Mbomunga Mwaingula Majwi Aanga Atyompya Mibandi

Makani Aamatalikilo: Ibulangizi bwabuumi bwabantu bwiimvwilidi aciimo ncobajisi kuli Jehova Leza alimwi a Bwami bwakwe ibuli mumaanza aa Kristo Jesu. Mulumbe wa Bwami bwa Leza ulakkomanisya alimwi ngomulumbe waamba bulangizi ibusyomeka bulikke. Mulumbe uusandula maumi aabantu. Tuyanda kuti boonse bantu baumvwe. Tulizi kuti mbasyoonto bantu banga bayanda kuuteelela, pesi tulizi kuti bantu beelede kuumvwa kutegwa balisalile kwiinda muluzibo. Pele tabali boonse bantu banga bayanda kuswiilila aboobo tatweelede kusola kubasinikizya. Nokuba boobo kuti twabelesya bupampu, majwi aanga atyompya mibandi inga twaabelesya kujulila mubandi wesu. Nzeezi zitondezyo izyambuli Bakamboni basimide mbobasola kuyandaula baabo beelela. (Mt. 10:11) Amuciteelele caambwa akucaamba mumajwi aanu nobeni alimwi mucaambe munzila itondezya kuti mulamubikkila maanu cini-cini muntu ngomubandika limwi. Mwanoocita boobo, mulakonzya kubaa lusyomo lwakuti aabo balaa myoyo iiyanda bululami balateelela alimwi akubweza ntaamu kweendelana ancacita Jehova nabasololela kuzipo zyakwe zyabuumi.—Joh. 6:44; Inc. 16:14.

‘TANDIYANDI’

● ‘Nkooko ndibuzye, Sena mwaamba kuti tamuyandi makani aa Bbaibbele, naa ncikombelo ncomutayandi? Ndabuzya boobo nkaambo twaswaangana abantu banji, ibakali kukomba cimwi ciindi pele lino ibatacuunki kucikombelo akaambo kakuupaupa ameso kunji ikuli muzikombelo (naa ibayeeya kuti mulimo wazikombelo ngwakupanga buyo mali; naa tabakkomani azikombelo mbozilinjizya mutwaambo twacisi; inga mwayungizya aambi). Alyalo Bbaibbele talizumizyi micito eyi alimwi lilatwaambila nzila ilikke iikonzya kutugwasya kuba alusyomo lwakuti zintu ziyakululama kumbele aamazuba.’

● ‘Kuti kamwaamba kuti tamuyandi cikombelo cimbi kalalimvwisya kaambo ako. Pesi ndasyoma andinywe mulalibilika acilangilwa kucitika kumbele aamazuba kuti twalanga cacitika kubuumi bwesu akaambo kankondo (naa mbotunga twakwabilila bana besu kupenzi lyakubelesya zikola (mbuli mabanje amisamu imwi); naa icinga cacitwa kumana penzi lyamilandu kutegwa katutalibiliki kweenda masiku mumigwagwa; inga mwayungizya azimwi). Sena kuli ncomubwene cinga camana mapenzi aya?’

● ‘Sena nkaambo kakuti mujisi kale cikombelo cimbi? . . . Tumvwe, Sena mwayeeya ciyakusika ciindi bantu boonse nobayakukomba cikombelo comwe? . . . Mwayeeya ncinzi cinga cilakasya? . . . Sena kuli ncomulangila inga capa kuti eco cikonzeke?’

● ‘Alamvwika makani aayo. Andime mbundakali kulimvwa myaka misyoonto yainda. Pele kuli ncondakabala mu Bbaibbele icakandigwasya kulanga zintu munzila imbi. (Amumwaambile oyo muntu cintu eco.)’

● ‘Sena mulayanda kuti ndimutondezye kwiinda mu Bbaibbele mbomunga mwababona bayandwa banu ibakafwa alimwi (naa, nimpindu nzi ini-ini yabuumi; naa, mbocinga catugwasya kukamantanya mikwasyi yesu lyoonse; inga mwayungizya azimwi)?’

