Mulakonzya Kuyaambele Mukwiibaluka Zintu

JEHOVA LEZA wakalenga bongo bwamuntu munzila iigambya yakukonzya kwiibaluka zintu. Wakabubamba kabuli ciyobwedo oomo motukonzya kubweza nzyotwakayobola kakunyina kusweekelwa zintu ziyandisi zili mumo. Ibubambe bwabongo buleendelana amakanze aa Leza aakuti bantu beelede kupona kukabe kutamani.—Int. 139:14; Joh. 17:3.

Pele ambweni mulimvwa kuti ibunji bwazintu nzyomwiiya tamukonzyi kuziyeeya pe. Nomuyanda kuzyibelesya kuboneka kuti inga taziciko. Ino ncinzi ncomunga mwacita kutegwa kamuziyeeya zintu nzyomwiiya?

Amube Aluyandisyo

Ikuba aluyandisyo ncintu ciyandika kapati mukwiibaluka zintu. Ikuti twacicita kuba cilengwa cesu ikubikkila maano, ikuba aluyandisyo mubantu akuli zyeezyo zicitika abusena mpotubede, imizeezo yesu ilakonzya kukulwaizyigwa. Aboobo ciyootuubila-ubila ikuba aluyandisyo luli boobo notubala naa notumvwa zintu zigwasya.

Kanji-kanji ncintu cikatazya kumuntu uuli woonse ikwiibaluka mazina abantu. Pele mbotuli Banakristo, tulizyi kuti bantu balayandika kapati, Ibanakristoma, aabo mbotukambaukila abamwi mbotubeleka limwi eelyo notuyandaula zintu nzyotuyandika mubuumi. Ino ncinzi cikonzya kutugwasya ikwiibaluka mazina aayo ngotuyandika kapati kwiibaluka? Mwaapostolo Paulo wakabandauka mazina aabantu bali 26 ibakali mumbungano eeyo njaakalembela lugwalo. Iluyandisyo lwakwe mulimbabo lulabonwa mukuti tanaakabazyi buyo mazina, pele wakabandika atwaambo tumbi tugaminide bunji bwabantu aabo. (Rom. 16:3-16) Bamwi babalangizi beendeenda ba Bakamboni ba Jehova bamazuba aano balacita kabotu kapati caboola kukwiibaluka mazina nokuba kuti baleendeenda kuzwa kumbungano aimwi amvwiki. Ino ncinzi cibagwasya? Balakonzya kabayandisya kubelesya zina lyamuntu kwaziindi zinji nobabandika anguwe iciindi cakusaanguna. Balasoleka ikweendelanya zina lyamuntu ooyo abusyu bwakwe. Kunze lyaboobo, balabeleka antoomwe aumwi wabo mumulimo wamumuunda alimwi akulya ambabo. Ciindi nomuswaangana amuntu, sena mulaliibaluka izina lyamuntu ooyo? Kusaanguna, amujane kaambo kabotu kayoomugwasya kuliibaluka izina eelyo; mpoonya amusole kubelesya nzila eezyi nzyotwabandika kale.

Ikwiibaluka zintu nzyomubala akwalo kulayandika kapati. Ino ncinzi cikonzya kumugwasya mumakani aaya? Zyoonse zyobilo, iluyandisyo akumvwisya zilayandika kapati. Muyandika kuba aluyandisyo kumakani ngomubala ikutegwa mwaabikkile maano kapati. Tamukonzyi kwaayobola makani ikuti mizeezo yanu kaili kumbi nomubala. Muyooyaambele mukumvwisya kwanu eelyo nomweendelanya makani ngomubala azintu nzyomuzyi kale naa kuluzibo ndomujisi kale. Amulibuzye kuti: ‘Mbuti alimwi ndiilili nondikonzya kwaabelesya makani aaya mubuumi bwangu? Ino inga ndaabelesya buti ikugwasya bamwi?’ Alimwi mulakonzya kuyaambele mukumvwisya ikuti kamubala mabala aali mbwaabede ikutali kubala bbala lyomwe-lyomwe. Tacikamukatazyi ikutumvwisya akuzyiba twaambo tupati-pati tuli mumo, cakuti ciyoomuubila-ubila ikutwiibaluka.

