Kuyiisya Ciiyo Cakulicesya Ku Pobwe Lyakwiindilila Lyamamanino

Naabatuma Jesu, Petro a Johane baunka akusika mu Jerusalemu kuyoolibambila Pobwe Lyakwiindilila. Muciindi Jesu abaapostolo bambi bali kkumi abalo banyamuka kuunka nkuko. Lino nkuumazuba, izuba liyamukubbila kumbo eelyo Jesu ankamu yakwe nobali mukuselemuka Cilundu ca Maolifa. Eeci nciindi camamanino Jesu ncabona Jerusalemu imasyikati kali abusena aano kusikila mane aakubusyigwa.

Mukaindi Jesu ankamu yakwe basika mumunzi wa Jerusalemu akuunka kuŋanda nkobayoolida Pobwe Lyakwiindilila. Batanta matantilo aaŋanda akunjila muŋanda mpati yamujulu. Oomo bajana zintu zyoonse zilibambidwe kuti balye cakulya kabali balikke. Jesu wali kucilangila ciindi eeci, nkaambo waamba kuti: “Ndali kuyandisya kapati kulya Pobwe Lyakwiindilila eeli andinywe nenditanapenga.”—Luka 22:15.

Myaka minji kapati yainda musyule oomu, kwakatalisyigwa cilengwa cakwiinzyaanya nkapu zili mbozibede zyawaini ku Pobwe Lyakwiindilila. Lino, naamana kutambula nkapu imwi, Jesu walumba akwaamba kuti: “Umwi aumwi wanu atambule nkapu eeyi akunywa kulinjiyo, nkaambo ndimwaambila kuti, kuzwa lino tandikanywi limbi cakunywa cizwa kumusaansa kusikila bukasike Bwami bwa Leza.” (Luka 22:17, 18) Kweelede kuti casalala kuti lufwu lwakwe lino lulaafwaafwi.

Aciindi cimwi kabacilya Pobwe Lyakwiindilila, kwacitika cintu cimwi cigambya. Jesu wanyamuka, wasamununa zisani zyakwe zyaatala akubweza cisani cakulipukutya. Mpoonya wabikka meenda mumutiba uuli munsi-munsi. Kweelana acilengwa, simeenzu nguweelede kubona kuti maulu aabeenzu asanzyigwa, ambweni kusanzyigwa amubelesi umwi. (Luka 7:44) Pele aciindi eeci, kunyina simeenzu uuliko, aboobo Jesu waucita mulimo ooyu. Uuli woonse akati kabaapostolo wali kukonzya kubelesya coolwe eeci kucita boobo, pele kunyina naba omwe wacita boobo. Sena nkaambo kakuti bacikazyanya akati kabo? Tacigambyi kuti balisenda kuti Jesu nguuyanda kubasanzya maulu.

Jesu naasika kuli Petro, Petro wakaka ulaamba: “Kunyina notiisanzye maulu aangu pe.” Jesu wamwaambila kuti: “Kuti nditakusanzyi, nkokuti tojisi lubazu andime.” Petro wamwiingula cabusungu ulaamba: “O Mwami, utandisanzyi buyo kumaulu, pele kondisanzya akumaanza alimwi akumutwe.” Aboobo kweelede kuti Petro wagambwa kapati Jesu naamwiingula kuti: “Kufwumbwa ooyo wasamba kale amubili uyandika kusanzyigwa buyo kumaulu, nkaambo ulisalede mubili woonse. Alimwi nywebo nobaalumi mulisalede, pele kutali nyoonse.”—Johane 13:8-10.

Jesu wasanzya maulu oonse aabali 12, kubikkilizya amaulu aa Judasi Isikariote. Naamana kusama zisani zyakwe zyaatala akuyakukkala kutebulu alimwi, Jesu wabuzya kuti: “Sena mwacizyiba ncondamucitila? Mundiita kuti ‘Mwiiyi’ akuti ‘Mwami,’ alimwi muliluzi nkaambo mbondibede oobo. Aboobo, ikuti mebo nde Mwami alimwi nde Mwiiyi ndasanzya maulu aanu, nkokuti anywebo mweelede kusanzyanya kumaulu. Nkaambo ndamupa citondezyo, kuti mbubonya mbondamucitila, kamucita mbubonya andinywe. Ncobeni ndimwaambila masimpe kuti, muzike tali mupati kwiinda simalelaakwe, awalo sikutumwa tali mupati kwiinda yooyo wakamutuma. Ikuti kamuzizyi zintu eezyi, munookkomene ikuti naa kamuzicita.”—Johane 13:12-17.

Eelo kaka taciliboteli ciiyo eeci ncaayiisya icakucita mulimo cakulicesya! Basikutobela Jesu tabeelede kuyanda kuba mubusena bwakusaanguna, kabayeeya kuti balo balayandika kapati alimwi beelede kubelekelwa. Muciindi caboobo, beelede kutobela cikozyanyo ca Jesu, ikutali kwiinda mukucita cilengwa cakusanzyanya kumaulu, pele kwiinda mukulisungula kubeleka cakulicesya alimwi cakutasalaula.