Cipego ca Leza Icipati Kwiinda Zyoonse​—Nkaambo Nzi Ncociyandika Kapati?

INO NGUNI WAKACIPA?

Zipego zimwi zilayandika kapati akaambo kakuti ibakatupa mbantu bali mubweendelezi naa mbotulemeka kapati. Pele zipego zimbi nokuba kuti taziduli, tulaziyanda kapati akaambo kakuti iwakatupa munamukwasyi naa mulongwe wesu ngotusyoma. Oobu mbocakabede kucipego ba Russell ncobakapa ba Jordan, ibaambwa mucibalo cainda. Ino eeci ceendelana buti acipego cacinunuzyo?

Cakusaanguna, Bbaibbele lyaamba kuti “Leza wakatuma Mwanaakwe simuzyalwaalikke munyika ikutegwa tukonzye kuba abuumi kwiinda mulinguwe.” (1 Johane 4:9) Kaambo aaka kamasimpe kapa kuti cipego eeci cibe cintu ciyandika kapati. Kunyina muntu uujisi nguzu kapati kwiinda Leza. Kujatikizya nguwe, sintembauzyo muna Hebrayo wakalemba kuti: “Yebo, oojisi zina lyakuti Jehova, yebo olikke ndonduwe Mupatikampatila atala aanyika yoonse.” (Intembauzyo 83:18) Tiitwakali kukonzya kutambula cipego kuzwa kumuntu uusumpukide boobu.

Cabili, Leza ngu “Taateesu.” (Isaya 63:16) Munzila nzi? Nguwakatupa buumi. Kuyungizya waawo, ulatulanganya cakusyomeka mbuli usyi uulyaabide mbwalanganya bana bakwe. Kaamba bantu bakwe bamwi bakaindi kuti Efraimu, Leza wakabuzya kuti: “Sena Efraimu tali mwana ngondiyandisya, kalungu kangu kaamoyo? . . . Moyo wangu wapya akaambo kanguwe. Aboobo ziyume zitete ndiyoomufwida lubomba.” (Jeremiya 31:20) Oobo mbwalimvwa Leza amazuba aano kujatikizya bakombi bakwe. Tali buyo Mulengi wesu singuzuzyoonse pele alimwi ngu Taata alimwi Mulongwe wesu uusyomeka. Sena eeci tacipi kuti cipego cili coonse cizwa kulinguwe kaciyandika kapati?

NKAAMBO NZI NCAAKACIPEDA?

Zipego zimwi zilayandika kapati akaambo kakuti zyakapegwa akaambo kaluyando lwini-lwini, ikutali buyo akaambo kakuti zyakeelede kupegwa. Muntu mwaabi ncobeni talangili kuti alumbulwe akaambo kabwaabi bwakwe.

Leza wakatupa Mwanaakwe nkaambo ulatuyanda. Bbaibbele lyaamba kuti: “Lino oobu mbolwakayubununwa luyando lwa Leza kulindiswe, Leza wakatuma Mwanaakwe simuzyalwaalikke.” Ino nkaambo nzi ncaakacitila boobo? “Ikutegwa tukonzye kuba abuumi kwiinda mulinguwe.” (1 Johane 4:9) Sena Leza wakaleelede buya kucita boobo? Peepe! ‘Cinunuzyo ca Kristo Jesu’ ncitondezyo ‘caluzyalo’ lwa Leza.—Baroma 3:24.

Nkaambo nzi cipego ca Leza ncocili citondezyo ‘caluzyalo’? Bbaibbele lipandulula kuti: “Leza watutondezya luyando lwakwe mwini mukuti notwakacili basizibi, Kristo wakatufwida.” (Baroma 5:8) Luyando lwini-lwini ndolwakapa kuti Leza abweze ntaamu ikugwasya bantu banyina nguzu, batajisi bulangizi, basizibi. Tiitwakeelede kucitilwa luyando luli boobu, alimwi tacikonzyeki kumubbadela. Cipego cakwe ncitondezyo cipati caluyando ciinda zyoonse.

INO NZINTU NZI ZYAKAJATIKIZYIDWE?

