Cibalo 107
Cikozyanyo Capobwe Lyabwiinga
KWIINDA mukubelesya zikozyanyo zyobile, Jesu wayubulula balembi abapaizi basilutwe aboobo bayanda kumujaya. Pele Jesu ucibajisi mbuli bwamoomu. Wazumanana kubaambila acimbi cikozyanyo kaamba kuti:
“Bwami bwakujulu bulikozyene amwami umwi iwakacitila mwanaakwe ipobwe lyabwiinga. Nkabela naakatuma bazike bakwe kuyooita batambidwe kupobwe, bakakaka kuboola.”
Jehova Leza ngo Mwami iwacita pobwe lyabwiinga lya Mwanaakwe Jesu Kristo. Mpoonya, banabwiinga ibali 144,000 basikumutobela bananike bayookamantana a Jesu kujulu. Ibalelwa ba Mwami, mbantu bamu Israyeli balo bakafwumbwa nobakaletwa mucizuminano ca Mulawo mu 1513 B.C.E., bakatambula coolwe cakuba “cisi cabapaizi.” Aboobo, aciindi awa bakalitambidwe kupobwe lyabwiinga.
Nokuba boobo kwiitwa kwakusaanguna kuli baabo batambidwe teekwakacitwa mane kusika mu 29 C.E., ciindi Jesu abasikwiiya bakwe (bazike ba mwami) nobakatalika mulimo wabo wakukambauka Bwami. Pele bana Israyeli bakumubili ibakatambula kwiitwa oku kwakatolwa abazike kuzwa mu 29 C.E. kusika mu 33 C.E. teebakalibambilide kuboola. Aboobo Leza wakapa coolwe cimbi kucisi cabaaba batambidwe mbubwena Jesu mbwaluula ategwa:
“Alimwi wakatuma bazike bambi, wati, Amukabaambile batambidwe kuti, Amulange! cikoboko cangu cabizwa, basune bangu abanyama banenede bangu bajayigwa kale, azintu zyoonse zyabizwa. Kamuza kupobwe.” Oku kwiita kwabili alimwi kwamamanino kuli baabo bakatambidwe kwakatalika lya Petekoste 33 C.E., ciindi muuya uusalala nowakatilwa ali basikutobela Jesu. Oku kwiita kwakazumanana kusika mu 36 C.E.
Nokuba boobo, bunji bwabana Israyeli, bakakukaka kwiitwa oku. Jesu ulaamba: “Bakanyansya buyo, bakainka, umwi kumuunda wakwe, aumwi kukusambala kwakwe. Alimwi abo ibakasyaala bakajata bazike bakwe, babauma, babajaya.” Jesu wazumanana ategwa: “Lino mwami wakakalala, wakatuma basinkondo bakwe kuyoobavwinyauna abo bajayi akutenta munzi wabo.” Eci cakacitika mu 70 C.E., ciindi Jerusalemu naakamwaigwa abana Roma kusika ansi, elyo abo bajayi bakajaigwa.
Mpoonya Jesu wapandulula icicitika aciindi awa: “Elyo [mwami] waambila bazike bakwe, wati, Ipobwe lyabizwa, pele batambidwe tabeelede. Nkaambo kaako kamuya kumapambukanino aanzila, nkabela boonse bali buti mbemuyoojana amubaite kupobwe.” Ibazike bakacita obu elyo “bwiinga bwakazula beenzu.”
Oyu mulimo wakuyobolola beenzu kuzwa kumapambukanino aanzila zyaanze amunzi wabaabo batambidwe kwakatalika mu 36 C.E. Silumamba waba Roma, Koneliyo amukwasyi wakwe mbobakasaanguna akati kabamasi batapaludwe ibayobololwa. Oku kuyobololwa kwabaaba bamasi, balo boonse babweza busena bwabaabo bakakaka kutambwa kwakusaanguna, kwazumanana kusikila mumwaanda uno wamyaka wa 20.
Muumwaanda wamyaka wa 20 iŋanda yabwiinga noizula. Jesu waluula cicitika kwamana waawo ulaamba: “Lino mwami naakanjila kukubona beenzu wakabona omo muntu umwi uutasamide cikobela cabwiinga. Nkabela wamwaambila wati, Mweenzuma, ino wakanjila buti omuno kotasamide cikobela cabwiinga? Walo wakaumuna buyo. Lino mwami wakaambila balanda kuti, Amumwaange maboko amaulu, mumubweze, mumusowele mumudima waanze, oko kulaba kulila akuluma ntwino.”
Imuntu uutajisi cikobela cabwiinga wiiminina Banakristo bakubeja ba Kristendomu. Leza kunyina nabazi aba kuti bajisi ciimo cibotu cabana Israyeli bakumuuya. Leza kunyina naakabananika aba amuuya uusalala kuti mbasikukona Bwami. Aboobo balasoogwa anze mumudima kwalo nkobayoonyonyoonwa.
Jesu wamanizya cikozyanyo cakwe kwiinda mukwaamba kuti: “Nkaambo abo baitwa mbanji, pele abo basalwa mbace.” Inzya mbanji bakaitidwe kuzwa kucisi ca Israyeli kuti babe banabwiinga ba Kristo, pele mbasyoonto buyo bana Israyeli bakumubili bakasalwa. Bunji bwabeenzu ibali 144,000 balo batambula bulumbu bwakujulu bajanika kutaba bana Israyeli. Matayo 22:1-14; Kulonga 19:1-6; Ciyubunuzyo 14:1-3.
▪ Mbaani bakatambwa kusaanguna kupobwe lyabwiinga, alimwi ndilili nobakatambwa?
▪ Ino kwiitwa kwakusaanguna kuunka lili kuli baabo batambidwe, alimwi mbaani bazike batumwa kucita boobo?
▪ Ino kwiitwa kwabili kwakacitwa lili, alimwi mbaani batambwa kuzwa waawo?
▪ Mbaani baimininwaa muntu uutakwe cikobela cabwiinga?
▪ Ino mbaani banji baitwa pele basyoonto basalwa?