Bulangizi Bwini-Bwini
“Ikuzwa kuciindi muntu naazyalwa ulalangilwa kufwa kufwumbwa ciindi; alimwi cakutadooneka ciyoocitika.”—ARNOLD TOYNBEE, SIKWIIYA ZYAKAINDI MUNA BRITAIN.
1. Ncinzi calikumucitikila muntu, alimwi mibuzyo nzi iibuka?
NGUNI uunga waakazya makani aya aamasimpe aalembedwe atalaawa? Lyoonse muntu lwalikumucitikila lufwu. Alimwi tulabulilwa maanu kaka ciindi muntu ngotuyanda nafwa! Mpoonya oku kusowekelwa kuboneka kuti kunyina bumbi mbokunga kwacitwa. Sena cilakonzeka kuti inga twaakuswaangana alimwi abayandwa besu bafwide? Ino mbulangizi nzi mbolijisi Bbaibbele kujatikizya bafwide? Amulange cibalo citobela.
‘Mulongweesu Wafwa’
2-5. (a) Iciindi mulongwaakwe Lazaro naakafwa, muunzila nzi Jesu mwaakatondezya luyandisisyo alimwi akukonzya kumubusya? (b) Kunze lyakubusya Lazaro, ncinzi cimbi ncaakabeleka maleele aya aakubusya?
2 Mmwakali mumwaka wa 32 C.E. Lazaro abacizi bakwe ba Marta a Mariya bakali kukkala mukanzi ka Betaniya ikulampa makkilomita otatwe kuzwa ku Jerusalemu. Bakali balongwe ba Jesu. Ibuzuba bumwi Lazaro wakaciswa kapati. Icakufwambaana, ibacizi bakwe ibakabikkilide kapati maanu bakatuma mulomo kuli Jesu walo wakali kutalaa Mulonga wa Jordano. Jesu wakali kumuyanda kapati Lazaro abacizi bakwe aboobo muciindi wakasunduka kuya ku Betaniya. Munzila, Jesu wakaambila basikwiiya bakwe kuti: “Mulongweesu Lazaro uloona, pele ndainka mebo nkamusinsimune.” Akaambo kakuti basikwiiya teebakafwambaana kuziba ncokakali kwaamba kaambo aka, Jesu wakabapandulwida kuti: “Lazaro wazaya.”—Johane 11:1-15.
3 Mbwaakamvwida buyo Marta kuti Jesu uboola ku Betaniya, wakazuza kuyoomucinga. Akaambo kakuti wakeetezyegwa kapati Jesu, wakamusyomezya kuti: “Mwanaakwanu ulabuka.” Marta wakaingula ategwa: “Ndilizi kuti uyoobuka mubuzuba bwakubuka bwakumamanino.” Mpoonya Jesu wakamwaambila kuti: “Ndime kubuka abuumi. Oyo uusyoma ndime, naanooli wakafwa, unooli muumi.”—Johane 11:20-25.
4 Mpoonya Jesu wakaunka kucuumbwe elyo wakalailila kuti ibbwe lyakajalide amulyango ligwisigwe. Naakamana kukomba ajwi pati wakalailila kuti: “Lazaro, kozwa omo.” Elyo meso oonse kaalangide kucuumbwe Lazaro wakazwa ncobeni. Jesu wakamubusya Lazaro—wakapilusya buumi kumuntu wakafwide kwamazuba one!—Johane 11:38-44.
5 Marta wakalijisi kale lusyomo mucisyomezyo cabubuke. (Johane 5:28, 29; 11:23, 24) Imaleele aakupilusigwa kwa Lazaro kubuumi akagwasya kuyumya lusyomo lwakwe alimwi akupa kuti bamwi babe alusyomo. (Johane 11:45) Pele ino bbala ‘lyakubuka’ lyaamba nzi?
“Uyoobuka”
6. Ino bbala ‘lyakubuka’ lyaamba nzi?
6 Ibbala ‘lyakubuka’ lyakasandululwa kubbala lya Cigiliki lyakuti a·naʹsta·sis, lyalo lyaamba “kunyamuka alimwi.” Ibasanduluzi ba Cigiliki ibana Hebrayo ibbala lya a·naʹsta·sis balisandulula amabala aa Cihebrayo aakuti techi·yathʹ ham·me·thimʹ alo aamba “kubuka kwabafwu.”a Aboobo kubuka cijatikizya kubusya muntu kuzwa kuciimo calufwu cakubula buumi—ikutalisya buumi bwamuntu alimwi.