Amusitikile Kwiinduluka

Bahaazibwene mumakani aalwiiyo balakankaizya mbociyandika ikwiinduluka. Umwi mwiiyi uuyiide kapati wakukkoleji imwi, mukuvwuntauzya kwakwe wakajana kuti, ikwiinduluka kucitwa mpoonya aawo kwaminiti yomwe buyo kulakonzya kugwasya mukuyobola makani kwaciindi cilamfwu. Aboobo mbomwamanina buyo kubala naa ncibeela cili mbocibede cacibalo cimwi, amwiinduluke twaambo tupati-pati mumizeezo yanu kutegwa mucikonzye kutwiibaluka. Amuyeeye mbomunga mwatupandulula mumajwi aanu nobeni, itwaambo tupya toonse ntomwaiya. Kwiinda mukwiinduluka twaambo ntomwali kubala mbomwamanina buyo, kuyoomugwasya ikwiibaluka kwaciindi cilamfwu kaambo nkomwabala.

Mpoonya, kwainda mazuba masyoonto, amusole kujana ciindi cakwiinduluka makani ngomwakabala kwiinda mukwaakanana amuntu umbi. Mulakonzya kucita oobo amusazinyoko mumukwasyi, aumwi wamumbungano yanu, ngomubeleka limwi, ngomwiiya limwi, simukobonyoko naa amuntu umbi buyo ngomukonzya kuyaanya mumulimo wamumuunda. Amusoleke ikupa akaambo kamu Magwalo kajatikizya kaambo aako ikutali kwiile kwiinduluka buyo twaambo. Ikucita boobo kuyoomugwasya kuyeeya zintu ziyandika kapati; alimwi kuyoobagwasya abamwi.

Amuzinzibale Kuyeeya Zintu Ziyandika

Kunze lyakwiinduluka zintu nzyomwabala alimwi akuzyaambila bamwi, muyoojana kuti ikuzinzibala kuyeeya zintu ziyandika kapati izyakayiigwa akwalo kulagwasya kapati. Basikulemba Bbaibbele ba Asafu a Davida bakacicita eeci. Asafu wakati: “Njiibaluke milimo ya-Jehova, njeeye malele aakwe aaciindi. Mbike moyo wangu kuncito zyako zyoonse, akuyeeya-yeeya milimo yako yakalekale.” (Int. 77:11, 12) Alakwe Davida wakalemba kuti: “[Nda]kuyeeya muziindi zyamasiku” alimwi “Ndayeeya mazuba aakale, ndaibaluka milimo yako yoonse.” (Int. 63:6; 143:5) Sena mulacita oobo?

Ikuzinzibala kuyeeya milimo ya Jehova, ibube bwakwe alimwi amakanze aamilimo yakwe kuyoomugwasya kapati ikwiibaluka twaambo tuyandika. Ikuti mwaba acilengwa cakuyeeya kuli boobo, masimpe ciyoomugwasya ikubikka zintu ziyandika kapati mumoyo wanu. Kuyoomukulwaizya kapati ikuba abube buyandika. Ikwiibaluka nkomunoocita kuyootondezya mizeezo njomujisi mumoyo.—Int. 119:16.

Imulimo Ngoujisi Muuya wa Leza

Notusola kwiibaluka makani aajatikizya milimo ya Jehova alimwi azintu zyakaambwa a Jesu Kristo, tatusiidwe buyo katunyina alugwasyo pe. Masiku katanafwa, Jesu wakaambila basikumutobela kuti: “Ndamwaambila makani aya, nencili anywebo. Pele Mugwasyi, Muuya Uusalala, Taata ngwayootuma muzina lyangu, uyoomwiisya zintu zyoonse, uyoomuyeezya zyoonse nzendakamwaambila.” (Joh. 14:25, 26) Matayo a Johane bakali akati kabaabo ibakajanika. Sena muuya uusalala wakali mugwasyi ncobeni kubantu aaba? Inzya, wakabagwasya kapati! Nokwakainda myaka iitandila kulusele, Matayo wakamanizya kulemba makani mataanzi aamba makani manji kujatikizya buumi bwa Kristo, aayo alo aabikkilizya amakani atalubiki mbuli Mulumbe waa Cilundu amakani mapati aapa citondezyo cakubako kwa Kristo amamanino aabukkale bubyaabi. Nokwakainda myaka iili makumi aali cisambomwi amusanu kuzwa naakafwa Jesu, mwaapostolo Johane wakalemba Makani Mabotu kubikkilizya amakani ambi ngaakaamba Jesu masiku aamamanino kubaapostolo ikuba a Mwami katanaaba buumi bwakwe. Cakutadooneka, boonse bobilo Matayo a Johane bakaziibaluka kabotu-kabotu zintu nzyaakaamba Jesu akucita ciindi nobakali anguwe, pele muuya uusalala wakabagwasya kapati ikutaluba twaambo tuyandika kapati twalo Jehova ntwaakayanda kuti tulembwe mu Jwi lyakwe.

