Ikubelesya Twaambo Tupati-pati

IKUYEEYA kuyookanana kwiinda mukubelesya buyo twaambo tupati-pati kupa bantu banji kutakkalwa moyo. Moyo ulakkala naa bazyilemba apepa antela kuzibikka mumutwe zyoonse nzyobaya kwaamba.

Pele bwini mbwakuti, abuzuba tulaambaula abantu kakunyina mpotubala. Tulacita oobo notubandika abamukwasyi kubikkilizya abeenzuma. Tulacita oobo notuli mumulimo wamumuunda. Alimwi tulacita oobo notupaila camoyo omwe, notuli tolikke anotwiiminina bantu mumupailo.

Nomukanana makani, sena kuli kwiindana kuliko nomubala apepa anomubelesya buyo twaambo tupati-pati? Nokuba kuti kubala apepa kulagwasya kubona kuti zintu zyaambwa munzila iiluzi akubelesya mabala mabotu, kupa kwaamba zintu zitanjili bantu mumoyo. Mwabala twaambo tuli mbotubede, munoocinca-cinca ijwi kanji-kanji akutalika kukanana munzila mbomutakanani lyoonse. Ikuti kamubikkila kapati maano kumapepa aanu kwiinda bamuswiilila, ibanji tabakaswiilili mbuli mbobakonzya kuswiilila nobabona kuti mulababikkila maano akuti makani aanu aleendelana abukkale bwabo. Ikutegwa makani kaakulwaizya, ikwaakanana kakunyina kubala kulagwasya kapati.

Icikolo Camulimo Weendelezyegwa a Leza cibambilidwe kutugwasya mubuumi bwesu. Twajana beenzuma, kunyina notubweza pepa akutalika kubala twaambo ntotuyanda kubaambila kucita kuti tubelesye mabala mabotu. Mumulimo wamumuunda, kunyina notubweza pepa lilembedwe twaambo kuyoowa kuti ambweni inga twaziluba nzyotuyanda kwaambila bantu. Nokucitwa citondezyo mucikolo mbokukambaukwa mubukkale buli boobu, amusoleke kukanana mbomukanana lyoonse. Kwiinda mukulibambila kabotu, muyoojana kuti itwaambo ntomujisi mumizeezo naa itulembedwe, tuyoomugwasya ikwiibaluka makani ngomuyanda kubandika. Pele ino mbuti mbomukonzya kuba acamba cakukanana kwiinda mukubelesya twaambo ootu?

Amulibambilile Limwi Zyakwaamba. Ikutegwa mubelesye twaambo tupati-pati, mweelede kulibambilila limwi zyakwaamba. Eeci tacaambi kusalila limwi mabala ngomuyanda kuyoobelesya. Caamba kuti mweelede kuyeeya kamutanaamba.

Mubuumi bwabuzuba abuzuba, imuntu wiingana ulakonzya kubbwa twaambo tukonzya kumupa kuusa. Aumbi muntu ulakonzya kwiile kulabalika. Ziyanza zyobilo eezyi zilakonzya kumanizyigwa kwiinda mukwiima aniini akulibambila twaambo kakutana talikwa kukananwa. Kusaanguna amuzyibe makanze ngomujisi, akusala nzila njomweelede kutobela ikutegwa muzuzikizye makanze aayo, mpoonya akutalika kukanana.