● ‘Kuti naa mwaamba kuti tamuyandi kuula, mutapengi pe. Tandili mukubelekela mali pe. Pele, sena inga mwayanda kugwasigwa kutegwa mukakkale munyika yaparadaiso, iitakwe malwazi alimwi abubi, iili abasimukobonyoko ibamuyanda cini-cini nywebo?’

● ‘Sena obo mbomwiingula lyoonse ciindi Bakamboni ba Jehova nobamuswaya? . . . Sena kuli nomwakalibuzyide kuti ino nkaambo nzi aaba bantu coonse ciindi ncobaswaila beenzinyina, naa kuti bajisi makani nzi? . . . Ikutamusowela ciindi, ndaboola kumubona nkaambo kuli cimwi cintu ncendizi calo ncomweelede kuziba andinywe. Sena inga tamukonzyi kuswiilila sunu buyo?’

‘TANDIYANDI ZYAKUKOMBA MEBO’

● ‘Ndilizi ncomuyeeya boobo. Ikwaamba masimpe, izikombelo tazili mukupa kuti bantu baliibe munyika, embo na oobo? . . . Pele sena mulasyoma muli Leza?’

● ‘Mbanji bantu bayeeya mbomuyeeya. Zikombelo teezyagwasya cini-cini. Aako nkekaambo ncotuswaila—nkaambo zikombelo teezyabaambila bantu imasimpe aa Leza alimwi amakanze aakwe mabotu aazintu nzyayakucitila bantu.’

● ‘Pele ndasyoma mulayanda kuziba ciyakucitika kulindinywe kumbele aamazuba. Sena mulizi kuti Ibbaibbele lyakazisinsima ezi nzyoona zintu izicitika munyika sunu? . . . Alimwi lilaamba iciyakucitika kumamanino.’

● ‘Sena lyoonse mbomwalikulimvwa obo? . . . Ino muyeeya buti azintu ziyakucitika kumbele aamazuba?’

‘TANDIBAYANDI BAKAMBONI BA JEHOVA’

● ‘Ibanji mbobatwaambila obo. Sena kuli nomwakalibuzyide kuti ino nkaambo nzi bantu bamwi mbuli ndime ncobalisungula kuswaya nokuba kuti tulizi biya kuti bunji bwabalaa maanda tabalangilwi kututambula kabotu? (Amupandulule caambwa ku Ezekiele 9:1-11, akwaamba kuti bantu boonse balimukubikkwa caando cakufwutulwa naa cakujaigwa a Leza ciindi naayakuboola mapenzi mapati, kweelana ambobautambula mulumbe wa Bwami.)’

● ‘Ndakonzya kwaateelela makani ayo nkaambo mbondakali kulimvwa andime obo. Pele mbwaanga bakati kunsole nkuucisi, ndakayeeya kuti ndimuswiilile umwi wabo. Elyo ndakajana kuti teendakaambilidwe masimpe kujatikizya bantu aaba. (Amwaambe cimwi cintu ncotutamikizigwa kanjikanji mpoona mupandulule ncotusyoma.)’

● ‘Andime mbundakamwaambila obo Kamboni umwi iwakasika amulyango wangu myaka misyoonto buyo yainda. Pele katana unka ndakamubuzya mubuzyo ngundatakali kulangila kuti ulawiingula. Sena mulayanda kuuziba mubuzyo oyo? . . . (Mucikozyanyo: Ino Kaini wakamujana kuli mukaintu ngwaakakwata?)’ (Oyu mubuzyo inga wabelesegwa abaabo ibakaubuzya ncobeni kuli bamwi.)

● ‘Ikuti kamuli bantu bakomba inga ndaateelela makani ayo. Ndasyoma cikombelo canu mulaciyanda kapati. Pele ndiyeeya kuti mulazumina kuti inywebo andime toonse tulayanda kubandika (amwaambe kaambo keelede).’

