Ibulangizi Bulibedelede!
“Naba uli buti muumi uusyoma ndime, takooyoofwa pe.”—JOHANE 11:26.
1. Muubukkale buli buti mobayoobusilwa bantu bali tuulunzuma tuli mbotubede?
ITUULUNZUMA tuli mbotubede twabantu baakubusigwa, tabakabusilwi anyika iinyina bantu pe. (Incito 24:15) Bayoobukila mubusena bubambidwe kabotu alimwi bayoojana kuti babambilwa kale maanda, zyakusama alimwi azyakulya zinji. Ino mbaani bayoobamba zintu zyoonse ezi? Cakutadooneka kunooli bantu banookkala munyika mpya kabutana talika bubuke. Pele ino mbaani abo?
2-4. Mbulangizi nzi bulibedelede mbobalangila abo bapona “kumazuba aakumamanino”?
2 Ikuzuzikizigwa kwabusinsimi bwa Bbaibbele kutondezya kuti tukkede “kumazuba aakumamanino” aabweende obu bwazintu.a (2 Timoteo 3:1) Ino-ino Jehova Leza uyoobweza ntaamu muzintu zicitika sunu akugwisya bubi boonse anyika. (Intembauzyo 37:10, 11; Tusimpi 2:21, 22) Kuciindi eco ncinzi ciyoocitika kuli baabo babelekela Leza cakusyomeka?
3 Jehova takanyonyooni baluleme antoomwe abataluleme. (Intembauzyo 145:20) Tanacitide cintu cili boobo pe alimwi kunyina nayoocicita ciindi aakugwisya bubi boonse anyika. (Amweezyanisye Matalikilo 18:22, 23, 26.) Atwaambe, ibbuku lyamamanino lya Bbaibbele lyaamba “inkamu impati yabantu batabaliki kumuntu naba omwe, bazwa kuzisi zyoonse akumisyobo yoonse akumikowa yoonse akumyaambo yoonse,” ibazwa “kumapenzi ayo mapati.” (Ciyubunuzyo 7:9-14) Ee, inkamu mpati iyoofwutuka mapenzi mapati mwalo nyika mbyaabi iili lino mwiiyoomanina elyo bayoonjila munyika ya Leza mpya. Munyika eyo ibantu bamvwa balakonzya kugwasigwa cakumaninina azipego zya Leza zibotu zyakwaangulula bantu kucibi alufwu. (Ciyubunuzyo 22:1, 2) Aboobo ‘bankamu mpati’ tabakafwi limbi pe. Bulilibedelede kaka bulangizi obu!
4 Sena tulakonzya kubusyoma bulangizi obo bugambya? Cakutadooneka! Jesu Kristo lwakwe wakatondezya kuti kuyooba ciindi ibantu nobanoopona kakunyina kufwa. Katana mubusya buyo mulongwaakwe Lazaro, Jesu wakaambila Marta kuti: “Naba uli buti muumi uusyoma ndime, takooyoofwa pe.”—Johane 11:26.
Anywebo Mulakonzya Kupona Kukabe Kutamani
5, 6. Ikuti kamuyanda kupona kukabe kutamani mu Paradaiso anyika, ncinzi ncomweelede kucita?
5 Sena mulayanda kupona kukabe kutamani mu Paradaiso anyika? Sena mulalombozya kuyoobabona alimwi bayandwa benu? Nkokuti mweelede kubaa luzibo lwini-lwini lwa Leza amakanze akwe. Mumupailo wakwe kuli Leza, Jesu wakaamba kuti: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.”—Johane 17:3.
6 Nkuyanda kwa Leza kuti “bantu boonse bafutulwe akuboola kuluzibo lwakuziba lusinizyo.” (1 Timoteo 2:3, 4) Ecino nceciindi cakuti mwiiye mbomunga mwapona kukabe kutamani mu Paradaiso antoomwe atuulunzuma twabaabo ibali mukucita kuyanda kwa Leza lino. Bakamboni ba Jehova bayookkomana kumugwasya kwiiya zinji kujatikizya Leza azyeelelo zyakwe. Mbuti ino kubonana ambabo ku Ŋanda ya Bwami iilaafwaafwi akulindinywe naa kulembela kukkeyala yaafwaafwi mumulongo uulembedwe apeeji litobela?
Bupanduluzi buyungizidwe
a Amubone Luzibo Lutola Kubuumi Butamani, mapeeji 98-107, lyakamwaigwa aba Watchtower Bible and Tract Society of New York, Inc.
[Cifwanikiso icili apeeji 31]
Iba “nkamu impati” tabakafwi limbi pe