Ino Ncipego Nzi Cibotu Kwiinda Zyoonse?

“Cipego cibotu cili coonse alimwi acipego cilondokede cili coonse zizwa kujulu, zilaseluka kuzwa kuli Taata wamimuni.” (Jakobo 1:17) Lugwalo oolu lwaamba bwaabi bwa Taateesu wakujulu, Jehova Leza. Pele akati kazipego zyoonse Leza nzyaakapa bantu, kuli cipego comwe cibotu kapati kwiinda zyoonse. Ino ncipego nzi eeco? Majwi aa Jesu aazyibidwe kapati aajanika mulugwalo lwa Johane 3:16, atwaambila kuti: “Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atanyonyoonwi, pele abe abuumi butamani.”

Cipego ca Mwana wa Leza simuzyalwaalikke—ncecipego cibotu kwiinda zyoonse umwi aumwi wesu ncaakatambula, nkaambo kwiinda mulincico tulakonzya kwaangululwa kubuzike bwacibi, kucembaala alimwi alufwu. (Intembauzyo 51:5; Johane 8:34) Nokuba kuti twasoleka buti, swebo lwesu kunyina ncotukonzya kucita kutegwa twaangununwe kubuzike oobu. Pele akaambo kaluyando lwakwe lupati, Leza wakatupa cintu ciyandika kutegwa twaangununwe kubuzike oobu. Kwiinda mukutupa Mwanaakwe simuzyalwaalikke, Jesu Kristo, kali cinunuzyo, Jehova Leza wakapa bantu bamvwida ibulangizi bwakuyoopona buumi butamani. Pele ino mubwini cinunuzyo ncinzi? Nkaambo nzi ncociyandika? Alimwi ino inga twagwasyigwa buti ancico?

Cinunuzyo muulo uubbadelwa kutegwa cintu cimwi cipilusyigwe naa kutegwa muntu aangununwe mubuzike. Bbaibbele lipandulula kuti bazyali besu bakusaanguna ba Adamu a Eva, bakalengwa kabanyina cibi, kabajisi bulangizi bwakukkomana abuumi butamani muparadaiso anyika antoomwe abana babo mbobakali kuyoozyala. (Matalikilo 1:26-28) Cuusisya ncakuti, bakasweekelwa zintu eezyi zyoonse kwiinda mukusala kutamvwida Leza—aboobo bakaba basizibi. Ino ncinzi cakatobela? Bbaibbele lyaamba kuti: “Cibi cakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse nkaambo boonse bakabisya.” (Baroma 5:12) Muciindi cakubapa buumi bulondokede bana bakwe, Adamu wakabapa cibi alimwi amapenzi aaboola akaambo kacibi, nkokuti lufwu.

Caboola kumakani aacinunuzyo, cintu cibbadelwa ceelede kuti kaceelene acintu cakasweeka. Ciindi Adamu naatakamvwida Leza acaali, wakabisya aboobo wakasweekelwa buumi bulondokede. Kweelana ancolyaamba Bbaibbele, eeci cakapa kuti bana ba Adamu babe bazike bacibi alufwu. Aboobo kwakali kuyandika kwaaba buumi bumbi bulondokede—buumi bwa Jesu—kutegwa cikonzyeke kwaangununwa kubuzike oobu. (Baroma 5:19; Baefeso 1:7) Eeci cakakonzyeka akaambo buyo kakuti Leza wakatondezya luyando lwakwe kwiinda mukubbadela cinunuzyo eeci kutegwa bantu babe acoolwe ncobakasweekelwa ba Adamu a Eva, nkokuti buumi butamani anyika yaparadaiso.—Ciyubunuzyo 21:3-5.

Akaambo kazintu zikonzyeka akaambo kacinunuzyo, tacidoonekwi kuti cipego ncaakapa Leza icipa kuti buumi butamani bukonzyeke, ncecipego cibotu kwiinda zyoonse. Ikutegwa tucizyibe “cipego cilondokede” eeci mbocibede, atubone mboceendelana atwaambo itutugwasya kupa zipego zibotu kapati kweelana ambotwabandika mucibalo cainda.

