MAKANI 93
Jesu Wasanina Bantu Banji
KWACITIKA cintu cimwi cibi. Ino-ino aawa Johane Mubbapatizi wajaigwa. Helodiya mukaintu wamwami tanaali kumuyanda pe. Wakapa kuti mwami aunyongole mutwe wa Johane.
Jesu amvwe makani aaya wausa kapati! Waunka alikke waakuluumuzya kubusena kutako cisabila. Pele bantu bamuccilila. Jesu abone nkamu yabantu, weetezyegwa. Aboobo wabaambila makani aa Bwami bwa Leza, alimwi wabaponya balwazi mbobaleta.
Ngeena mangolezya aayo basikwiiya bakwe baboola kuli nguwe, bati: ‘Kwasiya lino, alimwi muno muusyokwe. Kobaambila bantu baunke kutegwa bakaule zyakulya muminzi iili aafwiifwi.’
Jesu wavwiila wati: ‘Tabeelede kuunka pe. Amubape cakulya.’ Jesu wamulanga Filipo, kumane wabuzya kuti: ‘Nkuli nkotunga twaula cakulya cinji cikonzya kukkwana bantu boonse aaba?’
Filipo waingula kuti: ‘Cilakonzya kutola mali manji kuula cakulya cinji cakuti muntu aumwi akonzye kulya nokaceya.’ Andulu wati: ‘Ooyu mwana musankwa uunyamude cakulya cesu, ulijisi zinkwa zyosanwe answi zyobilo. Pele eeci tacikonzyi kukkwana bantu boonse.’
Jesu wati: ‘Amwaambile bantu bakkale abwizu.’ Amane Jesu wapaila akulumba Leza akaambo kacakulya, eelyo watalika kucikomoona. Kumane basikwiiya babapa cinkwa answi bantu boonse. Kuli basankwa basika ku 5,000 azyuulu azimbi zyabamakaintu abana. Boonse balya akukkuta. Basikwiiya nibabwezyelela zyalekwa, kwavwula mitaanga iili 12!
Kumane Jesu waambila basikwiiya bakwe kukkwela bwato kuti bazabuke Lwizi lwa Galilaya. Masiku kwabbubbula muwo uuyoosya, alimwi mayuwe abutonta bwato cakuti bwiile kukunauka. Basikwiiya bayoowa kapati! Eelyo akati amasiku babona muntu weenda atala lyameenda kazya kuli mbabo. Balila cakuyoowa, nkaambo tabacizyi ncobabona ikuti naa ncinzi.
Jesu wati: ‘Mutayoowi, ndime!’ Pele tabasyomi kuti ngonguyo. Aboobo Pita wati: ‘Ikuti naa Mwami nduwe ncobeni, ndiite ndiboole ooko kandeenda atala lyameenda.’ Jesu waingula wati: ‘Boola!’ Aboobo Pita waseluka mubwato watalika kweenda atala lyameenda. Kumane Pita watalika kuyoowa eelyo watalika kubbila, pele Jesu wamufwutula.
Kuzwa waawo, Jesu alimwi wasanina maunda-maunda aabantu. Aciindi aawa wabasanina azinkwa zili ciloba atuswi tusyoonto. Alimwi kwaba cakulya cikkwana bantu boonse. Hena tacikkomanisyi Jesu mbwabalanganya bantu? Aakulela kali mwami wa Leza, taku zintu nzyotuya kubula.
Matayo 14:1-32; 15:29-38; Johane 6:1-21.