Cibalo 13

Aabo Ibakaba Basikwiiya Ba Jesu

INO mmubelesi wa Jehova uuli imubotu kwiinda boonse ibakaponede?— Wavwiila kabotu, ngu Jesu Kristo. Sena uyeeya kuti tulakonzya kuba mbuli nguwe?— Ee, Ibbaibbele lyaamba kuti wakatusiila cikozyanyo cakuti tutobele. Alimwi ututamba kuti tube basikwiiya bakwe.

Sena ulicizyi ncocaamba ikuba sikwiiya wa Jesu?— Caamba zintu zinji. Cakusaanguna, tweelede kwiiya kulinguwe. Pele kuli azimbi nzyotweelede kwiiya. Alimwi tweelede kuzisyoma ncobeni nzyaamba. Ikuti katuzisyoma, tuyoozicita nzyatwaambila kuti tucite.

Ibantu banji baamba kuti balamusyoma Jesu. Sena uyeeya kuti boonse mbaasikwiiya bakwe beni-beni?— Peepe, ibunji bwabo tabali basikwiiya bakwe beni-beni pe. Balakonzya kabaunka kucikombelo. Pele bunji bwabo tabana kubikkila maanu kukwiiya zintu Jesu nzyaakayiisya. Mubwini, balikke ibatobela cikozyanyo ca Jesu mbabasikwiiya bakwe.

Nkooko lino atubandike baabo ibakali basikwiiya ba Jesu naakali muntunsi anyika. Umwi wabaabo ibakaba basikwiiya bakusaanguna wakali Filipo. Ciindi cimwi Filipo wakaunka kumweenzinyina Natanayeli (wiitwa kuti Bartolomayo), ooyo ngobona mucifwanikiso kakkede mucimvwule camusamu. Eelyo Natanayeli naakasika kuli Jesu, Jesu wakaamba kuti: “Amubone, mu-Israyeli mwinimwini uutakwe luuni.” Natanayeli wakagambwa eelyo wakabuzya kuti: “Ino wandiziba buti?”

Jesu wakati: ‘Ede, katana kukwiita Filipo, ndakubona kocili munsi lyamukuyu.’ Natanayeli wakagambwa kuti Jesu wakaazyiba eeni mpaakabede, aboobo Natanayeli wakati: “Nduwe Mwana a-Leza, nduwe Mwami wa-Israyeli.”—Johane 1:49.

Ba Filipo alimwi a Natanayeli kabatana kuba basikwiiya ba Jesu, kuli bambi ibakaba basikwiiya. Aaba bakali ba Andreya amupati wakwe Petro kubikkilizya a Johane alimwi ambweni amunyina Johane imupati uutegwa Jakobo. (Johane 1:35-51) Pele kumbele, aaba bone bakapiluka kumakwebo aabo aakuzuba nswi. Mpoonya bumwi buzuba eelyo Jesu naakali kweenda kumbali aa Lwizi lwa Galilaya, wakabona Petro alimwi a Andreya kabawaala lusabwe mulwizi. Jesu wakabaambila kuti: “Amunditobele.”

Kuzwa waawo, Jesu wakabona Jakobo alimwi a Johane. Bakali mubwaato abausyi, kabasuma-suma tunsabwe twabo. Abalo aaba Jesu wakabaambila kuti bamutobele. Ino ncinzi ncowakali kunoocita ikuti Jesu naakakwiita? Sena nowakaleka milimo yako akumutobela ndilyonya eelyo?— Ibaalumi aaba bakalimuzyi Jesu. Bakalimuzyi kuti wakatumidwe aa Leza. Aboobo, ndilyonya bakasiya mulimo wabo wabuzubi akumutobela Jesu.—Matayo 4:18-22.

Eelyo baalumi aabo nobakaba basikutobela Jesu, sena caamba kuti kuzwa ciindi eeco bakali kucita buyo ziluleme?— Peepe. Ulakonzya kwiibaluka kuti ibaalumi aaba mane bakazwangana mulicabo-cabo kujatikizya ooyo wakali mupati akati kabo. Pele bakamumvwida Jesu alimwi bakalilisungwide kucinca bukkale bwabo ambobakali kuzilanga zintu. Ikuti katulisungwide kucinca, aswebo tulakonzya kuba basikwiiya ba Jesu.

