Amulikkomanine Jwi lya Leza
NGUSICOOLWE ooyo ‘uukondelwa mulawo wa Jehova.’ Muntu uuli boobo ulalibala cakuzinzibala Jwi lya Leza “lyoonse masiku asikati.” (Int. 1:1, 2) Sena andinywe mbomulikkomanina oobo? Ino mbuti mbomunga mwalikkomanina kapati Jwi lya Leza?
Amuswiilile Jehova Naambaula
Mutani kubali buyo mabala pe. Amweezyeezye bukkale busiyene-siyene bwazintu nzyomubala. Amweezyeezye majwi aabantu aabo babandaukwa. Nomubala zyaandaano zitaanzi zyamu Bbaibbele, amumumvwe Jehova lwakwe kakanana, kaamba cintu cimwi acimwi, ncaacita kutegwa nyika ibe busena bubotu muntu mpakonzya kukkala. Amuswiilile eelyo naambila Mwanaakwe, uuli Ambali Lyakwe mukulenga kuti, casika lino ciindi cakwaanza bantunsi bakusaanguna. Amweezyeezye zicitika: Adamu a Eva bazanga, Leza wabasinsa, mpoonya wabagusya mu Paradaiso. (Matalikilo zyaandaano 1-3) Amuyoowe kapati akumupa bulemu ciindi nomubala kuti, ijwi lizwa kujulu lyamuzibya Jesu Kristo kuti ngo Mwana a Leza, uuyandika, ooyo wakatumwa a Leza kuzoofwida bantu boonse. (Mt. 3:16, 17) Amweezyeezye buyo mbwaalimvwa mwaapostolo Johane naamvwa Jehova kaamba kuti: “Amubone, ndalengulula zintu zyoonse, zibe zipya.” (Ciy. 21:5) Inzya, ikubala Jwi lya Leza munzila eeyi kulakondelezya kapati!
Amuzumanane kubala makani aakasololelwa amuuya, mpoonya muyooziba kuti Jehova mmuntu uulemekwa kapati alimwi uugambya. Muyooyandisya kuba acilongwe a Muntu ooyu uutuyanda, uutweendelezya calubomba akutugwasya kufwumbwa buyo kuti katucita kuyanda kwakwe cakulibombya alimwi uututondezya mbotukonzya kuzwidilila muzintu zyoonse nzyotucita.—Jos. 1:8; Int. 8:1; Is. 41:10.
Mwanoobala Bbaibbele ciindi aciindi, muyookkomana kapati mbomunooyungizya luzibo lwanu kumakanze ngajisi Leza kulindinywe. Pele lukkomano lwanu luyooyinda awo. Ciindi nomujana lugwasyo luyandika mukweendelezya mapenzi cabusongo kuzwa mukubala kwanu, muyoolimvwa mbuli mbwaakalimvwa sintembauzyo wakaamba kuti: “Milumbe yako ilagambya! Moyo wangu ulaibamba.” (Int. 119:129) Andinywe muyookondwa ciindi mwaakujana njiisyo zyamu Magwalo izimugwasya kweendelenya kuyeeya kwanu alimwi azintu nzyomulombozya munzila njayanda Leza.—Is. 55:8, 9.
Ibbaibbele lilijisi malailile aambotweelede kulilemeka alo aatukwabilila kuntenda akututondezya nzila iiluzi. Notubala mulindilyo, tulabona kuti Jehova ngu Taata waazyi kabotu mapenzi aakonzya kutusikila ikuti twalekela zisusi zyanyama iitalondokede kutweendelezya. Tayandi kuti tunjile mumapenzi aaboola akaambo kakuzisotoka caali zyeelelo zyakwe zyabukkale zisumpukide. Ulatubikkila maano alimwi uyanda kuti katupona munzila iili kabotu iikkomanisya. Ikubala kwesu Jwi lyakwe kutugwasya kumvwisya cilongezyo ncotujisi mbwali Leza wesu alimwi a Taateesu wakujulu.
Amulibale Bbaibbele Abuzuba
Kujatikizya muntu uubala Jwi lya Leza abuzuba, sintembauzyo wakati: “Zyoonse nzyacita ziyooba acoolwe.” (Int. 1:3) Ee, nokuba kuti tuli bantu batalondokede, akuti tukkede munyika eeyi mbyaabi ya Saatani, ikuti naa Diabolosi ulasoleka kutuluma, ikubala zili mu Jwi lya Leza lyoonse alimwi akuzicita kuyootugwasya kuzwidilila muzintu zyoonse zijatikizya cilongwe cesu a Jehova.
