” mu Sinsimuka! No. 2, 2019 alimwi acakuti “Nzila Izili 12 Zikonzya Kupa Kuti Mukwasyi Uzwidilile” mu Sinsimuka! No. 2, 2018, peeji 8-11 a jw.org)

KUBAKUBUSI: Cibeela cakuti Bakubusi a jw.org cilijisi zibalo, mavidiyo alimwi amapepa aakulembela izikonzya kugwasya bakubusi . . .

• kumvwana abazyali babo alimwi abanabokwabo

• kubandika cabulemu abazyali babo kujatikizya milawo njobababikkila

• kusyomwa abazyali

(Amubone cibeela cakuti “Bakubusi” a jw.org)

Kubelesya webbusaiti ya jw.org takubbadelesyegwi pe. Kunyina mali aayandika nokuba kulilembya buya naa makani aajatikizya ndinywe ngomuyoolombwa kutegwa muzumizyigwe kwiibelesya.