Jesu wakatamba bantu boonse kuti babe basikwiiya bakwe. Cimwi ciindi, imweendelezi umwi uuvwubide imwana-mwana wakasikila Jesu akumubuzya ncaakeelede kucita kutegwa abe aabuumi butamani. Eelyo mweendelezi ooyo imwana-mwana naakaamba kuti wakali kwiitobela milawo ya Leza kuzwa kubwana, Jesu wakamwaambila kuti: ‘Boola unditobele.’ Sena ulicizyi cakacitika kuzwa waawo?—

Imwaalumi ooyo naakamvwa kuti ikuba sikwiiya wa Jesu ncicakeelede kuba cintu ciyandika kapati kwiinda kuba muvwubi, wakatyompwa kapati. Kunyina naakaba sikwiiya wa Jesu akaambo kakuti wakali kwaayanda kapati mali kwiinda mbwaakali kumuyanda Leza.—Luka 18:18-25.

Jesu naakamana kukambauka afwaafwi kwamwaka omwe acisela, wakasala bantu bali 12 akati kabasikwiiya bakwe kuba baapostolo. Ibaapostolo bakali baalumi mbaakatuma kuti bacite mulimo waalubazu. Sena ulibazyi mazinaabo?— Atubone naa inga twaazyiba mazinaabo. Langa zifwanikiso zyabo aawa, ubone naa inga waamba mazinaabo. Mpoonya soleka kwaamba mazinaabo kakunyina kwaalanga.

Mukuya kwaciindi, omwe akati kabaapostolo bali 12 wakabija. Ooyo wakali Judase Iskariote. Naakabija boobo, sikwiiya uumbi wakasalwa kuti abe mwaapostolo. Sena ulimuzyi izina lyakwe?— Wakali Matiya. Kumbele, awalo Paulo alimwi a Barnaba bakaba baapostolo, pele tiibakali akati kabaapostolo bali 12 pe.—Incito 1:23-26; 14:14.

Mbubwenya mbotwakaiya mu Cibalo 1 cabbuku lino, Jesu wakali kubayanda bana basyoonto. Ino nkaambo nzi ncaakali kubayanda?— Nkaambo wakalizyi kuti abalo balakonzya kuba basikwiiya bakwe. Mubwini, bunji bwaziindi bana basyoonto balakonzya kwaamba zintu munzila iinga yapa kuti bapati baswiilile alimwi akuyanda kwiiya zinji kujatikizya Mwiiyi Mupati.

Abanakazi banji abalo bakaba basikwiiya ba Jesu. Ibamwi bakali kweenda anguwe naakali kuya kuminzi iimbi kuyookambauka. Akati kabaabo bakacita boobo, kuli Mariya Magadalene, Johana alimwi a Susana. Alimwi ambweni bakagwasilizya mukumujikila zyakulya Jesu alimwi akucapa zyakusama zyakwe.—Luka 8:1-3.

Sena ulayanda kuba sikwiiya wa Jesu?— Koyeeya kuti, ikwiile kwaamba kuti ndili umwi wabasikwiiya bakwe takutupi kuba basikwiiya pe. Tweelede kucita zintu mbuli sikwiiya kufwumbwa ooko nkotubede, ikutali buyo leelyo notuli kumiswaangano ya Bunakristo. Sena kuli masena ngoyeeya ooko nkotuyandika kucita zintu mbuli sikwiiya wa Jesu?—

Inzya nkwaali, tweelede kucita oobo amunzi. Pele alimwi ibusena bumbi nkotweelede kucita oobo nkuucikolo. Ncotuteelede kuluba yebo andime ncakuti ikutegwa tube sikwiiya wa Jesu mwini-mwini, tweelede kucita zintu mbwaakali kuzicita walo ciindi coonse, buzuba abuzuba kunyina makani ankotubede.

Lino atubale antoomwe caamba Bbaibbele kujatikizya basikwiiya ba Jesu, kuli Matayo 28:19, 20; Luka 6:13-16; Johane 8:31, 32; alimwi a 1 Petro 2:21.

[Cifwanikiso icili apeeji 72]

Ino mwaalumi ooyu nguni, alimwi mbuti mbwaakaba sikwiiya wa Jesu?

[Cifwanikiso icili apeeji 73]

Ino mbaani Jesu mbali mukwiita kuti babe basikwiiya bakwe?

[Zifwanikiso izili apeeji 75]

Petro

Andreya

Jakobo (mwanookwabo a Johane)

Johane

Filipo

Natanayeli

Matayo

Tomaso

Jakobo (mwanaa Alifayo)

Simoni

Judase (alimwi wiitwa kuti Tadayo)

Judase Iskariote

[Cifwanikiso icili apeeji 76]

Ino banakazi aaba ibakagwasya Jesu naakali kukambauka bakali bani?

[Cifwanikiso icili apeeji 76]

Nkuukuli nkociyandika kuti katucita zintu mbuli sikwiiya wa Jesu?