“Cakali Cipego Cibotu Kwiinda Zipego Zyoonse Nzyondakatambula Kale”

Oobu mbwaakalimvwa musimbi uujisi myaka yakuzyalwa iili 13 ciindi naakapegwa kabwa. Mukaintu umwi simakwebo wakaamba kuti kkompyuta njobakamupa bausyi ciindi naakacili kucikolo, cakali ncecipego icakacinca buumi bwakwe. Mpoonya mulumi umwi iwakakwata caino-ino wakalimvwa kuti kkaadi njaakamupangila mukaintu wakwe yakuyeeya buzuba mbobakakwatana, cakali cipego cibotu kwiinda ncaatakalina buzuba watambula.

Mwaka amwaka, bantu banji balasowa ciindi cinji alimwi akusolekesya canguzu kuyandaula cipego eeco “cibotu kwiinda” cakupa mulongwe wabo naa wacibbululu mubuzuba bwaalubazu. Alimwi bunji bwabantu ibapa zipego inga bakkomana kumvwa majwi mbuli yaaya aambwa kumatalikilo. Ino mbuti nywebo? Sena inga mwayanda kupa naa kutambula zipego zikkomanisya kapati?

Eeci cilakonzya kukkomanisya kapati ikutali buyo akaambo kambwakonzya kulimvwa sikupegwa, pele alimwi akaambo kambwakonzya kulimvwa sikupa cipego. Kayi Bbaibbele lyaamba kuti: “Kupa kulakkomanisya kapati kwiinda kupegwa.” (Milimo 20:35) Pele sikupa cipego ulakonzya kwiindila kukkomana ikuti naa sikupegwa cipego wacikkomanina kapati.

Aboobo, ncinzi ncomukonzya kucita kutegwa kupa zipego kakumuletela lukkomano lwini-lwini nywebo alimwi abaabo mbomupa? Alimwi ikuti naa kacitakonzyeki kupa cipego ncomuyeeyela kuti “ncibotu kwiinda,” ncinzi ncomukonzya kucita kutegwa cipego canu bakacikkomanine kapati bamwi?