Cizuzikizya cintu ncotuyandisya. Tobantu swebo twakalengwa katujisi luyandisisyo lwakuzumanana kupona. (Mukambausi 3:11) Nokuba kuti swebo lwesu kutugama tatukonzyi kukuzuzikizya kulombozya ooko, cinunuzyo cilakonzya kupa kuti eeco cikonzyeke. Bbaibbele lyaamba kuti: “Nkaambo cakuvwola cacibi ndufwu, pele cipego ncapa Leza mbuumi butamani kwiinda muli Kristo Jesu Mwami wesu.”—Baroma 6:23.

Cizuzikizya nzyotuyandika. Bantu tiibakali kukonzya kupa cinunuzyo. Bbaibbele lipandulula kuti: “Muulo wakunununa buumi bwabo ngwaatala kapati cakuti lyoonse tabaukonzyi pe.” (Intembauzyo 49:7, 8) Nkakaambo kaako, twakali kuyandika lugwasyo kuzwa kuli Leza kutegwa twaangununwe kubuzike bwacibi alufwu. Pele ‘kwiinda mukutwaangununa acinunuzyo ca Kristo Jesu,’ Leza wakapa cintu ciyandika kapati.—Baroma 3:23, 24.

Cakapegwa aciindi ceelede. Bbaibbele litwaambila kuti: “Notwakacili basizibi, Kristo wakatufwida.” (Baroma 5:8) Akaambo kakuti cakapegwa “notwakacili basizibi,”cinunuzyo citupa kuti tusinizye luyando ndwajisi Leza kulindiswe nokuba kuti tatulondokede. Alimwi citupa kuti katulangila zintu zinji ziboola kumbele, nokuba kuti tweelede kuliyumya kumapenzi aaboola akaambo kacibi.

Citondezya makanze mabotu. Bbaibbele lilatwaambila cakapa kuti Leza aabe Mwanaakwe kuba cinunuzyo: “Lino oobu mbolwakayubununwa luyando lwa Leza kulindiswe, Leza wakatuma Mwanaakwe simuzyalwaalikke munyika ikutegwa tukonzye kuba abuumi kwiinda mulinguwe. Iluyando lwaambwa waawa taluli akaambo kakuti swebo twali kumuyanda Leza pe, pele walo nguwakatuyanda.”—1 Johane 4:9, 10.

Ino mbuti mbomukonzya kutondezya kuti mulalumba akaambo kacipego cibotu kwiinda zyoonse? Kamuyeeyede kuti majwi aa Jesu aali kuli Johane 3:16 atondezya kuti aabo balikke ‘basyoma’ nguwe mbobayoofwutuka. Kweelana ancolyaamba Bbaibbele, lusyomo “mbulangizi businizyidwe bwaceeco cilangilwa.” (Bahebrayo 11:1) Ikutegwa tube abulangizi oobu, cilayandika kapati kuba aluzyibo lwini-lwini. Aboobo tumukulwaizya kuba aciindi cakwiiya kujatikizya Jehova Leza, Sikupa “cipego cilondokede” eeci, alimwi akulanga-langa ncomweelede kucita kutegwa mukakkomane abuumi butamani akaambo kacinunuzyo ncaakapa Jesu.

Mulakonzya kwiiya zyoonse eezyi kwiinda mukulingula makani aamu Magwalo aajanika aa www.jw.org/toi. Bakamboni ba Jehova bayookkomana kumugwasya. Tulijisi lusyomo lwakuti mbomuyaabwiiya kujatikizya bubotu bwacipego eeci cibotu kwiinda zyoonse, muyookulwaizyigwa kwaamba kuti: “Aalumbwe kaka Leza iwandivwuna kwiinda muli Jesu Kristo Mwami wesu!”—Baroma 7:25.