Mbwaanga tupona buumi bwakulibilika akaambo kamakatazyo aaletwa anyika eeyi mbyaabi, ikuzyiba miyeeyo ya Mulengi neliba leelyo notucita boobo muciindi cisyoonto buyo abuzuba kulakonzya kutuyumya. Ibamwi ibakaangidwe muntolongo akaambo kalusyomo lwabo bakali kusotooka kubala tupango, twalo ooto twakali kulembwa muzibalo zyamu muteende. Bakali kututendulula tupango ootu akutubikka mumoyo alimwi akuzinzibala kuyeeya alintuto. Jehova wakakulongezya kusoleka kwabo akaambo kakuti bakacita nzyobakali kukonzya kucita kweelana abukkale bwabo ikujana luzibo lwa Jwi lya Leza. (Mt. 5:3) Pele bunji bwesu tulaangulukide kapati kwiinda bantu aaba baambwa. Tutayeeyi kuti, ikubala kapango kamu Bbaibbele cakufwambaana ciindi comwe abuzuba kuyootugwasya munzila yamaleele. Pele tuyoolongezyegwa lilikke notubikka zintu ziyandika mubusena bweelede ikutegwa katubala cibeela cimwi mu Bbaibbele abuzuba, ikuyeeya alincico alimwi akuzibelesya mubukkale bwesu eezyo nzyotubala.
Ikwaamba ncobeni, imizeezo yesu mibotu ilakonzya kunyonganizyigwa. Twajanika mubukkale buli boobo, tweelede kusaanguna kucita zintu ziyandika kapati. Mucikozyanyo, tatukonzyi kuleka caali kunywa meenda kwabuzuba bomwe naa kwiinda awo. Aboobo, kufwumbwa naa ncinzi cikonzya kubuka mubukkale bwesu, tweelede kujana ciindi cakulikatalusya ameenda akasimpe.—Inc. 17:11.
Amulibale Jwi lya Leza Lyoonse Mbolizulwa
Sena kuli nomwakalibalide kale Bbaibbele lyoonse mbolibede? Ibamwi balatyompwa bayeeya buyo zyakubala kuzwa kubbuku lya Matalikilo kusikila ku Ciyubunuzyo. Aboobo, ibanji bakajisi luyandisyo lwakubala Bbaibbele lyoonse mbolizulwa bakatalikila kubala Magwalo aa Bunakristo aa Cigiliki. Nkaambo nzi? Ambweni nkaambo kakuti cakabaubila-ubila ikubona mbobakali kuyoogwasyigwa amabbuku aayo aamu Bbaibbele kabali bantu ibasola kweenda mumikondo ya Kristo. Antela nkaambo kakuti bakabona kuti Magwalo aa Bunakristo aa Cigiliki taali manji kapati kubala mbwaanga ncibeela buyo cisyoonto ca Bbaibbele. Pele nobakamana kubala mabbuku aayo aali 27, mpoonya bakapilukila kumabbuku aali 39 aamu Magwalo aa Cihebrayo akutalika kwaabala alimwi zyakabakkomanisya nzyobakali kubala. Kuzoosika ciindi nobakamanizya kubala Magwalo aa Cihebrayo, cakazikuba cilengwa buya cakubala Bbaibbele lyoonse, aboobo bakazumanana akwiinduluka kubala Magwalo aa Bunakristo aa Cigiliki alimwi kunyina nobakaleka kubala. Andinywe acibe cilengwa mubuumi bwanu ikubala Jwi lya Leza.
Sena kuli umwi mumukwasyi naa mumbungano yanu uutacikonzyi kubala? Ino mulekela nzi ikumulomba kuti kamumubalila Bbaibbele lyoonse imuntu ooyo? Muyoogwasyigwa alakwe uyoogwasyigwa eelyo nazinzibala kuyeeya ali zyeezyo nzyamvwa anazibelesya mubuumi bwakwe.—Ciy. 1:3.
