Cibalo 112
Ipobwe lya Kwiindilila Lyamamanino lya Jesu Lyasikaafwaafwi
IBWABILI, mu Nisani 11 mbobuyaabusika kumamanino, Jesu wamanizya kuyiisya baapostolo a Cilundu ca Elaioni. Elo bwali buzuba bupakesye alimwi buminya kaka! Lino ambweni kapiluka ku Betaniya kuyakoona, waambila baapostolo bakwe ategwa: “Mulizi kuti, kwainda mazuba obile, kuzoosika ipobwe lya-Pasika, lino Mwana a-Muntu uzooabwa kuti abambulwe [acisamu, NW].”
Kulibonya kuti ibuzuba bwatobela muli Bwatatu, mu Nisani 12, Jesu wabumana buyo kaumuumu kalyookezya abaapostolo bakwe. Ibuzuba bwainda wakasinsa basololi bacikombelo caantangalala elyo waziba kuti balamuyandaula kuti bamujaye. Aboobo muli Bwatatu talibonyi pe caantangalala nkaambo tayandi kuti cimwi cintu cinyonganye kusekelela kwakwe kwapobwe lya Kwiindilila abaapostolo bakwe mangolezya aatobela.
Aciindi awa, ibapaizi basilutwe alimwi abapati babantu babungana mubetekelo lyamupaizi mupati Kayafa. Kaicibaciside myoyo akusinsa nkwaakabasinsa Jesu buzuba bwainda, bakanza kuti bamujate kwiinda mukumweena akumujaya. Pele bazumanana kwaamba kuti: “Kutakacitilwi mupobwe, nkaambo inga kulaba lupyopyongano akati kabantu.” Bayoowa bantu balo bamuyanda Jesu.
Ibasololi bacikombelo kabacivwiya kuti bajaye Jesu, batambula mweenzu. Icabakankamika ncakuti ngumwi wabaapostolo ba Jesu, Judase Iskariote, walo Saatani ngwaasyanga muzeezo wakwaaba Mwami wakwe! Elo bakkomana kaka Judase naabuzya kuti: “Ino ncinzi ncimuyanda kundipa kuti mwaabe kulindinywe?” Icakukondwa bazumina kumupa mali aansiliva aali 30, imweelwe uulwa muzike kweelana a Mulawo wa Musa. Lino kuzwa ciindi eci Judase watalika kuyandaula ciindi ceelede cakumwaaba Jesu kakutakwe banamaleya munsi-munsi.
Ibuzuba bwa Nisani 13 bwatalika kumabbililo aazuba muli Bwatatu. Jesu wakasika kuzwa ku Jeriko muli Bwasanu elyo obu mbusiku bwacisambomwi alimwi bwamamanino mbwatikkale mu Betaniya. Ibuzuba butobela muli Bwane, ikulibambila kwamamanino kwapobwe lya Kwiindilila kulayandika kucitwa lyalo lititalike kumabbililo aazuba. Eci nceciindi mwanaa mbelele wapobwe lya Kwiindilila nayelede kujayigwa akuyokwa buumbulu. Ino nkuli nkobatilicitile pobwe, alimwi nguni uuti cite bubambe obu?
Jesu taabapa malailile aali boobu, ambweni ukasya kuti Judase ataambili bapaizi basilutwe cakuti bamujate Jesu ciindi capobwe lya Kwiindilila. Pele lino, ambweni ciindi cakumazuba muli Bwane, Jesu watuma Petro a Johane kuzwa ku Betaniya ulaamba: “Kamuya mukatubambile Pasika, tulye.”
Babuzya ategwa: “Ino uyanda kuti tukabambile kuli?”
Jesu wapandulula ategwa: “Mwanjila mumunzi, muyooswaana amuntu uuyumwide nongo yamaanzi, mumucilile muŋanda mwati kanjile. Mukamwaambile mukamwini ŋanda kuti, Mufundisi wateeti kulinduwe, Ino njiili ŋanda mwenti lide Pasika abasikwiiya bangu? Mpoonya uyoomutondezya ŋanda mpati yamujulu, iibambidwe kabotu, mukalulamikile mumo omo.”
Kakunyina kudooneka mukamwini ŋanda ngusikwiiya wa Jesu walo ambweni uulangila kulomba kwa Jesu kuti abelesye ŋanda yakwe aciindi eci caalubazu. Munzila ili yoonse, ciindi Petro a Johane nobasika ku Jerusalemu, bajana zyoonse zili mbubwena mbwaasinsima Jesu. Aboobo aba bobile babona kuti mwanaa mbelele wabambwa alimwi abubambe boonse bumwi bwacitwa bwakulanganya basikulya pobwe lya Kwiindilila ibali 13, Jesu abaapostolo bakwe bali 12. Matayo 26:1-5, 14-19; Marko 14:1, 2, 10-16; Luka 22:1-13; Kulonga 21:32.
▪ Ncinzi ncacita Jesu muli Bwatatu, alimwi nkaambo nzi?
▪ Muswaangano nzi wacitwa kuŋanda yamupaizi mupati, alimwi nkaambo nzi Judase ncaabaswayila basololi bacikombelo?
▪ Mbaani Jesu mbaatuma ku Jerusalemu muli Bwane, alimwi baya kukutyani?
▪ Ino aba batumwa bajana nzi calo alimwi ciyubulula nguzu zya Jesu zyamaleele?