Cibalo 24

Utakabi Mubbi!

SENA kuli ciindi muntu umwi naakakubbida cintu cimwi?— Ino wakalimvwa buti?— Ooyo wakabba mmubbi, alimwi kunyina muntu uuyanda muntu mubbi. Ino uyeeya kuti muntu utalika buti kubba? Sena ulazyalwa kali mubbi?—

Twazwa mukwiiya kuti bantu balazyalwa acibi. Aboobo toonse tatulondokede. Pele kunyina muntu uuzyalwa kali mubbi pe. Imubbi ulakonzya kazwa mumukwasyi mubotu. Ibazyali bakwe abanabokwabo balakonzya kabasyomeka. Pele kuyandisya zintu mbuli mali alimwi azeezyo zyuulwaa mali nkwajisi muntu ooyo nkokunga kwamupa kubba.

Ino nguni ngonga waamba kuti nguwakali mubbi mutaanzi?— Atuyeeyesye. Imwiiyi Mupati kacili kujulu, wakali muzyi muntu ooyo. Ooyo mubbi wakali mungelo. Pele mbwaanga Leza wakabalenga bangelo boonse kabalondokede, ino mbuti mungelo ooyo mbwaakatalika kubba?— Mbubwenya mbotwakaiya mu Cibalo 8 cabbuku lino, wakayanda cintu catakali cakwe. Sena uciciyeeyede cintu eeco?—

Leza naakazwaa kulenga mwaalumi amwanakazi bakusaanguna, imungelo ooyo wakayanda kuti kabamukomba. Tanaakali kuyandika kukombwa pe. Alikke ngobakeelede kukomba ngu Leza. Pele mungelo ooyo wakajana nzila yakuti kakombwa calo cakatondezya kuti wakabba! Kwiinda mukupa kuti ba Adamu a Eva bamukombe, imungelo ooyo wakaba mubbi. Wakaba Saatani Diabolosi.

Ino ncinzi cipa kuti muntu kabba?— Nkuyandisisya cintu citali cakwe. Iluyandisisyo oolu lulakonzya kukomena kapati cakuti lulakonzya kupa bantu nobaba babotu kucita zintu zibyaabi. Zimwi ziindi, ibantu ibaba babbi kunyina nobeempwa akutalika kucita zintu zibotu alimwi. Umwi wabaabo bakacita boobo wakali umwi wabaapostolo ba Jesu. Izina lyakwe wakali Judase Iskariote.

Judase wakalizyi kuti ncibi kubba akaambo kakuti wakayiisyidwe Mulawo wa Leza kuzwa ciindi naakacili mulombe. Wakalizyi kuti cimwi ciindi Leza mane wakalaambawide kuzwa kujulu kwini akwaambila bantu bakwe kuti: ‘Mutabbi.’ (Kulonga 20:15) Judase naakakomena, wakaswaangana a Mwiiyi Mupati eelyo wakaba umwi wabasikwiiya bakwe. Kumbele, Jesu mane wakamusala Judase kuti abe umwi wabaapostolo bakwe bali 12.

Jesu abaapostolo bakwe bakali kweenda limwi. Bakali kulida antoomwe zyakulya. Alimwi mali oonse ngobakajisi akali kuyobolwa mukabbokesi komwe. Ikabbokesi aako Jesu wakakapa Judase kuti kakalanganya. Ibwini mbwakuti imali aayo tanaakali aa Judase pe. Pele sena ulicizyi Judase ncaakacita nokwakainda ciindi cisyoonto buyo?—

Wakatalika kubweza mali mukabbokesi aciindi naatakeelede kucita boobo. Wakali kwaabweza eelyo nokutakwe bantu bambi, alimwi mane wakali kusola kujana nzila yakubweza manji. Wakatalika kuyeeya buyo mali ciindi coonse. Atubone ncolwakapa kuti cicitike luyandisisyo oolo lubyaabi kakusyeede mazuba masyoonto buyo katanajaigwa Mwiiyi Mupati.

Mariya, mucizyi wa Lazaro imulongwe wa Jesu wakabweza mafwuta mabotu kapati akwaatila kumatende aa Jesu. Pele Judase wakatongooka. Sena ulikazyi kaambo kakamupa kutongooka?— Wakati imafwuta aayo akeelede kusambalwa eelyo mali akeelede kupegwa bacete. Pele cini ncaakali kuyanda nkubaa mali manji mukabbokesi ikutegwa aabbe.—Johane 12:1-6.