● ‘Nkokuti mulijisi cikombelo ncomukomba. Ndalomba ndibuzye naa mukomba cikombelo nzi? . . . Tulayanda kubandika abantu bacikombelo cenu. Muyeeya buti a (amwaambe mutwe wanu wamakani)?’

● ‘Inzya ndateelela. Pele ncotuswayila nkaambo kakuti tulimukwasyi uuyanda kubona kuti bantu bakkala kabotu antoomwe. Cilatucima kumvwa makani abuzuba masiku aabantu balwana alimwi abapenga. Ndasyoma andinywe mbubonya. . . . Pele ino ncinzi cinga cagwasya? . . . Iswebo twajana cikulwaizyo muzintu zyakasyomezegwa a Bbaibbele.’

● ‘Ndalumba kundaambila mbomuyeeya. Ndalomba mundaambile kaambo ncomutatuyandili? Sena nkaambo kamakani ngotumwaambila aamu Bbaibbele, naa nkumuswaya nkotumuswaya nkomutayandi?’

‘NDILAA NKONDIKOMBA’

● ‘Ndalomba mundaambile, Sena cikombelo ncomukomba cilayiisya kuti cilasika ciindi bantu ibayanda bululami nobayookkala anyika kukabe kutamani? . . . Ooyo muzeezo ulakkomanisya, embo na? . . . Ulajanika mweena omu mu Bbaibbele. (Int. 37:29; Mt. 5:5; Ciy. 21:4)’

● ‘Ndilazumina kuti kumakani aya aumwi muntu weelede kulisalila. Pele sena mulizi kuti Leza walo uyandaula bantu bamusyobo umwi kuti babe mbebasikumukomba beni-beni? Amulange ku Johani 4:23, 24. Ino inga kwayandika nzi kutegwa tumukombe Leza “mubwini”? . . . Ncinzi Leza ncaatupa kutugwasya kuziba camasimpe acakubeja? . . . (Joh. 17:17) Alimwi amubone mbocili cintu cipati eci kulindiswe. (Joh. 17:3)’

● ‘Sena lyoonse mwali bantu bakomba? . . . Sena muyeeya kuti cilasika ciindi bantu boonse nobayakukomba cikombelo comwe? . . . Ndilaayeeya kapati makani aayo nkaambo kamajwi aalembedwe ku Ciyubunuzyo 5:13. . . . Ino ncinzi ciyandika kuti iswebo tube alubazu muli ceeci caambwa?’

● ‘Ndalikulangila kujana muntu uuli mbuli ndinywe uuyanda zintu zyakumuuya. Ibanji mazuba ano tabaziyandi pe. Ndalomba ndibuzye naa muyeeya buti acisyomezyo ca Bbaibbele cakuti Leza uyakugwisya bubi boonse alimwi akubamba nyika eyi kuti bube busena bukkalwa bantu balo bayanda bululami? Sena eco cilamukonda?’

● ‘Sena muli bantu batola lubazu mumakani aazyabukombi? . . . Sena cikombelo inga cilazula ciindi nomuswaangana mazuba ano? . . . Sena bunji bwabantu bajanika kucikombelo balayanda ncobeni kutobela ncolyaamba Jwi lya Leza mubukkale bwabo bwabuzuba abuzuba? (Naa, Sena bantu bamucikombelo canu balizuminene mukuyeeya kumakani aajatikizya nzila yakumana mapenzi aapenzya bantu munyika?) Twajana kuti cintu cigwasya nkubaa ciiyo canu ca Bbaibbele icaaŋanda.’

● ‘Cilalibonya kuti mulikkomene acikombelo canu. Pele bantu banji tabakkomene azintu zicitika munyika. Ambweni andinywe tazimukkomanisyi; embo na? . . . Ino ezi zintu zitutola kuli?’

