Kusanina Zyuulu Zyabantu Kubelesya Zinkwa Answi Zisyoonto

Baapostolo ibali 12 baukkomanina mulimo wakukambauka ngobakacita mulweendo lwamu Galilaya moonse, eelyo bamwaambila Jesu “zintu zyoonse nzibakacita anzibakayiisya.” Tacigambyi kuti balikatede. Nokuba boobo, tabajisi aciindi cakuti balye nkaambo mbanji bantu ibaboola akuunka. Aboobo Jesu wabaambila kuti: “Atweende tukkalile kubusena bunyina bantu mulyookezye aniini.”—Marko 6:30, 31.

Batanta bwato, ambweni munsi-munsi aku Kapernauma, akugama kubusena kutasikwi-sikwi bantu ibuli kujwe kwa Mulonga wa Jordano kwiindilila ku Betesaida. Nokuba boobo bantu banji bababona nobanyamuka alimwi bambi baamvwa makani aaya. Boonse antoomwe balunduka mumbali aankomwe yalwizi, eelyo bwato nobwasika bwabajana bantu mbaaba balalindila.

Naazwa mubwato, Jesu wabona nkamu yabantu eelyo wabafwida luzyalo nkaambo bali mbuli mbelele zitakwe mweembezi. Aboobo watalika “kubayiisya zintu zinji” kujatikizya Bwami. (Marko 6:34) Kuyungizya waawo, wabaponya aabo ‘ibayandika kuponesyegwa.’ (Luka 9:11) Mbociyaabuya ciindi, basikwiiya bamwaambila kuti: “Okuno nkuusyokwe alimwi ciindi caunka kale; kobaambila bantu kuti bamwaikizyanye, kutegwa baunke muminzi bakalyuulile zyakulya.”—Matayo 14:15.

Jesu wabaambila kuti: “Tabeelede kuunka pe; amubape zyakulya.” (Matayo 14:16) Nokuba kuti Jesu ulizyi ncayanda kucita, wasunka Filipo kwiinda mukumubuzya kuti: “Nkuukuli nkotuya kuula zinkwa zyakuti bantu aaba balye?” Filipo nguweelede kubuzyigwa nkaambo uzwa mumunzi wa Betesaida uuli munsi-munsi. Nokuba boobo, kuula zinkwa tacikonzyi kugwasya. Kuli baalumi ibabalilwa ku 5,000. Alimwi buya bantu boonse baliko balakonzya kwiinda ku 10,000, kuti bamakaintu abana babalilizyigwa! Filipo wavwiila kuti: “Zinkwa zyuulwa madinari aali 200 [dinari lyomwe mali ngabelekela muntu mubuzuba bomwe] tazikonzyi kukkwana, nokuba kuti muntu umwi aumwi wakomwedwa buyo kasyoonto.”—Johane 6:5-7.

Ambweni kutondezya mbocitakonzyeki kusanina bantu banji boobu, Andreya waamba kuti: “Ngooyu musankwa uujisi zinkwa zyabbaale zyosanwe atuswi tobilo. Pele ino eezyi inga zyacita nzi kubantu banji boobu?”—Johane 6:9.

Mbwaanga eeci nciindi cacilimo, alimwi kuceede buyo ciindi cisyoonto kuti kube Pobwe Lyakwiindilila lyamu 32 C.E., kuli mweemvwe mumalundu. Jesu waambila basikwiiya bakwe kuti baambile bantu kuti bakkale abwizu mutubunga twabantu bali 50 abali 100. Wabweza zinkwa zyosanwe atuswi tobilo mpoonya walumba Leza. Kumane wakomoona zinkwa akwaabanya nswi. Jesu wapa basikwiiya bakwe kuti bape bantu. Cigambya ncakuti, bantu boonse balya akukkuta!

Mpoonya Jesu waambila basikwiiya bakwe kuti: “Amubwezelele bufwefwelenga boonse bwasyaala, kutegwa kutabi cinyonyooka.” (Johane 6:12) Nobacita oobo, bazuzya zisuwo zili 12 zyabufwefwelenga!