Cibalo 113
Ikulicesya Kupobwe lya Kwiindilila Lyamamanino
PETRO a Johane basika kale mu Jerusalemu mbubwena mbubalaililwaa Jesu kuti babambe-bambe zyapobwe lya Kwiindilila. Jesu antoomwe abaapostolo bamwi ibali kkumi basika kumazuba. Izuba lili kumabbililo lino, Jesu abeenzinyina nobaselemuka kuzwa a Cilundu ca Elaioni. Eci nciindi camamanino kuli Jesu icakulanga munzi kuzwa acilundu eci kusikila alimwi ciindi aakubusigwa.
Kano kaindi Jesu ankamu yakwe basika mumunzi akululama kuŋanda nkobaticitile pobwe lya Kwiindilila. Batanta muŋanda yamujulu kwalo nkubajana kuti bubambe boonse bwacitwa kale bwakusekelela pobwe lya Kwiindilila balikke. Jesu walikucilangila kapati ciindi eci mbubwenya mbwaamba ategwa: “Ncobeni ndayandisisya kulya anywebo Pasika eli, nkentanapenga.”
Mbuli cilengwa, inkomeki zyone zyawaini zilanyugwa abasipobwe lya Kwiindilila. Naamana kutambula nkomeki iilibonya kuti njatatu, Jesu walumba akwaamba kuti: “Amutole eci, musiilane. Nkaambo ndamwaambila kuti, Nsikooyoonywa limbi mucelo wamusaansa mane bukasike Bwami bwa-Leza.”
Mpoonya kabacilya, Jesu wanyamuka, wabikka cikobela cakwe ambali, wabweza cakulipukutya akubikka maanzi mumutiba. Icilengwa ncakuti simeenzu weelede kubona kuti zituta zyamweenzu zyasanzigwa. Pele akaambo kakuti aciindi awa kunyina simeenzu, Jesu walanganya mulimo oyu. Kufwumbwa umwi wabaapostolo nocamubeda coolwe icakucita obo; pele kulibonya kuti akaambo kakuti kucili kuzundana kumwi akati kabo, kunyina wacita obo. Lino bausa Jesu naatalika kusanzya zituta zyabo.
Lino Jesu naasika kuli Petro, wakaka ulaamba: “Tokoosanzya matende aangu noliba lili, pe, pe.”
Jesu ulaamba: “Ndatakusanzya, tokooswaana amebo.”
Petro waingula ategwa: “Omwami, ino kutabi matende alo, ndisanzya kumaanza akumutwe.”
Jesu waingula ategwa: “Oyo uwasamba kale tabuli pele kumatende alo, kwalo ulisalalide mubili woonse. Anywebo mwasalala, pele tamuli nyoonse.” Waamba boobu nkaambo ulizi kuti Judase Iskariote ukanza kumwaaba.
Jesu naamana kusanzya zituta zyaboonse bali 12 kubikkilizya azyasikumwaaba, Judase, wasama cikobela cakwe wakkala alimwi kutafule. Mpoonya wabuzya ategwa: “Sena mulizi ncendamucitila? Mundyaamba kuti, Mufundisi, akuti Mwami. Mwaamba kabotu, nkaambo mbwebede. Eno ndanooli Mwami a-Mufundisi nendasanzya matende aanu, anywebo mulyeelede kusanzyanya matende aanu. Nkaambo ndamupa citondezyo, kuti anywebo mucite mbuli mbwendamucitila. Ncobeni ndamwaambila kasimpe, Muzike taindi simalelaakwe, awalo uutumwa taindi uwakamutuma. Mwanoozizi zintu ezi, muli acoolwe mwanoozicita.”
Nciiyo cibotu kaka eci camulimo wakulicesya! Ibaapostolo tabeelede kunooyanda busena butaanzi, kabayeeya kuti mbalupati-pati cakuti bamwi banoobabelekela lyoonse. Beelede kutobela citondezyo ca Jesu. Eci tacili citondezyo cacilengwa cakusanzya matende. Peepe, calo ncakubeleka cabusungu kakutakwe kusala kufwumbwa noutalomenye buti mulimo naa kutakondelezya. Matayo 26:20, 21; Marko 14:17, 18; Luka 22:14-18; 7:44; Johane 13:1-17.
▪ Ncinzi ceenzu kunzila Jesu njalanga Jerusalemu ciindi naanjila mumunzi kuti asekelele pobwe lya Kwiindilila?
▪ Kabacili kupobwe lya Kwiindilila, kulibonya kuti ninkomeki nzi Jesu njaapa baapostolo bali 12 kuti basiilane naamana kulumba?
▪ Ncilengwa nzi cakusamausya icakali kucitilwa beenzu ciindi Jesu naakali anyika, alimwi nkaambo nzi ncocatakacitwa kupobwe lya Kwiindilila lyakacita Jesu abaapostolo bakwe?
▪ Ino Jesu wakaucitila nzi mulimo uutalomenye wakusanzya zituta zyabaapostolo bakwe?