Cibalo 17

Mbokonzya Kuba Muntu Uukkomene

TOONSE tulayandisya kuti katukkomene, tee kayi?— Pele, tabali banji ibantu bakkomene ncobeni. Sena ulikazyi kaambo ikapa kuti kabatakkomene?— Nkaambo kunyina nobayiya nzila mbobakonzya kuba bantu bakkomene. Bayeeya kuti ikubaa zintu zinji ncecinga cabapa lukkomano. Pele eelyo nobazijana zintu eezyi, ilukkomano lwabo taluzumanani pe.

Aawa mpaali kaambo kapati. Imwiiyi Mupati wakati: ‘Kuli lukkomano lunji mukupa kwiinda mukutambula.’ (Incito 20:35) Aboobo, ino mbuti mbotukonzya kuba bantu bakkomene lyoonse?— Inzya, nkwiinda mukupa bamwi alimwi akubacitila zintu zimwi. Sena walizyi oobo?—

Atwaayeeyele makani aaya alimwi. Sena Jesu wakaamba kuti imuntu watambula cipego tanaakali kunookkomene?— Peepe, teensyi mbwaakaamba oobo pe. Ulacikkomanina kupegwa zipego, tee kayi?— Mbocibede oobo kumuntu oonse. Tulakkomana notupegwa zintu zibotu.

Pele Jesu wakaamba kuti kuli lukkomano lunji notupa bamwi. Aboobo, ino nguni ngoyeeyela kuti nguwapa bantu zintu zinji kwiinda muntu uuli woonse?— Inzya, ngu Jehova Leza.

Ibbaibbele lyaamba kuti, Leza “nguubapa boonse buumi, amuuya, azintu zyoonse.” Ulatupa imvwula kuzwa kujulu alimwi alumwi ikutegwa kumene zisyango akuti tujane zyakulya. (Incito 14:17; 17:25) Anu Bbaibbele ncolyaamba Jehova kuti ‘ngu Leza uukkomene’! (1 Timoteo 1:11) Ikupa bamwi zintu ncimwi camilimo iimukkomanisya Leza. Alimwi eelyo notupa bamwi, aswebo tulakkomana.

Ino nzintu nzi nzyotunga twapa bantu? Ino inga waingula buti?— Zimwi ziindi icipego cilakonzya kuulwa mali manji. Ikuti kacili cipego nconga waula kucintoolo, weelede kucibbadalila mali. Aboobo ikuti koyanda kupa cipego cili boobo, inga wayandika kuyobola mali kusikila leelyo nonoojisi mali aakonzya kuula cipego eeco.

Pele talili lyoonse zipego nozyeelede kuulwa buya. Mucikozyanyo, nokupya, ikunywa maanzi aatontola ncintu cikatalusya kapati. Aboobo eelyo nopa muntu uufwide nyota maanzi aatontola, ulakonzya kukkomana akaambo kakupa ooko nkoocita.

Bumwi buzuba ambweni yebo abanyoko muyookumba cibwantu. Ikucita boobo kulakondelezya. Pele, ino ncinzi nconga wacita acibwantu eeco icinga cakupa kukkomana kapati kwiinda kwiile kucinywa coonse olikke?— Inzya, ulakonzya kupa cibwantu cimwi kumulongwe wako umwi. Sena ulayanda kuyoocita oobo cimwi ciindi?—

Imwiiyi Mupati alimwi abaapostolo bakwe boonse buyo bakalicizyi mbocikkomanisya ikwaabila bamwi. Sena ulicizyi ncobakapa bantu?— Cakali cintu ciinda zintu zyoonse kubota munyika! Bakali kazyi kasimpe kajatikizya Leza, alimwi calukkomano bakaambila bamwi makani aaya mabotu. Bakacita oobu kakunyina kubbadalisya muntu uuli woonse kuzintu nzyobakabacitila.

Bumwi buzuba, imwaapostolo Paulo amulongwe wakwe ngwaakali kuyandisya, sikwiiya Luka bakaswaanganya mwanakazi awalo iwakali kuyanda kuti kakkomana akaambo kakupa. Bakamuswaanganya kumulonga. Paulo a Luka bakaunka kubusena oobo akaambo kakuti bakaambilidwe kuti mbusena bwakukombela. Aaya akali masimpe nkaambo kakuti nobakasika kubusena oobo, bakajana bamakaintu bamwi balapaila.