Zipego zimwi zilayandika kapati akaambo kakuti zitondezya zintu zipati nzyaakacita sikupa. Ciindi muntu naalisungula kwaaba cintu cimwi ciyandika kapati kulinguwe akutupa, tulacikkomanina kapati cipego eeco akaambo kazintu zijatikizyidwe.

Leza “wakapa Mwanaakwe simuzyalwaalikke.” (Johane 3:16) Kunyina muntu uumbi ngwayandisya kapati ngwaakali kukonzya kutupa. Kwamyaka iitabaliki ciindi Leza naakali kulenga bubumbo, Jesu wakali kubeleka antoomwe anguwe alimwi wakaba muntu “ngwaakali kuyanda kapati.” (Tusimpi 8:30) Jesu ngo ‘Mwana ngwayandisya’ Leza alimwi ‘ncinkozya ca Leza uutalibonyi.’ (Bakolose 1:13-15) Tatukonzyi kweezyeezya mbocili ciyumu cilongwe iciliko akati ka Leza a Jesu.

Nokuba boobo, Leza “tanaakalesya Mwanaakwe mwini kupenga.” (Baroma 8:32) Jehova wakatupa cintu ciyandika kapati. Kunyina cipego cakamupa kusweekelwa kapati kwiinda ceeci.

KUZUZIKIZYA CINTU CIYANDIKA KAPATI

Zipego zimwi zilayandika kapati akaambo kakuti zizuzikizya cintu ciyandika kapati, nociba ceeco ciyandika cakufwambaana. Mucikozyanyo, inga twamulumba kapati muntu uulisungula kutubbadelela mali aabusilisi ngotutakonzyi kubbadela kutegwa tuzumanane kupona. Masimpe cipego eeci inga caba cintu citakonzyi kubbadelwa amali, tee kayi?

“Mbubonya muli Adamu boonse balafwa, mbubonya buyo muli Kristo boonse bayoopegwa buumi.” (1 Bakorinto 15:22) Mbotuli bana ba Adamu, toonse ‘tulafwa,’ tatukonzyi kukweeleba kuciswa akufwa naa kuliyanzanisya tobeni kuli Leza alimwi akulekelelwa milandu yesu. Mbotuli bantu batalondokede, tatukonzyi kulipa buumi naa kupa muntu umwi kuba ‘abuumi.’ Bbaibbele lyaamba kuti: ‘Kunyina naba omwe wabo uukonzya kunununa mwanookwabo nokuba kupa Leza cinunuzyo cakwe . . . Muulo wakunununa lyoonse tabaukonzyi pe.’ (Intembauzyo 49:7, 8) Tuyandika lugwasyo nkaambo tatukonzyi kuubbadela muulo wacinunuzyo. Ikuti tiitwagwasyigwa, inga twabula bulangizi.

Akaambo kaluyando lwakwe lupati, Jehova wakalisungula kubbadelela “musamu” uupa buumi ngotuyandika kutegwa kwiinda muli Jesu ‘boonse bakapegwe buumi.’ Mbuti cinunuzyo mbocizuzikizya makanze aaya? “Bulowa bwa Jesu Mwanaakwe bulatusalazya kuzibi zyoonse.” Inzya, kuba alusyomo mubulowa bwa Jesu ibwakatilwa kupa kuti tulekelelwe zibi alimwi akuyooba abuumi butamani. (1 Johane 1:7; 5:13) Alimwi ino cinunuzyo ciyoobagwasya buti bayandwa besu bafwide? “Mbwaanga lufwu lwakaboola kwiinda mumuntu omwe, abwalo bubuke bwabafwu bulaboola kwiinda mumuntu omwe [Jesu].”—1 Bakorinto 15:21.a

Kunyina cipego icakapegwa amuntu uusumpukide kapati naa icakapegwa akaambo kaluyando lupati mbuli cituuzyo ca Jesu. Kunyina muntu wakasweekelwa kapati akaambo kandiswe mbuli Jehova Leza. Alimwi kunyina cipego cizuzikizya cintu ciyandika kapati kwiinda cituuzyo icitwaangulula kucibi alufwu. Masimpe, kunyina cipego cikonzya kweelana ampindu yacinunuzyo iitakonzyi kupandululwa.