● ‘Sena muli bantu bayanda kubala Bbaibbele? . . . Sena lyoonse mulajana ciindi cakulibala?’

● ‘Ndalumba kundaambila boobo. Ndasyoma mulazumina kuti notukomba cikombelo cilibuti, toonse tulayanda kapati luumuno munyika (naa, inzila zyakukwabilila bana besu kuzintu zikonzya kubanyonyoona; naa, kukkala abantu ibayandana ncobeni; naa, kumvwana abantu, alimwi eeco cilakatazya ciindi bantu boonse nobali mumapenzi).’

● ‘Ndakkomana kuziba kuti muli bantu bayanda kukomba. Bantu banji mazuba ano tabakubikkili maanu kukomba. Bamwi mane bayeeya kuti Leza tako. Pele kweelana ambomwakaiya, muyeeya kuti Leza muntu wamusyobo nzi? . . . Amubone kuti Bbaibbele lilatwaambila izina lyakwe. (Kul. 6:3; Int. 83:18)’

● ‘Ciindi Jesu naakatuma basiciiya bakwe kuya kukukambauka, wakabaambila kuti baunke munyika yoonse kutegwa bajane bantu banji bacikombelo cisiyene acabo. (Inc. 1:8) Pesi wakalizi kuti bantu aabo bafwide nzala anyota yabululami bayakuteelela. Ino makani nzi eni-eni ngaakaamba kuti ayookambaukwa muciindi cesu? (Mt. 24:14) Ino Bwami obo bujisi mpindu nzi kulindiswe?’

‘TULI BANAKRISTO KALE AANO’

● ‘Ndakkomana kuziba makani ayo. Pele ndasyoma mulizi kuti Jesu lwakwe wakali kuucita mulimo ooyu wakuswaya bantu mumaanda abo, alimwi wakabatuma abalo basiciiya bakwe kuti baucite. Sena muluuzi mutwe wamakani ngobakali kukambauka? . . . Aayo ngamakani ngotwaboolela kuti tubandike sunu. (Lk. 8:1; Dan. 2:44)’

● ‘Nokuba boobo ndasyoma mulabona kuti ncaakaamba Jesu mu Makani aakwe aa Mulundu ncintu cipati. Naakaamba majwi aakwe wakali kwaamba caluyando alimwi taakaamba cakwiinda ambali pe . . . (Mt. 7:21-23) Aboobo mubuzyo ngotweelede kulibuzya ngwakuti, Ino ndiluzi buti luyando lwa Taata? (Joh. 17:3)’

‘NDIJISI BUBI’

● ‘Anu naa mboobo tandikootola ciindi. Ndaboolela kuti tubandike kaambo komwe buyo kapati. (Amwaambe makani anu cakukosaula-kosaula, ambweni mumajwi obile.)’

● ‘Pe mbubo. Inga ndakkomana kuboola ciindi cimbi nomutakoonoojisi bubi. Pele nketanaunka, njanda kumubalila lugwalo lomwe buyo ilutwaambila cintu cimwi ncotweelede kuyeeyesya.’

● ‘Ndateelela makani aayo. Mbweli mutumbu (naa, mubelesi; naa, sicikolo) ndilijisi zyakucita zinji andime. Aboobo tandikootola ciindi. Toonse tuli mupenzi lipati. Ibbaibbele lyaamba kuti cilaafwi kusika ciindi Leza nayakunyonyoona bweende obu bubi bwasunu bwazintu. Pele bamwi bantu bayoofwutuka. Pele mubuzyo ngwakuti ino ncinzi nywebo andime ncotweelede kucita kutegwa tukabe akati kabaabo? Ibbaibbele lilaingula mubuzyo oyo. (Zef. 2:2, 3)’

● ‘Mulizi, eeco ncencico buya ncindaboolela. Toonse tujisi bubi—tujisi bubi cakuti zintu ziyandika kapati cini-cini mubuumi cimwi ciindi tatuzilangi akuzilanga pe, embo na? . . . Ndilatola buyo ciindi cisyoonto, pele ndasyoma mulayanda kuteelela caambwa mulugwalo lomwe buyo. (Lk. 17:26, 27) Taakwe unga wayanda kuba muciimo eco, aboobo tweelede kujana ciindi notujisi bubi buti kumvwa ncolyaamba Bbaibbele. (Amulombe kusiya bbuku.)’