7. Nkaambo nzi kubusya muntu amuntu ncocitakamukatazyi Jehova Leza a Jesu Kristo?
7 Jehova Leza mbwajisi busongo buteeli alimwi mbwayeeya cakulondola, ulakonzya kubusya muntu kakunyinaa buyumuyumu. Ikuyeeya bukkale bwabafwu—izilengwa zyabo, ibuumi bwabo bwamusyule alimwi azimwi-zimwi zijatikizya mbabo—talili penzi kuli nguwe pe. (Jobu 12:13; amweezyanisye Isaya 40:26.) Alimwi Jehova Nentalisyo yabuumi. Aboobo ncuuba-uba ikubusya muntu nguwenya, ikumupa ciimo cakwe nciconya mumubili mupya. Kunze lyaboobo, mbubwenya mbuli mbocitondezya cakacitika kuli Lazaro, Jesu Kristo uliyandide alimwi ulakonzya kubusya bafwu.—Amweezyanisye Luka 7:11-17; 8:40-56.
8, 9. (a) Nkaambo nzi kubusigwa amuzeezo wakutafwika kwabuumi ncoziteendalani? (b) Ninzila nzi iikonzya kumana lufwu?
8 Nokuba boobo, ikuyiisya kwa Magwalo kujatikizya bubuke takweendelani pe anjiisyo yakutafwika kwabuumi. Ikuti naa kuli cintu cuumi citafwi muntu afwa, kunyina uunga wayandika kubusigwa. Masimpe, Marta kunyina naakatondezya kuti ulaa muzeezo wakuti kuli cintu cimwi citafwiki icizumanana kupona kubusena bumwi lwainda lufwu. Kunyina naakali kusyoma kuti Lazaro wakaluunkide kale kubusena bumwi bwamuuya kuti akazumanane kupona. Pele wakatondezya lusyomo mumakanze aa Leza aakumana mapenzi aaletwaa lufwu. Wakaamba kuti: “Ndilizi kuti uyoobuka mubuzuba bwakubuka bwakumamanino.” (Johane 11:23, 24) Alimwi awalo Lazaro kunyina ncaakaamba pe kujatikizya buumi buzumanana. Tanaakajisi zyakuluula pe.
9 Icakutadooneka, kweelanaa Bbaibbele, ibuumi bulafwa alimwi inzila yalikke yakumana lufwu mbubuke. Pele zyuulu zyatuulunzuma twabantu bafwa kuzwa ciindi naakali anyika Adamu muntu wakusaanguna. Aboobo, ino mbaani bayoobusigwa alimwi ikuli?
‘Boonse Bali Muzyuumbwe’
10. Ncisyomezyo nzi ncaakabamba Jesu kujatikizya baabo bali muzyuumbwe?
10 Jesu Kristo wakati: “Ciindi ciyoosika ncobati kamvwe ijwi lyakwe [Jesu] boonse abali muzyuumbwe, bayoozwa mpoonya.” (Johane 5:28, 29) Ee, Jesu Kristo wakasyomezya kuti boonse mbayeeya Jehova bayoobusigwa. Izyuulu zyatuulunzuma twabantu bapona akufwa. Ino mbaani akati kabo mbayeeya Leza ibalindila kubusigwa?
11. Mbaani bayoobusigwa?
11 Aabo bakali kusoleka kutobela nzila yabululami kabali babelesi ba Jehova bayoobusigwa. Pele tuulunzuma tuli mbotubede twabantu bambi, bakafwa kabatanatondezya naa inga bazitobela zyeelelo zya Leza iziluleme. Ambweni teebakaziziba zyeelelo zya Jehova naa bakabulilwa ciindi cakuti babambulule awo aayandika. Abalo aba balayeeyegwa a Leza aboobo bayoobusigwa nkaambo Bbaibbele lilasyomezya kuti: “Kulaba kubuka kwabafu, akwabaluleme akwabataluleme.”—Incito 24:15.
12. (a) Ncilengaano nzi ncaakatambula mwaapostolo Johane kujatikizya bubuke? (b) Ncinzi ‘cisowelwa muziba lyamulilo,’ alimwi aka kaambo kaamba nzi?
12 Imwaapostolo Johane wakabona cilengaano cibotu kapati icabantu babusidwe kabaimvwi kumbele lyacuuno cabwami ca Leza. Kapandulula ncico wakalemba kuti: “Lwizi lwakabweedezya bafu bali mulindulo, alwalo lufu acikalilo cabafu zyoonse zyakabweedezya bafu bali mulinzizyo. Lino bakabetekwa muntu umwi aumwi mbuli milimo yakwe. Mpoonya awo lufu acikalilo cabafu zyoonse zyakasowelwa muziba lyamulilo.” (Ciyubunuzyo 20:12-14) Amuyeeye buyo ncocaamba eco! Ibafwide boonse mbayeeyede Leza bayooangululwa kuzwa kucikalilo cabafwu naa Mukabanda, icuumbwe imuya bantu boonse. (Intembauzyo 16:10; Incito 2:31) Mpoonya “lufu acikalilo cabafu” ziyoosowelwa mubusena bwiitwa kuti “ziba lyamulilo” iliiminina kunyonyooka kutamani. Icuumbwe imuya bantu boonse tacicinooliwo pe.
Ikubusilwa Kuli?
13. Nkaambo nzi Leza ncaakacibambila kuti bamwi bakabusilwe kubuumi bwakujulu, alimwi mibili yamusyobo nzi njayoobapa Jehova?
