Luyandisyo

LUYANDISYO lupa kuti makani kaakondelezya. Nokuba kuti makani aapa luzibo alayandika kapati, ikwaakanana caluyandisyo kuyoobagwasya ibamuswiilila kuzumanana kubikkila maano. Kunyina makani ambomwakakomena naa mbomubede, mulakonzya kuba aluyandisyo.

Amutondezye Mbomulimvwa Nomukanana. Naakali kwaambila mwanakazi muna Samariya, Jesu wakaamba kuti, aabo ibakomba Jehova beelede kumukomba “mumuuya amubwini.” (Joh. 4:24) Ibukombi bwabo bweelede kukulwaizyigwa akulumba nkobajisi alimwi bweelede kweendelana akasimpe kajanika mu Jwi lya Leza. Ikuti muntu katondezya kulumba, ikulumba kwakwe kuyoomvwugwa mukwaambaula. Unoolisungwide ikwaambila bamwi zyazipego nzyatupa Jehova. Mbwaboneka kubusyu, mbwanyanyaasya zizyo zyamubili ajwi lyakwe ziyootondezya mbwalimvwa.

Pele, ino nkaambo nzi imwaambi uumuyanda Jehova alimwi uuli alusyomo mumakani ngaamba zimwi ziindi ncakonzya kutakanana cabusungu? Tayelede kulibambila buyo nzyayookanana pe. Weelede kulibikka mumakani aayo, aamunjile mumoyo. Atwaambe kuti, wapegwa kuyookanana makani aamba zyacipaizyo cacinunuzyo ca Jesu Kristo. Mwaambi nakanana makani aaya, tayelede kuba buyo atwaambo mumizeezo pe, weelede kutondezya mbocimugwasya lwakwe cipaizyo ca Jesu alimwi abamuswiilila. Weelede kuyeeya mbwamulumba Jehova Leza a Kristo Jesu kucipego eeci citaliboteli. Weelede kuyeeya zilongezyo zibotu kapati nzyobayoojana bantu akaambo kacipaizyo eeco—kukondwa kutamani abuumi bulondokede munyika iibukulusyidwe yaparadaiso! Aboobo, makani aaya ayelede kumunjila mumoyo.

Kujatikizya mulembi Ezara iwakali mwiiyi mu Israyeli, Ibbaibbele lyaamba kuti “wakapangika moyo wakwe kukuyandaula mulao wa-Jehova, akuucita, akukwiisya ba-Israyeli.” (Ezr. 7:10) Icini caambwa mumwaambo wakusaanguna mukaambo kakuti “wakapangika moyo wakwe” ncakuti, wakalibambila mumoyo wakwe. Andiswe kuti twacita oobo—ikutalibambila buyo makani pele amyoyo yesu—tunikwaamba zintu kweelana ambotulimvwa. Ikukanana makani aakasimpe amoyo woonse kuyoobagwasya aabo mbotubandika limwi ikuba aluyando lwini-lwini lwakasimpe.

Amubabikkile Maano Bamuswiilila. Acimwi ciyoomugwasya kuba aluyandisyo nkulimvwa kuti aabo ibamuswiilila bayanda kumvwa makani ngomuyanda kwaamba. Aboobo nomulibambila makani aanu, tamweelede kubikkila buyo maano kukujana twaambo tugwasya, pele mweelede kumulomba Jehova mumupailo kuti amugwasye ikukanana munzila iyoobagwasya aabo mbomuyookananina. (Int. 32:8; Mt. 7:7, 8) Amulange-lange kaambo imakani aanu ncaayandika kuli baabo ibamuswiilila, mbwaayoobagwasya ambomukonzya kwaabandika munzila iiyoopa kuti baabikkile maano.

Amulibambile makani kusikila mwajana kaambo kamwi kamukonda. Tayelede kuba makani mapya buya, pele mweelede kwaakanana munzila mpya. Ikuti mwalibambila makani aakonzya kubagwasya bamuswiilila ikuyumya cilongwe cabo a Jehova, ikumulumba kuzipego nzyatupa akuliyumya mubuyumuyumu bwabo mubukkale oobu bubyaabi naa ikuzwidilila mumulimo wabo, muyooba abusungu mumakani aanu.