● ‘Sena inga tatukonzyi kwiinda alimwi kwainda cisela cawoola lyomwe, twamana akubona basimukobonyoko bambi?’

● ‘Anu naa mboobo tandikoomusowela ciindi. Ambweni inga ndaboola aakale buzuba bumbi. Pele nketana unka, ndilomba kumusiila bbuku eeli ndyotumwaya. (Amulitondezye bbuku lyakumwaya mumwezi oyo.) Muciiyo cabbuku eeli mulaiya Bbaibbele mboliingula mibuzyo mbuli wakuti (amubuzye mubuzyo omwe naa yobile).’

● ‘Amundijatile kuti ndaboolela aciindi cibi. Mbuli mbomuzi, ndili umwi wa Bakamboni ba Jehova. Ndali kuyanda kuti tubandike andinywe kaambo kapati kamu Bbaibbele. Pele mbomunga tamujisi ciindi cakuswiilila lino, ndalomba ndimusiile kapepa aaka (katrakiti) ikabandika (amwaambe mutwe wamakani). Takakoomutolela ciindi kukamana kukabala, pele kalamukonda kapati.’

● ‘Ndaabwene makani aayo. Kuboneka kuti kunyina ciindi cakucita zyoonse nzyotuyandika kucita. Pele mwati kuli nomwakayeeyede mbozinga zyacinca zintu kuti notwali kupona kukabe kutamani? Ndilizi kuti eeco inga camugambya. Pele andimutondezye lugwalo lomwe buyo ilupandulula cintu eco mbocinga cakonzeka. (Joh. 17:3) Aboobo ncotweelede kucita lino nkwiiya zya Leza a Mwanaakwe. Nkakaambo kaako ncotusiya bbuku eli.’

‘NKAAMBO NZI NYWEBO NOBANTU NCOMUSWAYA-SWAYA?’

● ‘Nkaambo tusyoma kuti tukkede mumazuba aamamanino aambwa mu Bbaibbele. Tuyeeya kuti toonse tulayandika kapati kuyeeya mamanino aazintu zicitika sunu mbwaayooba. (Amwaambe cintu comwe naa zyobile izyakazwaa kucitika.) Mubuzyo ngwakuti, Ino ncinzi ncotweelede kucita kutegwa tukafwutuke ciindi camamanino aabweende obu bwazintu?’

● ‘Nkaambo tulamuyanda Leza abantuma. Eeco toonse ncotweelede kucita, embo na?’

‘NDILIZIZI KALE ZYOONSE NZYOMUKAMBAUKA’

● ‘Ndakkomana kumvwa makani aayo. Sena kuli musazinyoko naba mweenzinyoko Kamboni? . . . Ndalomba ndimubuzye: Sena mulasyoma ncotuyiisya kuzwa mu Bbaibbele kuti tukkede “mumazuba aakumamanino,” akuti ino-ino Leza uzoonyonyoona basizibi alimwi akuti inyika eyi izooba paradaiso ibantu mobakonzya kukkala kabapona kabotu akati kabasimukobonyina ibayandana ncobeni?’

‘TATUJISI MALI PE’

● ‘Tatuli mukulombelela mali pe. Pele tumukulwaizya kuti mube aciiyo ca Bbaibbele icipegwa buyo. Umwi mutwe wamakani uubandikwa muciiyo eci ngwakuti (amubelesye mutwe wacibalo kuzwa mubbuku ndyomubelesya kwiiya). Ndalomba ndimutondezye kwamaminiti buyo masyoonto mbotwiiya? Tamukoobbadela nokaba kangwee.’

