Cibalo 41
Mazwanga Kujatikizya Nguwe
UCIMANA buyo kusamausigwa kuŋanda ya Simoni, Jesu watalika lweendo lwakwe lwabili lwakukambauka mu Galilaya. Mulweendo lwakwe lwamunsi kubusena obu, wakasindikidwe abasikwiiya bakwe bataanzi, Petro, Andreya, Jakobo alimwi a Johane. Pele lino ibaaposotolo bali 12 antoomwe abamakaintu bamwi mbobamusindikila. Aaba babikkilizya Mariya Magadalene, Susana alimwi a Johana uulaa mwaalumi mubelesi wa Mwami Heroda.
Mbubwena mbuuyaabuyaambele mulimo wa Jesu, akwalo kukazigwa kujatikizya mulimo wakwe kuyaabuvwula. Imuntu umwi uunjidwe daimona alimwi moofu syaataambi waletwa kuli Jesu. Ciindi Jesu naamuponya cakuti waanguluka kukweendelezyegwa a daimona alimwi wakonzya kwaambaula akubona, makamu aabantu bagambwa. Batalika kwaamba kuti: “Sa oyu teensi nguwenya mwana a-Davida?”
Makamu aabantu abungana mubunji kuŋanda nkwakkede Jesu cakuti walo abasikwiiya bakwe tabakwe aciindi cakulya. Kunze lyabaabo bayeeya kuti inga kali “mwana a-Davida,” kuli balembi aba Farisi bazwa kule ku Jerusalemu ikuzyoomusampaula. Ibasazinyina Jesu nobamvwa kuyobana koonse kujatikizya Jesu, baboola kuti bamujate. Nkaambo nzi?
Nobaba banababokwabo Jesu tabanasyoma kuti Mwanaa Leza. Alimwi lupyopyongano abulwani nzyaaletelezya tacili nceciimo ca Jesu ngobakazi naakacili kukomena mu Nazareta. Aboobo bayeeya kuti kuli calubila mubongo bwa Jesu. Balaamba: “Wasondoka,” aboobo bayanda kumujata akumuzwisya awo.
Pele bumboni bulalibonya bwakuti Jesu waponya muntu waanjidwe daimona. Ibalembi aba Farisi balizi kuti tabakonzyi kwaakazya masimpe aya. Aboobo ikutegwa basampaule Jesu baambila bantu ategwa: “Oyu muntu inguzu nzyatanzya badaimona nzizya-Belzebule mwami wabadaimona.”
Kazi kuyeeya kwabo, Jesu waita balembi aba Farisi akwaamba kuti: “Cisi cimwi acimwi citakakatilani cinoosaalwa. Alimwi munzi umwi aumwi niiba iŋanda imwi aimwi zitakakatilani tazikoojata pe. Nkabela Saatani kuti watanda Saatani ulalilwisya mwini, ino cisi cakwe cilajata buti?”
Ibupanduluzi obo inga bwaleka kukuzula! Mbwaanga ba Farisi baamba kuti bantu bazwa kucikombelo cabo balatanda badaimona, Jesu wabuzya kuti: “Ime kuti inguzu nzintanzya badaimona nzizya-Belzebule, ino bana banu ninguzu zyani nzibabatanzya balo?” Munzila imwi imulandu ngobapa Jesu weelede kupegwa akulimbabo. Mpoonya Jesu wacenjezya ategwa: “Pele ime, kuti inguzu nzintanzya badaimona nzizya-Muuya wa-Leza, lino Bwami bwa-Leza buliswenede afwiifwi kulindinywe.”
Ikutondezya kuti ikutanda badaimona kwakwe mbumboni bwakubaa nguzu kwiinda Saatani, Jesu ulaamba: “Muntu ulakonzya kunjila buti muŋanda yasinguzu akusaala lubono lwakwe, atasaanguna kumwaanga singuzu oyo? lino ulasaala iŋanda yakwe. Oyo nguntali awe ulandilwisya, nkabela oyo uutabunganyi ambe ulamwaya.” Cilasalala kuti ba Farisi balamulwana Jesu elyo balitondezya kuti mbabelesi ba Saatani. Bamwaya bana Israyeli kuzwa kulinguwe.
Mpoonya Jesu wacenjezya basikukazya aba banasataani kuti “kusanka Muuya muntu takonzyi kulekelelwa nkuko pe.” Wapandulula ategwa: “Umwi aumwi uubika kaambo ku-Mwana a-Muntu uzoolekelelwa, pele umwi aumwi uubika kaambo ku-Muuya Uusalala takoozoolekelelwa pe, nikuba kuciindi ecino nikuba kuciindi ciza.” Abo balembi aba Farisi bacita mulandu uutakonzyi kulekelelwa kwiinda mukwaamba cabumpelenge kuti mmilimo ya Saatani izintu ziboneka buya kuti maleele aacitwa kwiinda mumuuya uusalala wa Leza. Matayo 12:22-32; Marko 3:19-30; Luka 8:1-3; Johane 7:5.
▪ Ino lweendo lwa Jesu lwabili lwaku Galilaya lwaindana buti alwakusaanguna?
▪ Nkaambo nzi basazinyina Jesu ncobasola kumujata?
▪ Muunzila nzi ba Farisi mobasola kusampaula maleele aa Jesu, alimwi Jesu wabakazya buti?
▪ Balaa mulandu nzi ba Farisi alimwi nkaambo nzi?