Bakacita Kuyanda kKwa Jehova

Jesu Watembaulwa Kuti ngo Mesiya alimwi Mmwami!

INKAMU eeyo iyakanjila mu Jerusalemu kiiyaabuyoba mu Nisan 9, 33 C.E., yakabagambya banji bana Judaya. Nokuba kuti teecakali ceenzu ikubona bantu kabayoboloka kunjila mumunzi oyo yayanda kusika Pasika, balo aba beenzu bakaliindene loko. Imupati akati kabo wakali mwaalumi wakatantide amwanaa mbongolo. Mwaalumi oyo wakali Jesu Kristo, alimwi bantu bakali kumuyalila zikobela amalala kumwi kabaongolola kuti: “Hosana kumwana a-Davida! Uli acoolwe oyu uuboola muzina lya-Jehova.” Bacibona nkamu eyo, ibanji bakali kale mu Jerusalemu bakakwelelezegwa mukufwoola oko.—Matayo 21:7-9; Johane 12:12, 13.

Nokuba kuti lino Jesu wakali kutembaulwa, wakalizi kuti masunko alamulindila. Ma! Mumazuba aali buyo osanwe wakali kuzoojaigwa mumunzi ngweena oyu! Ee, Jesu wakalizi kuti Jerusalemu bwakali busena bwabukali, alimwi nalitondezya boobo caantangalala kuti lino wanjila mumunzi wakali kazi kaambo aaka mumoyo.

Kwazuzikizigwa Businsimi Bwansiku

Mu 518 B.C.E., Zekariya wakakusinsima kusika kwa Jesu kwabulemu mu Jerusalemu. Wakalemba kuti: “Sekelela loko, O mwana musimbi wa-Zioni. Imba cakukondwa, O mwana musimbi wa-Jerusalemu. Langa! Ngooyu mwami wako uuboola kulinduwe. Uliluleme, muzundi, alimwi ulibombede, ulitantide ambongolo, amwana wambongolo. . . . , nkabela uyooletela bamasi luumuno. Uyooba abwami muzisi zyoonse kuzwa kulwizi kusikila akulwizi lumbi, akuzwa kumulonga mupati akusikila kumagolelo aanyika.”—Zekariya 9:9, 10.

Aboobo kunjila kwa Jesu mu Jerusalemu mu Nisan 9 kwakazuzikizya businsimi bwamu Bbaibbele. Teecakalicitikila buyo cini, pele cakalibambilwa buya kabotu-kabotu. Musule kabacili anze aa Jerusalemu, Jesu wakalailide basiciiya bakwe bobile kuti: “Kamuya kumunzi uuli kunembo, nkabela mpawo mulajana imbongolo iisungidwe amwana wayo. Amuzisungunune, muzilete kulindime. Nkabela kuti muntu akamubuzye ijwi, mukaambe kuti, Mwami uli amulimo wazyo. Ndilyonya ulazituma.” (Matayo 21:1-3) Ino nkaambo nzi Jesu ncaakayanda kunjila katantide ambongolo mu Jerusalemu, alimwi kutambulwa nkwaakatambulwaa buleya kwakali kwiiminina nzi?

Ciiyo Cijatikizya Bwami

Icintu cilibonyaa meso kanjikanji cilayiisya kwiinda majwi aambwa. Ncencico zimwi ziindi basinsimi Jehova ncaakabacitya zikozyanyo zyamilumbe yabo ikusindamizya mulumbe wabusinsimi. (1 Bami 11:29-32; Jeremiya 27:1-6; Ezekiele 4:1-17) Eeyi nzila yakuzibisyanya yalo iibelesya kapati meso, yakali kubalamya munzila iitalubiki nobaba basikweebela ibainda kuyuma myoyo. Munzila iikonzyenye, Jesu wakacita cikozyanyo camulumbe mupati kwiinda mukunjila mumunzi wa Jerusalemu katantide ambongolo. Ibuti?

Kuziindi ziluulwa mu Bbaibbele, imbongolo yakali kubelesegwa muzintu zilemenede. Mucikozyanyo, Solomoni wakasika kuzoonanikwa kuba mwami katantide “abbiza” lyawisi, naa twaambe kuti mwana uvwelene wabbiza ambongolo. (1 Bami 1:33-40) Aboobo kunjila kwa Jesu mu Jerusalemu katantide ambongolo walo caamba kuti wakali kulizibya kuti mmwami.a Izyakacita buleya zyakasindamizya mulumbe oyu. Eyo nkamu, yalo iilangilwa cakutadooneka kuti yakali yabana Galilaya kapati, yakamuyalila zikobela zyayo Jesu—icitondezyo cakalibonya mubuleya nobwakatambula kwaambilizya kwa bwami bwa Jehu. (2 Bami 9:13) Ikwaamba kwabo akuti Jesu “[m]mwana a-Davida” kusinizya nguzu zyakwe zyamumulawo izyabwami. (Luka 1:31-33) Alimwi ikubelesya malala kulibonya kuti kwakali kutondezya kulibombya kwabo kubweendelezi bwakwe bwa bwami.—Amweezyanye a Ciyubunuzyo 7:9, 10.

Aboobo nkamu eyo yakafwoolwa kunjila ku Jerusalemu mu Nisan 9 yakaambilizya mulumbe uulimvwisya wakuti Jesu nguwakali Mesiya alimwi Mwami uusalidwe aa Leza. Aneeno tabali boonse ibakakkomana kubona Jesu kabikkwa muciimo cili boobu. Ikapati ba Falisi bakacibona kutondwa loko kuti Jesu atondezegwe bulemu bwa bwami buli boobu. Bakatongooka ategwa: “Mufundisi, bakasye basikwiiya bako.” Jesu wakaingula wati: “Ncobeni ndamwaambila kuti na balaumuna aba, mabwe aloompolola.” (Luka 19:39, 40) Ee, Bwami bwa Leza ngowakali mutwe wamakani mukukambauka kwa Jesu. Wakali sikwaambilizya mulumbe oyu nobautambula bantu nobaukaka.

Ciiyo Kulindiswe

Jesu wakayandika kapati busicamba kuti anjile mu Jerusalemu munzila yakasinsimwa amusinsimi Zekariya. Wakalizi kuti mukucita boobu wakali kunyemya basinkondonyina. Katanatanta kuya kujulu, Jesu wakatuma basikumutobela kuti bakakambauke makani mabotu aa Bwami bwa Leza alimwi “[ba]kabaiisye bantu bamisyobo yoonse.” (Matayo 24:14; 28:19, 20) Ikukonzya mulimo oyu akwalo kuyandika busicamba. Tabali boonse ibakkomana kumvwa mulumbe oyu. Bamwi tabakwe makani anguyo, kakuli bamwi balaukazya. Zimwi mfwulumende mane zyausinkilila mulimo wakukambauka ooyu antela zyaukasizya limwi buya.

Pesi balo Bakamboni ba Jehova balizi kuti makani mabotu aa Bwami bwa Leza ibwakatalisigwa eelede kukambaukwa, nokuba kuti bantu balaswiilila naa balakaka. (Ezekiele 2:7) Mbobazumanana kucita mulimo oyu uufwutula maumi aabantu, balakulwaizigwa acisyomezyo ca Jesu cakuti: “Amulange, ndaba anywe mazuba oonse nikuba kusikila kumamanino aaciindi.”—Matayo 28:20.

Bupanduluzi buyungizidwe