Jesu Wasala Baapostolo Bali Kkumi Ababili

Kwainda mwaka omwe acisela kuzwa ciindi Johane Mubbapatizi naakaamba Jesu kuti Mwanaambelele wa Leza. Jesu naakatalika mulimo wakwe wakubuleya, baalumi basyomeka bali mbobabede bakaba basikwiiya bakwe, balo babikkilizya Andreya, Simoni Petro, Johane ambweni a Jakobo (mwanookwabo Johane), Filipo alimwi a Bartolomayo (ooyo alimwi iwiitwa kuti Natanayeli). Mukuya kwaciindi abambi banji bakatalika kumutobela Kristo.—Johane 1:45-47.

Lino Jesu ulilibambilide kusala baapostolo bakwe. Aaba balaba balongwe bakwe mbanikweenda limwi lyoonse alimwi balapegwa lwiiyo lwaalubazu. Pele katanabasala, Jesu waunka acilundu, ambweni cilundu icilaafwaafwi a Lwizi lwa Galilaya munsi-munsi amunzi wa Kapernauma. Wapaila busiku boonse, cakutadooneka kulomba kuti Leza amupe busongo akumulongezya. Nobwaca, waita basikwiiya bakwe mpoonya wasala bali 12 akati kabo kuba baapostolo.

Jesu wasala bali cisambomwe ibaambwa kumatalikilo aacibalo eeci, kubikkilizya a Matayo, ooyo iwakali aŋanda iitelelwa mitelo ciindi Jesu naakamwiita. Ibambi bosanwe ibasalwa mbaa Judasi (ooyo alimwi iwiitwa kuti Tadayo akuti “mwana wa Jakobo”), Simoni mu Kanana, Tomasi, Jakobo mwana wa Alifayo, alimwi a Judasi Isikariote.—Matayo 10:2-4; Luka 6:16.

Kusikila lino aaba ibali 12 bali kweenda a Jesu, alimwi ulibazyi kabotu. Bamwi akati kabo mbabbululu bakwe. Jakobo amwanookwabo Johane mbanabokwabo Jesu kubacizyi babanyina. Alimwi ikuti Alifayo wakali mwanookwabo Josefa, bausyi Jesu, kweelana ambobayeeya bamwi, nkokuti mwana wa Alifayo, imwaapostolo Jakobo, awalo mwanookwabo Jesu.

Tacimukatazyi Jesu kuyeeya mazina aabaapostolo bakwe. Pele sena nywebo mulakonzya kwaayeeya? Nzila imwi iikonzya kumugwasya nkuyeeya kuti kuli ba Simoni bobilo, ba Jakobo bobilo, alimwi aba Judasi bobilo. Simoni (Petro) ulijisi mwanookwabo Andreya, mpoonya Jakobo (mwana wa Zebedayo) ulijisi mwanookwabo Johane. Oobu mbomukonzya kuyeeya mazina aabaapostolo bali lusele. Ibambi bone babikkilizya simutelo (Matayo), umwi wakazyikudooneka (Tomasi), umwi iwakaitwa naakali munsi acisamu (Natanayeli) alimwi amweenzinyina wa Natanayeli (Filipo).

Baapostolo bali 11 bazwa ku Galilaya, kumizyaabo Jesu. Natanayeli uzwa ku Kana. Filipo, Petro alimwi a Andreya bakazwa ku Betesaida. Mpoonya Petro a Andreya bakalongela ku Kapernauma, ooko kuboneka kuti nkwaakali kukkala Matayo. Jakobo a Johane bakkala ku Kapernauma naa afwaafwi ankuko, alimwi bakali kubeleka mulimo wakuzuba nswi munsi-munsi ankobakkala. Kuboneka kuti Judasi Isikariote, ooyo kumbele iwakaaba Jesu, ngomwaapostolo alikke buyo uuzwa ku Judaya.