Mukuya kwaciindi, ambweni muyooyanda kunoobikkilizya azintu zimbi zyaalubazu mukubala Bbaibbele kwanu. Izimwi akati kazyeezyi zilakonzya kumugwasya kumvwisya kweendelana kuliko akati kazibeela ziindene-indene zyamu Bbaibbele. Ikuti Bbaibbele lyanu kalilembedwe magwalo mumbali-mbali lyapeeji aagwasya kumvwisya makani, magwalo aaya alakonzya kumutola kumakani aakacitika ciindi cansiku aayendelana azibalo nzyomubala. Alakonzya kumugwasya ikumvwisya bukkale bwakapa kuti kulembwe zibeela ziindene-indene zyantembauzyo kubikkilizya amagwalo aayo aakalembwa abaapostolo ba Jesu Kristo. Ibbuku lya Insight on the Scriptures lilijisi makani manji kapati aapa bupanduluzi bwabantu, masena alimwi abube ibwaambwa mu Bbaibbele. Izitondezyo zizekaudwe zilagwasya ikubona mbobwakali kuzuzikizyigwa businsimi bwamu Bbaibbele, zitondezya bami abasinsimi bakali kupona kuciindi comwe alimwi akwaamba mazuba mukweezyeezya nozyakacitika zintu zinji zilembedwe mu Bbaibbele.
Nomuzinzibala kuyeeya ali zyeezyo nzyomwiiya, muyooteelela ncokwakali kucitikila zintu zimwi akati kabantu ba Leza. Alimwi muyooteelela Jehova ncaakali kweendelezya bantu bakwe munzila mbwaakabeendelezya. Muyoobona Jehova mbwailanga micito iicitwa amfwulumende, misyobo yabantu alimwi amuntu aumwi kumugama. Eeci ciyoomugwasya kumvwisya mbwayeeya.
Makani aansiku aamu Bbaibbele ayoomukonda ikuti kamububwene mumizeezo yanu busena bwakacitikila zintu eezyo. Mamaapu alimwi amasena aambwa mu Bbaibbele atondezya buyale bwanyika amisinzo ili akati kamasena aayo. Mucikozyanyo, mbusena buli bulaafwaafwi bwalo ibana Israyeli nkobakazubukila Lwizi Lusalala? Ino Nyika Yakasyomezyegwa yakali mpati buti? Ino Jesu wakeenda misinzo milamfwu buti naakali kubeleka mulimo wakwe waanyika? Mmasena nzi aakondelezya ngaakabona Paulo munyendo zyakwe zyabumisyinali? Imamaapu alimwi abupanduluzi bwabuyale bwanyika apa twaambo tuyoomugwasya kucita kuti kubala kwanu kakukondelezya. Ino nkuli nkomunga mwajana mamaapu aamasena aambwa mu Bbaibbele? Amwi alajanika mu Bbaibbele lya Chitonga alya Bbaibbele lya Busanduluzi Bwanyika Mpya. Mabbuku a Insight alijisi mamaapu aamasena aaya aatandila ku 70 alimwi acitondezyo nkomukonzya kujana mamaapu aamasena aaya kumamanino kwabbuku litaanzi. Amubelesye bbuku lya Watch Tower Publications Index ikujana mamaapu ambi. Ikuti kamutajisi mabbuku aaya, amubelesye mamaapu aali mu Ngazi Yamulindizi ikutegwa amugwasye mukubala Bbaibbele kwanu.
Mu Magwalo aa Cihebrayo, Mwami Davida wakatembaula Jehova kati: “Miyeeyo yako ilayandika . . . , O Leza! Mweelwe wayo mupati loko!” (Int. 139:17) Mu Magwalo aa Bunakristo aa Cigiliki, mwaapostolo Paulo wakatembaula Jehova akaambo kakuti “Wakamunika mumyoyo yesu kukumunikila bantu akubazibya mbububede bulemu bwa-Leza buboneka mubusyu bwa-Kristo.” (2 Kor. 4:6) Davida alimwi a Paulo bakapona kuciindi ciindene amyaanda yamyaka minji kapati; pele boonse bobilo bakalikkomanina Jwi lya Leza. Andinywe mulakonzya kulikkomanina ikuti mwajana ciindi cakubala zyoonse nzyamupede Jehova kwiinda mu Jwi lyakwe lyakasololelwa amuuya.