Davida Tanaakayoowa

Ino inga ucita buti kuti wayoowa?— Ambweni inga uunka kuli banyoko naa bauso kutegwa bakugwasye. Pele nkwali aumwi uukonzya kukugwasya. Ulaanguzu kwiinda muntu uuli woonse. Sena ulimuzyi?— Inzya, ngu Jehova Leza. Atubandike kujatikizya mwaalumi umwi waambidwe mu Bbaibbele wiitwa kuti Davida. Wakalizyi kuti Jehova lyoonse unoomugwasya, aboobo tanaakali kuyoowa pe.

Kuzwa ciindi Davida naakali muvwanda, bazyali bakwe bakamuyiisya kuyanda Jehova. Eeci cakamugwasya Davida kutayoowa nokuba kuti wakacitikilwa zintu ziyoosya. Wakalizyi kuti Jehova wakali mweenzinyina alimwi akuti inga wamugwasya. Bumwi buzuba ciindi Davida naakali kweembela mbelele, kwakaboola syuumbwa mupati akuluma mbelele yomwe. Sena ulizyi Davida ncaakacita? Wakamutandaanya syuumbwa akumujaya kwiinda mukubelesya maanza buyo! Alimwi ciindi cibbeya nocakali kuyanda kuluma mbelele, Davida wakacijaya acalo! Ino uyeeya kuti nguni wakagwasya Davida?— Ngu Jehova.

Kuli acimwi ciindi Davida naakatondezya kuti tayoowi. Bana Israyeli bakali kulwana bantu bategwa ba Filisti. Umwi wabasikalumamba bana Filisti wakali mwaalumi mulamfwu kapati, mubbabbani! Zina lyakwe wakali Goliati. Mubbabbani ooyu wakali kubafwubaazya basikalumamba bana Israyeli alimwi a Jehova. Goliati wakali kwaambila basikalumamba bana Israyeli kuti bamulwane. Pele boonse bana Israyeli bakali kuyoowa kumulwana. Davida naakaamvwa makani aaya, wakaambila Goliati kuti: ‘Mebo ndilakulwana! Jehova ulandigwasya eelyo ndilazunda!’ Sena uyeeya kuti Davida wakali muntu uutayoowi?— Inzya wakali muntu uutayoowi. Sena ulayanda kuzyiba cakatobela?

Davida wakabweza nkwisyo alimwi amabwe osanwe aabulungene, mpoonya wakaunka kuyoolwana mubbabbani. Goliati naakabona mbwaakali mwana Davida, wakatalika kumufwubaazya! Pele Davida wakamwaambila kuti: ‘Waboola kulindime apanga, pele mebo ndiboola kulinduwe muzina lya Jehova!’ Mpoonya wakabikka bbwe munkwisyo yakwe, wabalikila kuli Goliati, akulifwusa kulinguwe. Ibbwe lyakamuuma ankumo Goliati! Mubbabbani wakawa ansi, kafwide kale! Ba Filisti bakayoowa cakuti boonse bakaccija. Ino mbuti Davida iwakacili mwana mbwaakacikonzya kuzunda mubbabbani?— Jehova wakamugwasya, alimwi Jehova wakajisi nguzu kapati kwiinda mubbabbani!

Ncinzi ncokonzya kwiiya kumakani aa Davida?— Jehova ulaanguzu kwiinda muntu uuli woonse. Alimwi mweenzinyoko. Aboobo kuti wayoowa, koyeeya kuti Jehova ulakonzya kukugwasya kuba muntu uutayoowi!