● ‘Mbotuyanda mbantu ikutali mali aabo pe. (Amuzumanane amubandi wanu. Amubatondezye ibbuku limwi akubapandulwida mbolinga lyabagwasya. Ikuti batondezya kuti balayanda ncobeni alimwi basyomezya kuti balalibala, amubasiile. Ikuti kakweelede, amubapandulwide mulimo wesu wanyika yoonse mbwiizulwa mboubbadelelwa kutegwa uzumanane.)’

IKUTI UMWI WAAMBA KUTI ‘NDIMUBBUDA’

● Mutaindilili aakuyeeya kuti lusyomo lwamuntu ooyo ndumwi alwaba Bbuda boonse. Ici Bbuda camu Japani ciliindene a Cibbuda caku Southeast Asia. Aumwi mu Bbuda ulisiyene mukuyeeya. Pele kubunji bwaba Bbuda, aya makani inga agwasya: (1) Icikombelo ca Cibbuda tacizi Leza uulibedelede, Mulengi. Pele bama Bbuda banji bakomba zikozyanyo alimwi azinkozya zya Bbuda. (2) Siddhartha Gautama iwakapegwa zina lyabulemu lya Bbuda batobeli bakwe bakatalika kumubona kuti muntu wakutobela mubukombi, iweelede kuyiigwa ambabo. Wakali kukulwaizya kuba aluzibo kwiinda mukwiiya zyabantu munzila yabuntu, alimwi akugwisya zintu zileta kupenga kwiinda mukweendelezya mizeezo kumana kulombozya koonse kwanyika. Wakali kuyiisya kuti munzila eyi muntu inga wazikutaana aciimo ncobati Nirvana mpatacizyalululwi. (3) Bama Bbuda bakomba basikale nkaambo bayeeya kuti mbebakabapa buumi.

Inzila zimwi nzyomunga mwabandika: (1) Nomubandika aba Bbuda, amusinizye kwaamba kuti tamuli ba Kristendomu. (2) Bama Bbuda balaalemeka “mabbuku aasalala,” alimwi bunji bwambabo balalilemeka Bbaibbele akaambo kaako. Muciindi cakugama kubandika busongo bwa Cibbuda, amwaambaule makani aa Bbaibbele. Amubazibye kuti Bbaibbele talili bbuku lyabusongo bwabantu, pele Ndijwi lisyomeka ilya Mulengi wabantu, Jehova Leza. Amubalombe cabulemu kuti naa inga mwabatondezya kaambo kamwi kabotu kuzwa mubbuku eli lisalala, Ibbaibbele. (3) Bama Bbuda banji balayanda kapati luumuno abukkale bwamukwasyi alimwi balayanda kulilemeka mubukkale bwabo. (4) Amutondezye kuti Bbaibbele lyaamba kuti nyika iyakulelwa amfwulumende iiluleme yakujulu alimwi njenjiyo iiyakumana mapenzi aapenzya bantu. Lilapandulula iciyakucitika anyika kumbele aamazuba alimwi akuti bantu bayakukonzya kukkala kukabe kutamani muparadaiso anyika. (5) Mulakonzya mwaamba kuti Bbaibbele lilapandulula buumi nkobwakazwa, alimwi ampindu yabuumi, ciimo cabafwu alimwi abulangizi bwabubuke, alimwi ancokuli bubi. Ikuti mwakapandulula kabotu-kabotu kasimpe kamu Jwi lya Leza, ibantu bajisi myoyo ili mbuli yambelele balamvwa.

Ikabbuku kaniini ikategwa In Search of a Father kakalembelwa ikapati kuti kagwasye bama Bbuda ibakonzya kuteelela.

