Ciiyo 13
Mbuti Mbomunga Mwacijana Cikombelo Cini-Cini?
Sena zyoonse zikombelo zilamubotela Leza, naa ncicomwe buyo? (1)
Nkaambo nzi ncokuli zikombelo zinji boobu izilitaminina kuba zya Bunakristo? (2)
Mbuti mbomunga mwabaziba Banakristo beni-beni? (3-7)
1. Jesu wakatalika cikombelo comwe buyo ca Bunakristo bwini-bwini. Aboobo sunu kweelede kakuli buyo mbunga yomwe, naa nkamu, yabakombi ba Jehova Leza beni-beni. (Johane 4:23, 24; Ba-Efeso 4:4, 5) Ibbaibbele liyiisya kuti mbasyoonto buyo bantu ibali mukazila kaniini katola kubuumi.—Matayo 7:13, 14.
2. Ibbaibbele lyakaambilizya kuti baakumana kufwa bamaapostolo, buce-buce kuyoonjila ziyiisyo zitaluzi alimwi amicito iitali yabunakristo mumbungano ya Bunakristo. Bantu bakali kuzooyunga basyomi kuti batobele mbabo muciindi ca Kristo. (Matayo 7:15, 21-23; Incito 20:29, 30) Ncencico ncotubonena zikombelo zinji ziindene-indene izilitaminina kuba zya Bunakristo. Mbuti mbotunga twabaziba Banakristo beni-beni?
3. Icitondezyo cipati ca Banakristo beni-beni ncakuti balaa luyando akati kabo. (Johane 13:34, 35) Tabayiisigwi kuyeeya kuti balabainda bantu bamisyobo imbi naa mubala umbi walukanda. Alimwi tabayiisigwi kusulaika bantu bakuzisi zimbi. (Incito 10:34, 35) Aboobo tabatoli lubazu munkondo pe. Banakristo beni-beni beendelezyanya mbuli bakwabo abacizi.—1 Johane 4:20, 21.
4. Acimbi citondezyo cacikombelo cini-cini nkuti bantu baco balalilemeka loko Bbaibbele. Balalizumina kuti ndi Jwi lya Leza akusyoma ncolyaamba. (Johane 17:17; 2 Timoteo 3:16, 17) Ijwi lya Leza balibona kuba cintu cipati kwiinda mizeezo naa ziyanza zyabantu. (Matayo 15:1-3, 7-9) Balasoleka kutobela Bbaibbele mubuumi bwabo buzubaa buzuba. Aboobo tabakambauki cintu akucita ciimpene.—Tito 1:15, 16.
5. Alimwi cikombelo cini-cini ceelede kulemeka zina lya Leza. (Matayo 6:9) Jesu wakalizibya kubantu bambi zina lya Leza ilyakuti Jehova. Banakristo beni-beni beelede kucita mbweena. (Johane 17:6, 26; Ba-Roma 10:13, 14) Mbantu nzi nkomuzwa ibaambila bantu bambi zina lya Leza?
6. Banakristo beni-beni beelede kukambauka Bwami bwa Leza. Jesu walo mbwaakacita. Lyoonse wakaamba zya Bwami. (Luka 8:1) Wakalailila basiciiya bakwe kukambauka mulumbe oyu nguwena nyika yoonse mbwiizulwa. (Matayo 24:14; 28:19, 20) Banakristo beni-beni balasyoma kuti Bwami bwa Leza bwelikke mbobuyooletela nyika eyi luumuno lwini-lwini akuliiba.—Intembauzyo 146:3-5.
7. Basiciiya ba Jesu beelede kutaba banyika eeyi mbyaabi. (Johane 17:16) Tabatoli lubazu mutwaambo twanyika eyi itwamapolitikisi amazwanga aabuleya. Balatantamuka bukkale, micito, alimwi amizeezo iifwini kuba munyika. (Jakobo 1:27; 4:4) Sena mulakonzya kuziba imwi mbunga yabukombi nkomuzwa iilaa zitondezyo eezi zya Bunakristo bwini-bwini?
[Zifwanikiso izili apeeji 26, 27]
Banakristo beni-beni balayandana, balalilemeka Bbaibbele, alimwi balabukambauka Bwami bwa Leza