Sena mulibambila kuya mumulimo wamumuunda? Mutabikkili buyo maano mukubikka mabbuku mucoola, pele amulibambile anzyomuya kwaamba. Ikuti mwalibambila kuyoobelesya nzila imwi akati kazyeezyo zipedwe mu Mulimo Wesu Wabwami, amwiibale cakwiinduluka-induluka kutegwa kamutuyeeya twaambo tuyandika kapati. Amwaambe kaambo kapati mumajwi masyoonto buyo. Amwaambe mumajwi aanu kweelana ambomwaambaula lyoonse alimwi kamuyeeya bukkale bwamucilawo canu. Ciyoomugwasya kapati kubikka twaambo tupati-pati mumoyo. Ino ncinzi ncomunga mwabikkilizya? (1) Nomutalika mubandi, mulakonzya kwaamba makani aabakatazyide bantu banji mucilawo momukkala. Amumulombe ngomubandika limwi kwaamba mbwayeeya. (2) Amube amakani aagaminide ngomukonzya kwaamba kukaambo aako kubikkilizya amagwalo masyoonto aatondezya cisyomezyo Leza ncaapa mukumanizya mapenzi. Ikuti kakucili ciindi, amukankaizye kuti Jehova uyoocita oobo kwiinda mu Bwami bwakwe, imfwulumende yakwe yakujulu. (3) Amumukulwaizye muntu ooyo kubweza ntaamu kumakani ngomwabandika. Mulakonzya kusiya bbuku naa magazini antela kwaamba makani aaciiyo ca Bbaibbele mpoonya akupangana buzuba aciindi nomuyoozumanana amubandi ooyo.

Twaambo ntomukonzya kubelesya mumubandi ooyu ntutooto ntomujisi mumoyo. Ikuti kamuyanda kulanga twaambo tulembedwe kamutanasika aŋanda, ambweni inga twalembwa mumajwi masyoonto buyo aantalisyo, kubikkilizya amagwalo masyoonto amajwi masyoonto aakwaamba kumamanino. Ikulibambila alimwi akubelesya twaambo tupati-pati kulatugwasya kutaamba caambaambe, pele ikwaamba mulumbe ooyo uutalubiki.

Ikuti kakuli mubuzyo naa makani amwi ngobavwula kukazya bantu mucilawo canu, inga cabota kulibambila makani aayo. Bunji bwaziindi, iciyandika buyo nkulibambila twaambo tobilo naa totatwe kubikkilizya amagwalo aapa bumboni kumakani aayo. “Nkhani Zokambirana za m’Baibulo” naa tutwe twamukati mubbuku lya Kukambitsirana za m’Malemba zilakonzya kumugwasya kujana twaambo ntomuyanda. Mulakonzya kujana makani amwi aazubuludwe mubbuku limbi aayo ngomuyanda kubikkilizya. Amulembe twaambo mubufwaafwi, mubikkilizye amakani aayo aazubuludwe, mpoonya mwaayobole antoomwe amabbuku ngomubelesya mumulimo wamumuunda. Mwiniŋanda nabuzya mubuzyo naa kukazya, amumwaambile kuti ulaangulukide kubuzya ikutegwa mumupandulude nzyomusyoma. (1 Pet. 3:15) Amubelesye twaambo tupati-pati ntomujisi ikwiingula mubuzyo.

Nomwiiminina mukwasyi, nkamu yaciiyo cabbuku naa mbungano mumupailo, ncibotu ikulibambila kabotu twaambo ntomuya kwaamba. Kweelana a Luka 11:2-4, Jesu wakapa basikwiiya bakwe twaambo tuuba-uba twamupailo uumvwugwa. Lyakwaaba tempele mu Jerusalemu, Solomoni wakabandika twaambo tunji mumupailo wakwe. Cakutadooneka, weelede kuti wakalibambila nzyaakali kuyanda kwaamba. Kusaanguna wakabikkila maano kuli Jehova acisyomezyo ncaakasyomezya Davida; kumane atempele; mpoonya wakabandauka twaambo tugaminide alimwi ankamu zyabantu. (1 Bam. 8:22-53) Tulakonzya kugwasyigwa azikozyanyo eezyi.

Amulibambile Twaambo Tuuba-Uba. Sena twaambo ntomujisi ntwakubelesya kukanana makani aabuleya? Ino tweelede kuba tunji buti?