Sena muuya uusalala ulabeleka kauli mugwasyi kubantu ba Leza mazuba aano? Inzya ulacita oobo! Nokuba boobo, imuuya uusalala tuukonzyi kubikka zintu nzyotwatakaiya mumizeezo yesu, pele ulatugwasya ikwiibaluka zintu ziyandika kapati nzyotwakaiya musyule. (Lk. 11:13; 1 Joh. 5:14) Mpoonya, kweelana ambokuyandika, imiyeeyo yesu ilakonzya kubeleka kabotu ‘ikwiibaluka makani aakaambwa kalekale abasinsimi basalala amulawo wa-Mwami Mufwutuli.’—2 Pet. 3:1, 2.

“Mutalubi”

Cakwiinduluka-induluka, Jehova wakacenjezya bana Israyeli kuti: “Mutalubi.” Takuli kuti wakali kulangila kuti baziibaluke zyoonse pe. Pele teebakeelede ikubikkila maano kapati kuzintu zyabo beni akuluba milimo Jehova njaakabacitila. Bakeelede kwiibaluka kuvwunwa nkwaakabavwuna Jehova ciindi eciya mungelo wakwe naakajaya bana bataanzi boonse babana Egepita alimwi aleelyo Jehova nakaandaanya Lwizi Lusalala mpoonya akuluswaanganya, kulobya Farao ampi yakwe. Bana Israyeli bakeelede kwiibaluka kuti Leza wakalibapede Mulawo a Cilundu ca Sinai akuti wakabeenzya munkanda kuya mu Nyika Yakasyomezyegwa. Teebakeelede kuziluba zintu eezyi nkaambo zyakali kujatikizya buumi bwabo.—Dt. 4:9, 10; 8:10-18; Kul. 12:24-27; Int. 136:15.

Andiswe tweelede kucenjela kutegwa tutalubi. Mbotuya buliyumya mumapenzi, tuyandika kumuyeeya Jehova, katumuzyi mbwabede Leza alimwi aluyando ndwaakatondezya kwiinda mucipego ca Mwanaakwe walo wakapa cinunuzyo cakutunununa kuzibi zyesu ikutegwa tucikonzye kuba abuumi bulondokede mane kukabe kutamani. (Int. 103:2, 8; 106:7, 13; Joh. 3:16; Rom. 6:23) Ikubala Bbaibbele abuzuba akutola lubazu mumiswaangano yambungano amumulimo wamumuunda kuyootugwasya lyoonse ikwiibaluka makani aaya aayandika kapati.

Nomuyandika kusala zintu zyakucita, zibe zipati naa ziniini, amwiibaluke makani aaya aayandika kapati, nkabela aamugwasye mukuyeeya kwanu. Mutalubi pe. Amuleke Jehova amusololele. Muciindi cakulanga twaambo munzila yabuntunsi naa cakutayeeyela naa kwiile kusyoma kufwumbwa zyaboola mumoyo uutalondokede, amulibuzye kuti, ‘Ino ndulayo nzi naa ninjiisyo nzi zyamu Jwi lya Leza zyeelede kundigwasya mukusala ooku?’ (Tus. 3:5-7; 28:26) Tamukonzyi kwiibaluka zintu nzyomutanabalide naa kumvwa. Pele eelyo nomuya buyungizya luzibo lwini-lwini aluyando ndomujisi kuli Jehova, iluzibo ndomwajana kale oolo ndomukonzya kwiibaluka kwiinda mukugwasyigwa amuuya wa Leza luyooyungizyigwa. Alimwi aluyando lwanu kuli Jehova luyoomukulwaizya ikucita zintu kweendelana andulo.