13 Imweelwe musyoonto wabaalumi abanakazi uyoobusigwa kuti bakabe abuumi bwakujulu. Bayoolela antoomwe a Kristo kabali bami abapaizi alimwi bayootola lubazu mukumana mapenzi aaletwaa lufwu oolo bantu ndobakakona kumuntu wakusaanguna Adamu. (Ba-Roma 5:12; Ciyubunuzyo 5:9, 10) Ikweelana a Bbaibbele, bali buyo 144,000 alimwi balasalwa kuzwa akati kabasikutobela Kristo, ikutalikila kubaapostolo basyomeka. (Luka 22:28-30; Johane 14:2, 3; Ciyubunuzyo 7:4; 14:1, 3) Jehova uyoopa umwi aumwi wabaabo babusidwe imubili wamuuya, kutegwa bakakonzye kukkala kujulu.—1 Ba-Korinto 15:35, 38, 42-45; 1 Pita 3:18, BT.
14, 15. (a) Ino bunji bwabaabo bafwide bayoobusigwa kubuumi bwamusyobo nzi? (b) Nzilongezyo nzi nzyobayoobaanzizyo bantu bamvwa?
14 Nokuba boobo, ibunji bwabaabo bafwide bayoobusigwa kuti babe abuumi anyika. (Intembauzyo 37:29; Matayo 6:10) Ninyika yamusyobo nzi? Sunu inyika izwide kulwana, kujayana, alimwi abusofwaazi. Masimpe ikuti naa bafwide babusilwa munyika iili boobu, ikukkomana kwabo inga kakuli buyo kwakaindi kaniini. Pele Mulengi wasyomezya kuti lino-lino uyoomanizya nyika eyi iiliko lino yalo yeendelezyegwaa Saatani. (Tusimpi 2:21, 22; Daniele 2:44) Mpoonya ‘inyika mpya’ yabantu baluleme—iyooba. (2 Petro 3:13) Kuciindi eco “takukooyooba naba omwe akati kabantu banyika uuamba kuti, Ndaciswa.” (Isaya 33:24) Nokuba kupenga akaambo kalufwu kuyoomanina limwi nkaambo Leza “uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.”—Ciyubunuzyo 21:4.
15 Munyika ya Leza mpya iisyomezyedwe, ibabombe myoyo “bayookondwa muluumuno lunji.” (Intembauzyo 37:11) Imfwulumende yakujulu ya Kristo Jesu abasikulelanyina iba 144,000 iyoopilusya bantu baluleme kuciimo cakulondoka calo bazyali besu bakusaanguna ba Adamu a Eva ncobakasowa. Ibayoobikkilizigwa akati kabantu bayookkala anyika banooli baabo babusidwe.—Luka 23:42, 43.
16-18. Nkukkomana kuli buti nkobuyooletela mikwasyi bubuke?
16 Ibbaibbele lilatondezya lukkomano luyooba kumikwasyi akaambo kabubuke. Amuyeeye lukkomano ndwaakabaa ndulo mukamufwu muna Naini ciindi Jesu naakaimika basidilwe akubusya mwanaakwe alikke buyo! (Luka 7:11-17) Kumbele, kumbali aa Lwizi lwa Galilaya ciindi Jesu naakabusya kana kasimbi kamyaka iili 12, ibazyali bankako “bakakankamana lukankamano lupati.”—Marko 5:21-24, 35-42; alimwi amubone a 1 Bami 17:17-24; 2 Bami 4:32-37.
17 Kujatikizya tuulunzuma tuli mbotubede twabantu lino balede mulufwu, ibubuke buyoobaletela buumi munyika mpya yaluumuno. Amuyeeye buyo bulangizi bukondelezya ibuliko kuli Tommy alimwi asimakwebo ibaambwa mucibeela cakusaanguna cabroshuwa eyi! Tommy aakubuka mu Paradaiso anyika, unooli Tommy nguwenya ngubakazi banyina—pele unoonyina malwazi aali woonse. Bayookonzya kumujata, kumulela akumuyanda. Mbubwenya buyo akuli simakwebo waku India, muciindi cakucegwa mumulongo wakuzyalululwa lyoonse, ulaabulangizi bubotu bwakujuka meso munyika ya Leza mpya akubona bana bakwe.
18 Ikuziba masimpe kujatikizya buumi, kujatikizya cicitika kulindiswe twafwa alimwi akujatikizya bulangizi bwabubuke kulakonzya kubajatikizya kapati abo bapona lino. Atubone naa muunzila nzi.
Bupanduluzi buyungizidwe
a Nokuba kuti ibbala ‘lyakubuka’ talijaniki mu Magwalo aa Cihebrayo, ibulangizi bwabubuke bulalibonya kabotu-kabotu kubbuku lya Jobu 14:13, Daniele 12:13, alimwi alya Hosea 13:14 (NW).
[Cifwanikiso icili apeeji 26]
Ibubuke buyooleta lukkomano lutamani