MAKANI 58
Davida a-Golyati
IBA Filisiti baboola alimwi ikulwana bana Isilayeli. Ibapati ba Davida basankwa botatwe bali munkamu yabasikalumamba ba Saulu. Aboobo buzuba bumwi Jese waambila Davida kuti: ‘Bweza maila amapoka azinkwa utolele banyoko. Ukabuzye naa bapona buti.’
Davida asike kukkala basikalumamba, wabalikila nkobaimvwi kutegwa abone ibanyina. Golyati bbumbwabuuka mu Filisiti wazwa anze kufwubaazya bana Isilayeli. Wali kucita oobu abuzuba mafwumofwumo akumangolezya kwamazuba aali 40. Woongolola wati: ‘Amusale umwi musankwa akati kanu andilwane. Ikuti azunde akundijaya, tulaba bazike banu. Pele kuti ndimuzunde akumujaya, mulaba bazike besu. Ndakomba kaka amusale umwi tulwane ma!’
Davida wabuzya bamwi basikalumamba kuti: ‘Ino ncinzi ncalaapegwe muntu uulaajaye mu Filisiti ooyu akumana masampu aaya kubana Isilayeli?’
Sikalumamba wati: ‘Imuntu ooyo Saulu ulamupa lubono lunji. Alimwi ulamupa mwana wakwe musimbi kuti akwate.’
Pele boonse bana Isilayeli bamuyoowa Golyati nkaambo ndidombwana. Mulamfwu uutandila kumamita aali otatwe, alimwi ulijisi sikalumamba uumunyamuda ntobo.
Basikalumamba bamwi baunka kwaambila Mwami Saulu kuti Davida uliyandide kumulwana Golyati. Pele Saulu waambila Davida kuti: ‘Tokonzyi kumulwana ooyu mu Filisiti. Iwe uli kasankwa buyo kacizwa mukupa ampemo, walo wali sinkondo lyoonse mubuumi bwakwe.’ Davida waingula kuti: ‘Ndakajaya munyama mukali alimwi asyuumbwa ibakaluma mbelele zya Bataata. Alimwi ooyu mu Filisiti ulaba mbuli banyama aabo. Jehova ulandigwasya.’ Aboobo Saulu wati: ‘Koya, Jehova abe andiwe.’
Davida waunka kukalonga eelyo wabweza mabwe osanwe aabulungenyi, akwaabikka mucibbeeke cakwe. Amane wabweza kkwisyo waunka kukulwana bbumbwabuuka. Golyati amubone Davida watyompwa wati: Nkakantu aaka kaboola kundilwana! Uyeeya kuti cilaba cintu cuuba-uba kujaya Davida.
Golyati wati: ‘Boola kuno kana! Mubili wako ndilaupa bayuni abanyama kuti baulye.’ Pele Davida wati: ‘Ulaboola kuli ndime amupeni, asumo amuumba, pele mebo ndilaboola kuli nduwe muzina lya Jehova. Obuno buzuba Jehova ulakwaaba mumaanza aangu, aboobo ndilakujaya.’
Aciindi aawa Davida wabalika kuli Golyati. Wabweza bbwe mucibbeeke cakwe, walibikka mukkwisyo akulifwusa canguzu. Ndeelyo lyeenda kuzyi kuti kumutwe nko, Golyati walundana ansi wafwa! Iba Filisiti babone kuti ngobasyoma waalabana ansi, boonse balusikka. Bana Isilayeli babatandila eelyo bazunda nkondo.