Imasimpe Kujatikizya Buumi Alayandika Kapati Kuziba
“Muyooziba bwini, abwalo bwini buyoomunununa.”—JOHANE 8:32.
1. Nkaambo nzi ncociyandika kulanga-langa lusyomo lwesu kujatikizya buumi alufwu?
IZINTU zisyomwa kujatikizya lufwu a Buumi buzumanana lwainda lufwu kanjikanji ziboola akaambo kabukombi mbwaakomena ambubo muntu naa zilengwa. Mbuli mbutwabona kale, kuli kusyoma kuti cintu cuumi citambula bulumbu bwamamanino ilyalo nociinda mukuzyalululwa kunji, akumbi kwakuti ibuumi bwakuciindi cimwi mbobutondezya iciyoocitika kumuntu oyu kumamanino. Akaambo kaboobo, muntu umwi ulakonzya kubaa lusyomo lwakuyakusangana abuumi busumpukide aakufwa pele umwi usyoma kuya kujana Nirvana alimwi umwi usyoma kuyakujana bulumbu bwabuumi bwakujulu. Ino ono masimpe eni ngali? Mbwaanga ciimo cesu, imicito alimwi akusala kwesu zilakonzya kuyungwaa lusyomo ndotujisi, sena tatweelede kubikkila maanu kuti tujane bwiinguzi kumubuzyo oyo?
2, 3. (a) Nkaambo nzi ncotunga twasyoma ncolyaamba Bbaibbele kujatikizya buumi? (b) Ino masimpe eni ngali kujatikizya buumi mbuli mbokutondezyedwe mu Bbaibbele?
2 Ibbaibbele, ibbuku litaanzi munyika, lilabupandulula bukkale bwamuntu kuzwa kuciindi cakulengwa kwamuntu wakusaanguna. Iziyiisyo zyandilyo tazisangene pe abusongo alimwi azilengwa zyabantu. Ibbaibbele lilaamba masimpe kujatikizya buumi: Inywebo ndendinywe baumi, ibafwide tabaciwo pe alimwi abo mbayeeya Leza bayoobusigwa kuciindi cakwe mwini. Ino kuziba makani aya inga caamba nzi kulindinywe?
3 Jesu Kristo wakaambila basikumutobela kuti: “Muyooziba bwini, abwalo bwini buyoomunununa.” (Johane 8:32) Ee, ibwini bulaangulula. Pele ino masimpe kujatikizya buumi ayootunununa kuzwa kunzi?
Lwaanguluko Kubuyoofwu a Kukutyompokelwa
4, 5. (a) Mbuyoofwu nzi bucesyegwa-cesyegwaa kasimpe kujatikizya buumi? (b) Ino bulangizi bwabubuke bwakamukulwaizya buti mukubusi umwi nakali kuciswa calufwu?
4 The World Book Encyclopedia yaamba kuti, “Ibantu banji balaluyoowa lufwu alimwi balasola kuzibinganya mizeezo kujatikizya ndulo. Umwi sikwiiya zyakaindi waamba kuti, “Ibbala lya ‘lufwu’ kuligama mane talicaambwaambwi pe kumanyika aa Kumbo.” Alimwi mumasena amwi imabala mauba-uba mbuli aakuti, ‘kutusiya’ naa ‘kuzimina’ ngaabelesyegwa kanjikanji ikupandulula kufwa kwamuntu. Atwaambe, ikuyoowa lufwu munzila eyi, nkuyoowa cintu citazibidwe nkaambo kubantu banji ilufwu maseseke. Ikuziba masimpe kujatikizya cicitika twafwa kulakonzya kucesya kuyoowa oku.
5 Mucikozyanyo, amulange mizeezo yaa Michaelyn wamyaka iili 15 yakuzyalwa. Wakali kuciswa bulwazi bwa leukemia calufwu. Ba Paula, banyina musimbi oyu balayeeya ategwa: “Michaelyn wakaamba kuti wakanyina makani akufwa nkaambo wakalizi kuti lufwu ndwakaindi buyo kasyoonto. Twakali kubandika kapati kujatikizya nyika ya Leza mpya alimwi abaabo boonse bayoobusigwa. Michaelyn wakalaa lusyomo lunji kapati muli Jehova Leza alimwi amububuke—kunyina naakali kudooneka pe.” Ibulangizi bwabubuke bwakaangulula mwana musimbi oyu sicamba kukuyoowa lufwu.
6, 7. Nkutyompokelwa kuli buti nkwaatwaangulula masimpe aajatikizya buumi? Amupe cikozyanyo.
6 Ino masimpe aya akabajatikizya buti bazyali ba Michaelyn? Bausyi musimbi oyu, ba Jeff baamba kuti: Ilufwu lwamwaneesu lwakatucisa kapati. Pele tulasyoma cakumaninina mucisyomezyo ca Jehova cabubuke alimwi tulangila buzuba obo notuyoofwukatila Michaelyn mumaanzeesu alimwi. Elo kuyooba kuswaangana kwamukwasyi alimwi kaka oko!”
7 Ee, imasimpe kujatikizya buumi aangulula muntu kuzwa kukutyompokelwa nkolunga lwaleta lufwu lwamuyandwa wesu. Aino kunyina cinga cakuzwisyila limwi buya kupenga alimwi akuusa nkotumvwa notufwidwa muyandwa. Nokuba boobo, ibulangizi bwabubuke bulakucesya-cesya kulila alimwi apenzi lilauba-uba.
8, 9. Nkubuyoofwu bwamusyobo nzi nkokatwaangulula kasimpe kajatikizya ciimo cabafwide?
8 Akalo kasimpe kamu Magwalo kajatikizya ciimo cabafwide kalatwaangulula kuzwa kukuyoowa bafwide. Akaambo kakuziba masimpe aya, ibanji bakaangilidwe azilengwa zijatikizya bafwide tabaciyoowi kusinganizigwa, malweza, misamu yakulicingilila alimwi tabacisowi mali ikupiilila mizimo yabo ikwiikasya kuti itapiluki kuzyoopenzya bantu bapona. Inzya, mbwaanga bafwide “tabezi cintu niciba comwe” izilengwa zili boobu tazibeleki pe.—Mukambausi 9:5.
9 Ee, ikasimpe kajanwa mu Bbaibbele kajatikizya buumi kalaangulula alimwi kalasyomeka. Pele amulange abumbi bulangizi bulibedelede bwalo mbolimusyomezya Bbaibbele.
[Majwi aakwelelezya sikubala aali apeeji 29]
Ikasimpe kajatikizya buumi kalamwaangulula kuzwa kukuyoowa lufwu, kuyoowa bafwide, kukutyompokelwa akaambo kalufwu lwamuyandwa