Cibalo 100
Cikozyanyo Camali
AMBWENI Jesu ucili kuŋanda ya Zakayu kwalo nkwaaleya mulweendo lwakuya ku Jerusalemu. Basikwiiya bakwe basyoma kuti baakusika ku Jerusalemu uyoolyaamba kuti ngu Mesiya alimwi akukkazika Bwami bwakwe. Ikululamika muzeezo oyu alimwi akutondezya kuti Bwami bucili kulamfwu, Jesu waamba cikozyanyo.
Ulaamba: “Umwi muntu, mwana amwami, wakainka kucisi cimwi icakali kule kuti akalitambwide bwami, akaboole.” Jesu ngo “mwana amwami,” alimwi kujulu nko “kucisi cimwi icakali kule.” Aakusika okuya Jesu, Usyi uyoomupa Bwami.
Pele katanaunka, oyu mwanaa mwami waita bazike bali kkumi akubapa di lyomwe-lyomwe lyansiliva akwaamba kuti: ‘Amukaapindaule mane ndikaboole.’ Ibazike bali kkumi mukuzuzikizigwa kwakusaanguna baiminina basikwiiya ba Jesu bakusaanguna. Mubupanduluzi bumbi, baiminina boonse balangilwa kuyooba basikukona Bwami bwakujulu anguwe.
Imali aansiliva mmali aayandika kapati, alimwi sheleni kalisika kumali aajana mulimi mumyezi iitandila kwiitatu. Pele ino mali aya aaiminina nzi? Alimwi nkwaapindaula kwamusyobo nzi bazike nkobeelede kucita?
Imali aiminina lubono ndobanga babelesya basikwiiya bananikidwe aamuuya ikuleta bambi basikukona Bwami bwakujulu kusika ciindi Jesu nayooboola kali Mwami mu Bwami busyomezyedwe. Naakabusigwa akulibonya kuli basikwiiya bakwe, wakabapa mali aacikozyanyo kutegwa bagwasye bantu abambi ikuba basikwiiya aboobo basanganizigwe kuciinga camu Bwami bwakujulu.
Jesu wazumanana ategwa: “Pele abamucisi [camwanaa mwami] tabakali kumuyanda, bakatuma mulomo munsi lyakwe wakuti, Tatumuyandi oyu muntu kuti abe mwami wesu.” Ibamucisi mbana Israyeli naa bama Juda kutabikkilizya basikwiiya. Jesu naakaunka kujulu, aba bama Juda kwiinda mukupenzya basikwiiya bakwe bakatondezya kuti tiibakali kumuyanda kuti abe mwami wabo. Munzila eyi bakalilemeka mbuli kuti mbaasicisi bakatuma mulomo.
Ino bazike bali kkumi bakaabelesya buti mali aabo? Jesu wapandulula ategwa: “Elyo naakaboola ulipedwe bwami, wakalailila kuti baitigwe bazike abo mbaakapa mali, akazibe ncobakajana kukupinduka kwabo. Wakasika mutaanzi wateeti, Omwami, impondo yako yapinduka mpondo zimwi izili kumi. Wakati kulinguwe, Ncibotu, omuzike mubotu, nkaambo ulisyomekede kuzintu zice uyoobikwa bwami kuminzi iili kumi. Nkabela wakasika wabili wateeti, Omwami, impondo yako yajana zimwi mpondo zyosanwe. Wakati kulinguwe, Ayebo uyooba mwami kuminzi yosanwe.”
Imuzike uulaa mpondo zili kkumi wiiminina ciinga naa nkamu yabasikwiiya kuzwa kuciindi ca Petekoste yamu 33 C.E. kusikila lino ikubikkilizya abaapostolo. Imuzike wakapindula mpondo zyosanwe awalo wiiminina nkamu muciindi nciconya ibakunga kweelana azyoolwe zyabo alimwi anguzu bayungizya lubono lwamwami anyika. Inkamu zyoonse zyobile zilasungwaala kukambauka makani mabotu nkakaambo kaako banji balaa myoyo mibotu baba Banakristo. Ibazike bali 9 bakazwidilila mukupindaula kwabo akuyungizya lubono lwabo.
Jesu wazumanana ategwa: “Aumwi wakasika wati, Omwami, njeeyi mpondo yako, ndundakayobola ilivungidwe mucisila. Ndakakuyoowa nkaambo uli mukali, ulabweza ncowatakabika, ulatebula ncowatakasyanga. Wakati kulinguwe, Ndakubeteka kumulomo wako omwini, omuzike mubi. Ulizi kuti ndi mukali, ndilabweza ncendatakabika, ndilatebula ncendatakasyanga. Ino wakaba anzi kutabika mali aangu muciyobwedo kuti ndaboola nendazooajana empindu yao. Elyo wakabaambila abakali kwiimvwi ambali wati, Amumunyange mpondo, mwiipe uuli empondo izili kumi.”
Kumuzike mubi, kusowekelwa kwamali aacikozyanyo caamba kusowekelwa busena mu Bwami bwakujulu. Inzya, cili mbuli kuti wasowekelwa coolwe cakulela minzi iili kkumi naa yosanwe. Alimwi amubone kuti oyu muzike taambwi kuti mubi akaambo kabubyaabi buli boonse pele nkaambo kakwaalilwa kubeleka kuti ayungizye lubono lwabwami bwamwami wakwe.
Iciindi mali aamuzike oyu mubi naapegwa muzike wakusaanguna, kwaba kutongooka ategwa: “Omwami, ujisi kale mpondo izili kumi.” Pele Jesu waingula ategwa: “Umwi umwi uujisi uyoopegwa, kwalo uutajisi uyoonyangwa ancajisi. Abaabo basinkondoma abatali kuyanda kuti ndibe mwami wabo, amubalete kuno, mubajaye kumbele lyangu.” Luka 19:11-27; Matayo 28:19, 20.
▪ Ncinzi capa kuti Jesu aambe cikozyanyo camali?
▪ Nguni mwanaa mwami, alimwi kucisi nkwainka nkuli?
▪ Ino bazike mbaani, alimwi mali aiminina nzi?
▪ Ino basicisi mbaani, alimwi bakutondezya buti kutayanda kwabo?
▪ Nkaambo nzi muzike omwe ncaambilwa kuti mmubi, alimwi kusowekelwa kwakwe kwamali caamba nzi?