KUTI NAA UMWI WAAMBA KUTI ‘NDIMU HINDU’

● Mweelede kuziba kuti lusyomo lwaba Hindu lujisi bumpiyompiyo bukatazya alimwi talukonzyi kukozyanisigwa azintu zyamaanu. Cilakonzya camugwasya kuti kamuzi makani aya: (1) Icikombelo ca Cihindu ciyiisya kuti leza uutegwa Brahman uli mubutatu—Brahma Mulengi, Vishnu Mukwabilizi, alimwi a Siva Mujayi. Pele bama Hindu tabasyomi kuti kuli leza uulibedelede. (2) Bama Hindu basyoma kuti zintu zyoonse zyakalengwa zilijisi soolu iitafwi, akuti ilazumanana kiitaleki kuzyalululwa, alimwi akuti iciimo nciizyalululwa ciya mbuli micito (Karma) yamuntu alimwi akuti cilikke cinga caangulula muntu ikuzwa “mukwiindulukwa-indulukwa” oku nkumana kwakulombozya kwakumubili, elyo kuti eco cacitika, isoolu iyooswaangana amuuya wazintu zyoonse. (3) Bama Hindu banji balazilemeka zikombelo zimbi. Bama Hindu basyoma kuti nokuba kuti bayiisya njiisyo iziindene, zyoonse zikombelo zisololela kukasimpe buyo komwe.

Muciindi cakusola kukazya bumpiyompiyo bwabusongo obu bwama Hindu, amukanane kasimpe kasalala kali mu Bbaibbele. Ibantu bamisyobo yoonse balaangulukide kujana mpindu muzipo zyaluyando zya Jehova izyabuumi, elyo kasimpe kamu Jwi lyakwe ikatakatazyi kuteelela, kalakonzya kukulwaizya myoyo yabaabo ibalaa nzala anyota yabululami. Ndi Bbaibbele lilikke ilipa bulangizi bwabuumi bwakumbele aamazuba ibusyomeka; ndi Bbaibbele lilikke iliingula kabotu mibuzyo mipati iijatikizya bantu boonse. Amubalekele balimvwide beni Ibbaibbele mboliingula. Cilanyandya kujana kuti inyimbo ya Cihindu iili mu Rig-Veda, 10. 121, ijisi mutwe wakuti “Kuli Leza Uutazizilwe.” Muzimwi ziindi mulakonzya mwaajatikizya makani ayo. (Amukozyanisye a Incito 17:22, 23.) Icintu ncomweelede kuziba alimwi ncakuti izina lyaleza waba Hindu Vishnu, nolitakwe digamma, ngu Ish-nuh, eeli zina muci Chaldee lyaamba “muntu Nowa.” Amwaambe Bbaibbele ncolyaamba kumakani aa Zambangulwe lyanyika yoonse ilyakacitika mumazuba aa Nowa alimwi ambolitujatikizya.

Ootu tubbuku twamitwe yakuti The Path of Divine Truth Leading to Liberation alimwi a From Kurukshetra to Armageddon—And Your Survival alimwi akabroshuwa kakuti Our Problems—Who Will Help Us Solve Them? tujisi makani aakonzya kugwasya kapati kuba Hindu bamyoyo iluzi.

KUTI NAA UMWI WAAMBA KUTI ‘NDIMU JUDA’

● Kusaanguna amumubuzye muntu oyo naa mu Juda wamusyobo nzi. Mbasyoonto akati kabo ibakomba. Ibanji ibu Juda bwabo mbwamukowa buyo.

Aaya makani inga amugwasya kuti mwaalanga-langa: (1) Bama Juda ibakomba bayeeya kuti ikwaamba zina lya Leza cilatondwa. (2) Bama Juda banji bayeeya kuti “Ibbaibbele” ndibbuku lya Banakristo, pele kuti naa mwabelesya ibbala lyakuti “Magwalo aa Cihebrayo,” “Magwalo,” naa “Torah,” taakwe nokunga kwaba penzi elyo pe. (3) Bama Juda basyoma muzilengwa zyakaindi alimwi ibunji bwabaabo bakomba bayeeya kuti izilengwa ezi zyeelene buyo a Magwalo kunguzu. (4) Jesu Kristo balakonzya kumutamikizya kuti nguwakapa kuti bama Juda bapenzegwe calunya a Kristendomu muzina lya Jesu. (5) Kanjikanji basyoma kuti Leza uyanda kuti bama Juda kabalemeka Sabata, alimwi basyoma kuti eci cilabikkilizya akutajata mali buzuba obo.

