Cibalo 96
Jesu a Mweendelezi Muvwubi
MBWAYAABWEENDA Jesu mucooko ca Pereya kugama ku Jerusalemu, mulombwana umwi wamuzuzaanina akumufwugamina. Oyu muntu wiitwa kuti mmweendelezi ambweni kwaamba kuti ulaa cuuno cabulemu mucikombelo cinyenzi naa kuti ngumwi Wabasinkuta Mpati. Alimwi mmuvwubi kapati. Wabuzya ategwa: “Mufundisi mubotu, ino nkacite buti kuti nkajane buumi butamani?”
Jesu waingula ategwa: “Ino undaambililanzi kuti omubotu? Taakwe muntu mubotu, pele Leza alike ngumubotu.” Kulalangilwa kuti ooyu mulombwana ibbala lya “mubotu” walibelesya mbuli zina lyakutembaula muntu, aboobo Jesu wamuzibya kuti izina lili boobu ndilya Leza alikke.
Jesu wazumanana ategwa: “Pele kuti koyanda kunjila mubuumi, tobela milazyo.”
Oyu muntu wabuzya ategwa: “Milazyonzi?”
Kaamba milazyo yosanwe akati kaili Kkumi, Jesu waingula ategwa: “Utajayi, Utaciti bumambi, Utabbi, Utalengeleli umwi cakubeja, Lemya uso abanyoko.” Alimwi kayungizya mulazyo uuyandika kapati Jesu ulaamba: “Yanda mweenzinyoko mbuli mboliyanda omwini.”
“Aya oonse nsikwe nendakaaluba kuzwa kubwana bwangu,” oyu mulombwana waingula cakusyomeka. “Ino ncinzi ncincibula?”
Kaswiilila nkwalisina-sina kulomba mulombwana ooyu Jesu wamuyanda kapati. Pele Jesu wamubona muntu oyu mbwaziyanda zintu zyakumubili aboobo waamba ncayandika kucita ategwa: “Alo mpocili comwe ncotajisi. Nceeci. Koya ukauzye zyoonse nzyojisi, ukape bacete, noti jane lubono kujulu, alimwi uboole, ucilile ndime.”
Jesu wamulangilila cakutadooneka kaetede nanyamuka mulombwana oyu akweenda kauside kapati. Ilubono lwakwe lumusinkilila kulubono lwini-lwini. Jesu weembauka ategwa: “Ha! takuli nkokuyuma kunjila mu-Bwami bwa-Leza kulibaabo bali alubono lunji.”
Majwi aa Jesu abakankamanisya basikwiiya. Pele baindila kugambwa naayaambele kwaamba ciimo ciliko kanjikanji ategwa: “Nkutete kunkamele kuti iinde muliso lyansunda kwiinda kuti muvubi anjile mu-Bwami bwa-Leza.”
“Mwati inga kuyooba uyoofutuka buya?” basikwiiya bayanda kuziba.
Kalangide cakubagama, Jesu waingula ategwa: “Kubantu tacikonzeki pe, pele kwa-Leza cilakonzeka, nkaambo zintu zyoonse zilakonzeka kwa-Leza.”
Kabwene kuti kusala kwabo kulaandeene akwayooyu mweendelezi muvwubi, Petro ulaamba: “Langa! iswe tulisiide zintu zyoonse kuzootobela nduwe.” Aboobo wabuzya ategwa: “Ino tuyoopegwanzi?”
Jesu wasyomezya ategwa: “Inywe mwakanditobela, kumacitulwido naazookala Mwana a-Muntu acuuno cabulemu bwakwe, anywebo muzookala azyuuno zili ikumi azibili, mukabeteke misyobo iili ikumi aibili yaba-Israyeli.” Inzya Jesu utondezya kuti kuyooba kulenga kupya kwabukkale anyika kutegwa zintu zikabe mbuli mbozyakabede mumuunda wa Edeni. Elyo Petro abasikwiiya bambi bayootambula bulumbu bwakulela nyika yoonse ya Paradaiso antoomwe a Kristo. Tee kuliimya cintu cili coonse kutegwa ujane bulumbu bupati buli boobu takuli kucengwa!
Nokuba boobo, noliba lino kuli bulumbu, mbubwena Jesu mbwaamba cakusimpya ategwa: “Taakwe muntu iwakaleka iŋanda nibaba banabakwabo nibaba bacizi nibaba banyina naba wisi nibaba bana bakwe niiba myuunda nkaambo kandime aka-Makani Mabotu, anu ulijene kale kuciindi ecino buncilincili bwamaanda abanabakwabo abacizi abamanyina abana amyuunda, antoomwe amapenzi, elyo muciindi ciboola uyoojana buumi butamani.”
Mbubwena Jesu mbwasyomezya, kufwumbwa nkobaunka basikwiiya bakwe munyika, balakkomana abulongwe a Banakristonyina bwalo bubotu kwiinda mbobajisi banamukwasyi mbobazyalwa limwi. Oyu mweendelezi muvwubi waindwa bulumbu obu antoomwe abobuya bwabuumi butamani mu Bwami bwa Leza bwakujulu.
Kumane Jesu wayungizya ategwa: “Pele banjibanji ibasaanguna mbabayoosyaalila, abalo ibasyaalila mbabayoosaanguna.” Ino waamba nzi awa?
Waamba kuti bantu banji “ibasaanguna” kutambula mikuli yacikombelo mbuli mweendelezi oyu muvwubi, tabakanjili mu Bwami. Bayooba ‘mbabasyaalila.’ Pele banji kubikkilizya basikwiiya ba Jesu balicesya, balo basulaikwa ibaambwa kuti ‘balisyaalide’ aba Farisi balibona kululama—akuti mbantu baansi naa ba ‛am ha·’aʹrets—bayooba “ibasaanguna.” Ikuba ‘bakusaanguna’ caamba kuti bayootambula mikuli yakuba basikulela limwi a Kristo mu Bwami. Marko 10:17-31; Matayo 19:16-30; Luka 18:18-30.
▪ Kulibonya kuti mweendelezi uuli buti oyu mulombwana muvwubi?
▪ Nkaambo nzi Jesu ncaakakila kwiitwa kuti mubotu?
▪ Ino iciimo camulombwana oyu mweendelezi citondezya buti bubyaabi bwakuvwuba?
▪ Mbulumbu nzi Jesu mbwasyomezya basikumutobela?
▪ Ino ibasaanguna baba buti basyaalizi, alimwi basyaalizi kuba bakusaanguna?