Kamuyeeya kuti itwaambo ntomujisi tumugwasya buyo ikwiibaluka zyakwaamba. Ambweni inga mwayanda kulemba mizila misyoonto yantalisyo. Pele mwamana, amubikkile maano kutwaambo ikutali kumabala. Ikuti kamuyanda kutulemba buya twaambo ooto, amutulembe mubufwaafwi. Itwaambo tupati-pati ntomuyanda kuya kukanana tatweelede kukatazya kubona mutwaambo ntomujisi. Mulakonzya kucita oobo kwiinda mukutulemba mumabala mapati-pati, naa kutweenga mumusyobo uumbi. Kukaambo kapati akamwi, amulembe twaambo ntomuya kubelesya kukapandulula. Amulembe magwalo ngomuyanda kuyoobala. Kanji-kanji cilagwasya ikwaabala magwalo mu Bbaibbele. Amuzilembe zikozyanyo nzyomuyanda kuyoobelesya. Ambweni inga kamuli amakani amwi ayandika kapati ngomwakabala mumabbuku aakunyika ngomukonzya kubelesya. Amutulembe twaambo toonse ikutegwa mube atwaambo tugaminide. Itwaambo tuyoouba-uba kutubelesya ikuti katulembedwe kabotu.

Ibamwi babelesya twaambo tusyoonto buyo. Twaambo ootu tulakonzya kuba buyo amabala ayandika kapati, amagwalo imwaambi ngayoozubulula kuzwa mumoyo azifwanikiso ziyoomugwasya ikwiibaluka zyakwaamba. Kwiinda mutwaambo ootu tusyoonto, imwaambi ulakonzya kwaamba makani munzila iitobelene akukanana cakulikwaya. Aayo ngamakanze aciiyo eeci.

Apeeji 39 kusika ku 42 mubbuku lino, mulajana cibalo caamba kuti “Ikulibambila Twaambo Tupati-Pati.” Ciyoomugwasya kapati ikwaabala makani aaya nomulibambila ciiyo eeci cakuti, “Ikubelesya Twaambo Tupati-Pati.”

Mbokubelesyegwa Twaambo Tupati-Pati. Pele lino makanze aanu taali aakulibambila makani aaya katuli twaambo tupati-pati. Ngakubelesya twaambo ooto munzila iigwasya.

Nzila yakusaanguna mukubelesya twaambo ootu nkulibambila mbomuya kukanana. Amulange mutwe wamakani, amubale kaambo kapati akamwi mubone mbokeendelana amutwe wamakani. Amubone ciindi ncomukonzya kutola kukaambo kapati akamwi. Lino amusitikile kubala kaambo kapati kakusaanguna. Amutwiinduluke twaambo tupa bumboni, imagwalo, zikozyanyo azitondezyo nzyomuyanda kuyoobelesya mukupandulula kaambo aako. Amwaainduluke-induluke makani aayo kusikila limwi mwacizyibila cibeela eeco. Amucite mbubwenya oobo akutwaambo tumbi tupati-pati. Amubone nzyomukonzya kugusya ikuti kakuyandika, kucita kuti mumanizye muciindi. Mwacita boobo, amwaainduluke makani oonse. Amubikkile maano kutwaambo ikutali kumabala. Mutaabikki mumutwe buya makani oonse.

Nomukanana makani, mweelede kubalanga ibamuswiilila ciindi aciindi. Mwamana kubala lugwalo, bunji bwaziindi mweelede kulupandulula kwiinda mukubelesya Bbaibbele pele kakunyina kulanga zilembedwe apepa. Mubwenya buyo, nomupa cikozyanyo, amucaambe mbuli mbomukonzya kwaambila beenzyinyoko ikutali kucibala buya. Nomukanana, mutani kulangi atwaambo tulembedwe mwayanda kwaamba kaambo akamwi. Amukanane kuzwa mumoyo kutegwa makani abanjile mumoyo ibamuswiilila.

Mwacizyiba kukanana kabotu kwiinda mukubelesya buyo twaambo tupati-pati, ciyoomugwasya kapati ikuyaambele akuba baambi bacizyi kukanana kubuleya.