Kubala Munzila Iiluzi

IMAGWALO aamba kuti, Leza uyandisya kuti bantu boonse “babe aluzibo lwini-lwini lwakasimpe.” (1 Tim. 2:4) Kweelana aluyando oolo, notubala cakupozya kuzwa mu Bbaibbele, tweelede kubala katujisi makanze aakuyiisya luzibo lwini-lwini.

Iluzibo lwakubala cakupozya kuzwa mu Bbaibbele amumabbuku aapandulula Bbaibbele lulayandika kapati kubakubusi abapati. Mbotuli Bakamboni ba Jehova, tujisi mukuli wakwaambila bamwi luzibo lwa Jehova amilawo yakwe. Kanji-kanji kucita boobo kujatikizya kubalila muntu umwi naa kubalila kakamu kabantu. Amumukwasyi amwalo tulabala cakupozya. Mu Cikolo Camulimo Weendelezyegwa a Leza, kuli ziindi ibakwesu abacizyi, bana abapati nobapegwa lulayo, balagwasyigwa kuyaambele mukubala cakupozya.

Ikubala Bbaibbele kubuleya, kube kumuntu omwe naa kumbungano, tweelede kukubikkila maano kapati. Ibbaibbele lyakasololelwa amuuya wa Leza. Kunze lyaboobo, “ijwi lya-Leza lili abuumi, lili anguzu . . . alimwi lilabeteka kuyeeya akuyanda kwamoyo.” (Heb. 4:12) Mu Jwi lya Leza mujanika luzibo lugwasya kapati lwalo lutakonzyi kujanwa kuli koonse pe. Lilakonzya kumugwasya muntu ikuzyiba Leza mwini-mwini uuli alikke akuba acilongwe cibotu anguwe kubikkilizya akuzunda mapenzi aaliko mubuumi. Lilapandulula muntu mbwakonzya kujana buumi butamani munyika ya Leza mpya. Aboobo, tweelede kuba ambaakani yakubala Bbaibbele kusikila mpotukonzya.—Int. 119:140; Jer. 26:2.

Mbomukonzya Kubala Munzila Iiluzi. Kubala munzila iiluzi kulabikkilizya mbazu zinji, pele kusaanguna mweelede kucizyiba kubala kabotu. Eeci caamba kuti, ikwaabala mbubwenya mbwaalembedwe apepa mabala. Amubone kuti tamusotoki mabala, tamusiyi mabala aakumamanino abbala naa kwaabala munzila iitaluzi akaambo kakuti alikozyenye amabala amwi.

Ikutegwa kamubala munzila iiluzi, mweelede kumvwisya ncowaamba mulongo wamabala aalembedwe oonse. Ikutegwa mucite oobo, muyandika kulibambila kabotu. Mukuya kwaciindi, nomuya bucikonzya kubona mabala aatobela alimwi akubona mbokabede kaambo, muyoocizyiba kubala munzila iiluzi.

Twaandaanyo tulayandika kapati mukulemba. Twaandaanyo tulakonzya kutondezya oomo muyandika kwiima, ciindi ncomweelede kwiima alimwi amuyandika kucinca jwi. Mumyaambo imwi, ikutacinca jwi aawo twaandaanyo notuyanda kuti mucite boobo kulakonzya kupa kuti mubuzyo ulimvwisye mbuli kuti nkaambo buyo, alimwi mane kulakonzya kupa muzeezo wiimpene awaambwa. Inzya, zimwi ziindi twaandaanyo tulakonzya kubikkwa akaambo kakuti mwaambo ooyo uyanda kuti tubikkwe, nokuba kuti inga katutayandiki. Mumyaambo imwi, nciyumu ikubala munzila iiluzi ikuti tiimwaabikkila maano mabala amwi aabikkidwe tubala tumwi—nkokuti mabala aalembedwe buya alimwi ayaayo aamvwugwa kwiinda mukubala cibalo coonse. Ootu tulatondezya mbwaayelede kubalwa mabala aayo aabikkidwe tubala ooto. Amubikkile maano kujatikizya mbotubelesyegwa twaandaanyo mumwaambo wanu. Eeci cilagwasya mukubala munzila iili kabotu. Amuyeeye kuti mbaakani yanu njakuyiisya twaambo toonse itwaambwa ikutali kwaamba buyo mabala pe.

Kwiinduluka kulayandika ikuti kamuyanda kucizyiba kubala munzila iiluzi. Amubale muncali omwe buyo, mpoonya akwiinduluka ziindi zili mbozibede mane mwacikonzya kubala kakunyina kulubizya. Mwamana amuzumanane amuncali uutobela. Mane amusoleke kubala mapeeji aali mbwaabede kakunyina kusotoka, kujokeezya naa ikubala bbala lili loonse munzila iiteelede. Mwazicita eezyi zyoonse, amulombe muntu umwi kuti amuswiilile akumwaambila mpomwalubizya nomubala.

Muzisi zimwi, ibanji cilabayumina kubala akaambo kakuti tababoni kabotu alimwi akubula mumuni munji. Ikuti kacikonzyeka kubagwasya kumapenzi aaya, cakutadooneka ibantu aaba balakonzya kunoobala kabotu.

Mukuya kwaciindi, ibakwesu bacizyiba kubala kabotu balakonzya kulombwa ikunoobala zibalo ziyiigwa mubuleya mbuli lya Ciiyo Cabbuku Cambungano a Ciiyo ca Ngazi Yamulindizi. Pele ikutegwa umwi acite kabotu mukubala ooku, nzinji nzyayelede kuzyiba kunze lyakwaamba mabala mbwaayelede kwaambwa. Ikutegwa mube sikubala waabuleya uucizyi mumbungano, mweelede kuba acilengwa cibotu nomulibalila nobeni. Eeci cilabikkilizya akuzyiba kuti ibbala alimwi lili mukaambo lilayandika kapati. Tamukonzyi kuciteelela kabotu icaambwa kuti kamutaabikkili maano mabala amwi. Ikuti kamubala mabala munzila iiteelede noliba leelyo nomulibalila nobeni, tamukakamvwisyi kaambo ikaambwa. Ikutamvwisya mabala ncaabelesyegwa munzila eeyo kulakonzya kupa umwi kubala munzila iiteelede. Amusoleke ikumvwisya ncolyaamba bbala alimwi kweelana ambolyabelesyegwa mukaambo molijanika. Amubikkile maano akutwaandaanyo mbotujatikizya ncokaamba kaambo kalembedwe. Kamuyeeya kuti kanji-kanji muzeezo waambwa ulateelelwa kwiinda mukubala mabala ali mbwaabede. Amuzibikkile maano eezyi kutegwa mwanoobala cakupozya kamubala mabala ali mbwaabede—ikaambo koonse—muciindi cakwiile kubala bbala lyomwe-lyomwe. Ikumvwisya ncomubala kulayandika kapati ikutegwa kamwaambila bamwi kasimpe munzila iiluzi nomubalila buleya.

Mwaapostolo Paulo naakalemba kuti: “Sungwaala kukubala,” wakali kulembela mwaalu Munakristo wakajisi luzibo kale. (1 Tim. 4:13) Masimpe toonse tulakonzya kuyaambele mumakani aaya.