Cibalo 102
Ikunjila kwa Kristo mu Jerusalemu Cakuzunda
IBUZUBA bwatobela cifwumofwumo, mu Nsondo, Nisani 9, Jesu wazwa mu Betaniya abasikwiiya bakwe akugama ku Cilundu ca Elaioni kabaya ku Jerusalemu. Muciindi buyo cisyoonto, basika afwaafwi aku Betefage munzi uuli a Cilundu ca Elaioni. Jesu walailila basikwiiya bakwe bobile ategwa:
“Kamuya kumunzi uuli kunembo, nkabela mpawo mulajana imbongolo iisungidwe amwana wayo. Amuzisungunune, muzilete kulindime. Nkabela kuti muntu akamubuzye ijwi, mukaambe kuti, Mwami uli amulimo wazyo. Ndilyonya ulazituma.”
Nokuba kuti kukusaanguna basikwiiya baalilwa kuziba kuti malailile aya alaa mbwaaswaangene akuzuzikizigwa kwabusinsimi bwa Bbaibele, kumbele bazyooziba. Imusinsimi Zakariya wakasinsima kuti Mwami uusyomezyedwe wa Leza uyoonjila mu Jerusalemu katantide ambongolo, inzya, “amwana wambongolo.” Awalo Mwami Solomoni wakali tantide amwanaa mbongolo kaya kuyoonanikwa.
Basikwiiya nobanjila mu Betefage akubweza mbongolo amwana wayo ibantu bamwi baimvwi babuzya ategwa: “A! Mucita nzi?” (BT) Pele nobaambilwa kuti ulaziyanda Mwami, babaleka basikwiiya kuti bazitole kuli Jesu. Basikwiiya babikka zyakusama zyabo ambongolo amwanaayo pele walo Jesu watanta amwanaa mbongolo.
Mbwayaabuya Jesu kugama ku Jerusalemu, nkamu iyabukomena. Bunji bwabantu bayala zikobela zyabo munzila alimwi bamwi batema tusanzu twazisamu akutuyala munzila. Balaamba: “Uli acoolwe uuboola muzina lya-Jehova, alube luumuno kujulu abulemu kujulu lyamajulu.”
Iba Farisi bamwi bacimwa akaambo kakwaambilizya kuli boobu aboobo batongookela Jesu ategwa: “Mufundisi, bakasye basikwiiya bako.” Pele Jesu waingula ategwa: “Ncobeni ndamwaambila kuti na balaumuna aba, mabwe aloompolola.”
Mbwayabuswena munsi aaku Jerusalemu, Jesu waubona munzi akutalika kuulila ategwa: “Nowali kuzi yebo mulibobuno buzuba zintu izyeelede kuleta luumuno kulinduwe, pele eno zilisisidwe kumeso aako.” Akaambo kakutamvwa caali, Jerusalemu weelede kusubulwa mbubwena Jesu mbwaasinsima ategwa:
“Basinkodonyoko [ba Roma kabeendelezyegwaa Mupati wamasole Tito] ncobayookuyakila bwaanda, bakuzingane, bakusinkile kumabazu oonse, bakumwaile ansi antoomwe abana bako abali mulinduwe, tabakooyoosia kulinduwe ibbwe neliba lyomwe ilili atala alimwi.” Oku kunyonyoonwa kwa Jerusalemu nkwaakasinsima Jesu kwacitika nokwainda myaka iili 37, mumwaka wa 70 C.E.
Insondo zisyoonto buyo zyainda, banji bali munkamu bakamubona Jesu kabusya Lazaro. Lino aba balwiida bamwi makani aamaleele aya. Aboobo ciindi Jesu naanjila mu Jerusalemu, munzi oonse wazingwa. Bantu bayanda kuziba ategwa: “Ino ngwani oyu?” Elyo makamu-makamu bazumanana kwaamba kuti: “Nguwenya Jesu musinsimi uuzwa ku-Nazareta waku-Galilaya.” Nobabona zicitika, iba Farisi beembauka kuti taakwe ancobacita nkaambo balaamba: “Ede inyika yoonse yamucilila.”
Mbubwenya mbuli cilengwa cakwe lyoonse naswaya ku Jerusalemu, Jesu waunka kuyooiisya kutempele. Okuya, iboofu abalema baboola kulinguwe elyo wabaponya! Ibapaizi basilutwe abalembi nobabona zintu zibotu Jesu zyacita alimwi anobamvwa bana basankwa bali mutempele kaboongolola kuti “Hosana ku-Mwana a-Davida,” bakalala kapati. Balaamba: “Sa teewamvwa aba ncibaamba?”
Jesu waingula ategwa: “Ii. Sa tamubalide kuti, kuzwa kumilomo yatwana atunyonka wakalondola lutembaulo?”
Jesu wazumanana kuyiisya aboobo walanga-langa zintu zyoonse zili mutempele. Mukaindi kasyoonto kwasiya. Aboobo wazwa, waunka atoomwe abali 12 mulweendo lulaa makkilomita otatwe naa aainda awa kuya ku Betaniya. Okuya nkwaakkala masiku aamu Nsondo, ambweni kuŋanda yamulongwaakwe Lazaro. Matayo 21:1-11, 14-17; Marko 11:1-11; Luka 19:29-44; Johane 12:12-19; Zekariya 9:9.
▪ Ndilili Jesu naanjila mu Jerusalemu mbuli Mwami, alimwi munzila nzi?
▪ Kuyandika buti kuti makamu-makamu amutembaule Jesu?
▪ Ino Jesu walimvwa buti naalanga Jerusalemu, alimwi mbusinsimi nzi mbwaamba?
▪ Ncinzi cacitika Jesu naaunka kutempele?