Paulo wakatalika kwaambila banakazi aabo makani mabotu aajatikizya Jehova Leza alimwi a Bwami bwakwe. Umwi akati kabanakazi wakali Ludiya, alimwi wakaswiilila kapati. Kuzwa waawo, Ludiya wakayanda kucita cintu cimwi kutondezya kuti wakaakkomanina ncobeni makani mabotu ngaakateelela. Aboobo wakakombelezya Paulo alimwi a Luka ategwa: “Na mwati ndisyomekede ku-Mwami amunjile muŋanda yangu, mukale.” Eelyo wakazumanana kubakombelezya kuti baunke kuŋanda yakwe.—Incito 16:13-15.

Cakamukkomanisya kapati Ludiya ikwiizya ababelesi ba Leza aaba muŋanda yakwe. Wakabayanda akaambo kakuti bakamugwasya kwiiya makani aajatikizya Jehova alimwi a Jesu kubikkilizya akugwasya bantu kuzyiba mbobanga bapona kukabe kutamani. Cakamukkomanisya kapati kuti wakakonzya kupa Paulo a Luka cakulya alimwi aakoona. Aboobo ikupa nkwaakacita Ludiya kwakamukkomanisya akaambo kakuti ibwaabi bwakwe wakabucita amoyo wakwe woonse. Eeco ncecintu ncotweelede kuyeeya lyoonse. Imuntu umwi ulakonzya kutwaambila kuti tweelede kupa bamwi cipego. Pele, ikuti katutayandi kucita boobo camoyo woonse, ikupa ooko takukatukkomanisyi pe.

Mucikozyanyo, ino mbuti kuti kojisi nswiiti njoyanda kulya? Ikuti ndakwaambila kuti weelede kumukomweda mweenzinyoko, sena inga cakukkomanisya kucita boobo?— Pele ino mbuti kuti kojisi maswiiti aali mbwaabede eelyo noswaanganya mulongwe wako ngoyandisya? Ikuti nduwe waliyeeyela buya kuti upe mweenzinyoko maswiiti amwi, sena eeco tacikakukkomanisyi?—

Zimwi ziindi tulakonzya kumuyanda kapati muntu umwi cakuti inga twayanda kumupa zyoonse nzyotujisi kakunyina ncotucaala ancico swebo. Mbotuyaambele mukuyanda Leza, oobo mbotweelede kulimvwa kujatikizya Nguwe.

Kuli mwanakazi umwi imucete Mwiiyi Mupati ngwaakazyi iwakalimvwa boobo. Wakamubona mutempele ku Jerusalemu. Wakajisi buyo tukkobili tobile; ooto ntwaakajisi tolikke. Pele wakatusanga toonse muciyobwedo camali naa wakapa cipego kutempele. Kunyina muntu wakamusungilizya kucita boobo. Ibunji bwabantu bakali munsi lyakwe kunyina anobakacibona ncaakacita. Wakacita oobo akaambo kaluyandisisyo ndwaakajisi lwakupa alimwi akaambo kakuti wakali kumuyanda kapati Jehova. Cakamukkomanisya kuti wakakonzya kucita boobo.—Luka 21:1-4.

Kuli nzila zinji motunga twapa bamwi. Sena kuli nzila nzyonga waamba?— Ikuti twapa bamwi akaambo kakuyanda kucita boobo camoyo woonse, tuyookkomana. Nkakaambo kaako Mwiiyi Mupati ncatwaambila kuti: “Amupe.” (Luka 6:38) Ikuti twacita oobo, tuyoobakkomanisya bantu bambi. Alimwi swebo tunookkomene kwiinda boonse!

Atubale makani aambi aatondezya mbotukkomana ciindi notupa kuli Matayo 6:1-4; Luka 14:12-14; alimwi a 2 Ba-Korinto 9:7.

[Cifwanikiso icili apeeji 92]

Ino nkaambo nzi Jehova ncali ‘Leza uukkomene’?

[Cifwanikiso icili apeeji 93]

Ino ncinzi cinga cakukkomanisya kapati muciindi cakulya zintu zyoonse nzyoojika olikke?

[Cifwanikiso icili apeeji 94]

Ino ncinzi Ludiya ncali mukwaamba kuli Paulo alimwi a Luka?

[Cifwanikiso icili apeeji 94]

Ino nkaambo nzi Ludiya ncakkomene ikubapa nzyobayandika ba Paulo a Luka?

[Cifwanikiso icili apeeji 96]

Ino nkaambo nzi mwanakazi ooyu mucete ncaakakkomene ikupa zyoonse nzyaakajisi?