Ino mbuti ikuti cibeela ncomwapegwa ncakubala kubuleya? Ikutegwa mucite oobo cabusungu, nzinji ziyandika kunze buyo lyakwaamba mabala munzila iiluzi akwaabala kabotu-kabotu mubunji. Amusitikile kubala cibalo ncomupedwe. Ikuti kamuyoobala cibeela camu Bbaibbele, amucivwuntauzye. Amubone kuti mwacimvwisya icaambwa mucibalo eeco. Amulange-lange mbocikonzya kumugwasya nywebo abaabo bayoomuswiilila, mpoonya amukacibale munzila iyoobagwasya aabo bamuswiilila.

Sena mulibambila kuya mumulimo wamumuunda? Amwiinduluke makani amagwalo ngomwalibambila kuyoobelesya. Alimwi amubikkile maano kuli zyeezyo zibakatazya bantu. Ino mmakani nzi aali kwaambwa mumiteende amuwailesi? Ino mmapenzi nzi ngobajisi? Ikuti mwalibambila kabotu kuyootondezya bantu kuti mu Jwi lya Leza mujanika nzila iikonzya kumana mapenzi aabakatazya, muya kuyandisya kuyoobagwasya, aboobo ciyoomupa kuba aluyandisyo.

Amutondezye Luyandisyo Kwiinda Mukukanana Cabusungu. Iluyandisyo kanji-kanji lulabonwa kwiinda mukukanana cabusungu. Mweelede kutondezya oobo kubusyu bwanu. Mweelede kusinizya nomukanana pele ikutali cakulisumpula buya.

Mutaciindilizyi pe. Ibamwi inga balaciindilizya kukkomanina kufwumbwa cintu. Bayandika kugwasyigwa kuzyiba kuti imuntu nalisumpula naa naciindilizya buya kukanana, ibamuswiilila banooyeeya nguwe muciindi cakuyeeya mulumbe. Kulubazu lumwi, aabo ibali ansoni bayandika kugwasyigwa kutegwa kabaangulukide nobakanana.

Mwanoojisi luyandisyo abalo bamuswiilila bayooba aluyandisyo. Ikuti kamubalanga bamuswiilila alimwi kamuli basungu mumakani aanu, abalo bamuswiilila bayooba basungu. Apolo wakali kukondelezya mukukanana kwakwe, alimwi waambwa kuti wakali mwaambi uupasaula kukanana. Ikuti kamukkomene amuuya wa Leza, imakani ngomukanana cakusangalizya anoobakulwaizya ibamuswiilila kubweza ntaamu imwi.—Inc. 18:24, 25; Rom. 12:11.

Iluyandisyo Lweendelana Ancaamba Makani. Amubone kuti busungu tabwiindilili mumakani oonse cakuti bamuswiilila bakatala buya. Itwaambo tukulwaizya ntomuya kukanana ibantu tabakatuswiilili pe akaambo kakuti bakatalila limwi. Eeci citondezya mbociyandika kapati ikulibambila makani aayoomugwasya kukanana munzila iisiyene-siyene. Mutataliki kukanana munzila iitondezya mbuli kuti taamukondi makani. Ikuti mwatusala kabotu twaambo ntomuya kukanana, masimpe ayoomukonda makani. Pele twaambo tumwi bunji bwaziindi tuyandika kutwaamba cabusungu kapati kwiinda tumwi, aboobo ootu twaambo tweelede kweendelana kabotu amakani aanu oonse.

Ikapati twaambo tupati-pati tweelede kukananwa cabusungu. Makani aanu ayelede kuba atwaambo tupati-pati mpomweelede kutalikila. Mbwaanga ootu ntotwaambo tupati-pati twamakani aanu, ntotwaambo tuya kumugwasya kukulwaizya bamuswiilila. Mwamana kubazula ibamuswiilila, mweelede kubakulwaizya, akubatondezya mbotukonzya kubagwasya ikuti batubelesya twaambo twabandikwa. Iluyandisyo luya kumugwasya kukanana makani aaya kubanjila mumoyo bamuswiilila. Tamweelede kulisinikizya buya ikukanana cabusungu. Kweelede kuba kaambo kamupa kucita oobo alimwi kaambo aako muyookajana mumakani aanu.