Kutegwa mumvwane mumubandi wanu, mulakonzya mwaamba kuti: (1) ‘Ndasyoma mulazumina kuti notuba bantu bali buti, toonse tulapenga mapenzi ngoona aapenzya bantu boonse munyika yamazuba ano. Sena muyeeya kuti mapenzi mapati aapenzya zyalani eli ayakumana? (Int. 37:10, 11, 29; Int. 146:3-5; Dan. 2:44)’ (2) ‘Tatuli ba Kristendomu alimwi tatusyomi muli leza Wabutatu, pele tukomba Leza wa Abrahamu. Ikapati ncotuyanda nkubandika makani aamasimpe kujatikizya bukombi. Sena mulayanda kuti ndimubuzye mundaambile mbomuziba kuti eci ncamasimpe, ikapati twalanga kwaandaana kupati kuliko mulusyomo akati kabama Juda? . . . (Dt. 4:2; Is. 29:13, 14; Int. 119:160)’ (3) ‘Ncotuyandisya kapati kubandika ncisyomezyo Leza ncaakapa kuli Abrahamu cakuti kwiinda mulunyungu lwakwe bantu bamisyobo yoonse bayoolelekwa. (Matl. 22:18)’

Ikuti naa muntu waamba kuti tasyomi muli Leza, amumubuzye naa mbwaali kuzilanga obo zintu lyoonse. Kuzwa waawo ambweni mulakonzya mwabandika kaambo Leza ncaalekela kuti kube bubi alimwi akupenga. Bama Juda banji baciyeeya mapenzi ngobakapenga ciindi caba Nazi.

Kuti naa mwayanda kuti mubandike kaambo zina lya Leza ncoliyandika kapati kubelesegwa, kusaanguna amumubuzye muntu ngomubandika limwi kutegwa muzibe mbwayeeya amakani ayo. Amwaambe kuti ibbuku lya Kulonga 20:7 lilakasya kubelesya izina lya Leza cabuyo, pele talikasyi kulibelesya cabulemu. Mpoona mulakonzya mwapandulula kweelana azibalo mbuli zya Kulonga 3:15 (naa Intembauzyo 135:13); 1 Bami 8:41-43; Isaya 12:4; Jeremiya 10:25; Malaki 3:16.

Nomubandika makani aajatikizya Mesiya: (1) Kusaanguna amubandike zileleko ziyakuletwa abulelo bwakwe kumbele aamazuba, muciindi cakumupandulula. (2) Mpoona amupandulule zibalo zyaamba Mesiya muntu. (Matl. 22:17, 18; Zek. 9:9, 10; Dan. 7:13, 14) (3) Mulakonzya mwazibandika ziindi zyobile zyakuboola kwa Mesiya. (Amwaandaanye Daniele 7:13, 14 a Daniele 9:24-26.) (4) Nomwaamba Jesu, amumubandike kweelana ambwaakali kuyabuzuzikizigwa makanze aa Leza. Amwaambe kuti Jesu naakali kuyiisya, iciindi cakali afwaafwi cakuti Leza alekele tempele lyabili kuti linyonyoonwe, alimwi kutakabi noliyakuyakululwa. Pele Jesu wakali kusinizya kubandika zyakuzuzikizigwa kwa Mulawo alimwi amakani aa Basinsimi alimwi azintu ziyakucitika kumbele aamazuba alimwi abantu balusyomo mbobayakusololelwa kuzintu ezi.