Jesu wakaambila Judase kuti atamupenzyi Mariya nkaambo wakacita cintu cakali kuyandika. Judase wakanyema ciindi Jesu naakamwaambila boobo, eelyo wakaunka kubapaizi bapati, ibakali basinkondonyinaa Jesu. Bakali kuyanda kumwaanga Jesu, pele bakali kuyanda kuti bamwaange ciindi camasiku ikutegwa bantu batababoni pe.

Judase wakaambila bapaizi kuti: ‘Ndilamwaambila mbomunga mwamujata Jesu ikuti mwandipa mali. Ino mmali nzi ngomutiindipe?’

Ibapaizi bakavwiila kuti: ‘Tulakupa mali aansiliva aali makumi otatwe.’—Matayo 26:14-16.

Aayo mali wakaabweza Judase. Cakakozyenye buyo akuti wakali kusambala Mwiiyi Mupati kubaalumi aabo! Sena inga weezyeezya muntu kacita cintu eeco cibi kapati?— Eeco ncecicitika eelyo muntu natalika kubba mali. Ulaayandisya mali kwiinda mbwayanda bantu bambi akwiinda mbwayanda Leza mwini.

Ambweni ulakonzya kwaamba kuti, ‘Kunyina nondiyooyanda cintu cimwi kwiinda mbondiyanda Jehova Leza.’ Ncibotu ikuti kolimvwa boobo. Eelyo Jesu naakasala Judase kuba mwaapostolo, kulangilwa kuti mbwaakali kulimvwa oobo Judase. Abamwi ibakaba babbi balakonzya kuti abalo bakali kulimvwa mbubwenya oobo. Atubabandike bamwi akati kabo.

Umwi wakali mubelesi wa Leza wazina lya Akani, iwakapona kaindi Mwiiyi Mupati katanazyalwa. Akani wakabona cisani cibotu, ibbwe lyangolida alimwi amali aansiliva aali mbwaabede. Tiizyakali zyakwe pe. Ibbaibbele lyaamba kuti zyakali zya Jehova akaambo kakuti zyakanyanzyidwe basinkondo babantu ba Leza. Pele Akani wakaziyanda kapati cakuti wakazibba.—Joshua 6:19; 7:11, 20-22.

Nceeci cikozyanyo acimbi. Ikaindi, Jehova wakasala Davida kuti abe mwami wabana Israyeli. Bumwi buzuba, Davida wakatalika kweebelela mwanakazi mubotu Bateseba. Wakazumanana kumweebelela Bateseba akuyeeya kumukwata kutegwa abe mukaintu wakwe. Nokuba boobo, wakali mukaintu wa Uriya. Ino ncinzi Davida ncaakeelede kucita?—

Davida wakeelede kucileka kuyeeya zyakukwata Bateseba. Pele tanaakacileka pe. Aboobo, Davida wakamutola kumunzi wakwe. Mpoonya wakalailila kuti Uriya ajayigwe. Ino nkaambo nzi Davida ncaakacita zintu eezyi zibyaabi?— Nkaambo wakazumanana kuyanda mukamuntu.—2 Samuele 11:2-27.

Akaambo kakuti Davida wakeempwa, Jehova wakamulekela kuti kapona. Pele kuzwa ciindi eeco, Davida wakapenga kapati. Imwanaakwe Abisalomu wakali kuyanda kumwaatula Davida aabwami. Aboobo, eelyo bantu nobakali kuboola kuzyoobona Davida, Abisalomu wakali kubakumbatila akubamyonta. Ibbaibbele lyaamba kuti: “Abisalomu wakabba myoyo yabantu ba-Israyeli.” Wakazula bantu aabo kuti bamuyande kapati kuti abe ngomwami muciindi ca Davida.—2 Samuele 15:1-12.

Sena kuli ciindi nookali kuyandisya cintu cimwi mbuli bwakacita Akani, Davida alimwi a Abisalomu?— Ikuti cintu eeco kacili camuntu uumbi, ikuti wacibweza katazyi nkokuti wabba. Sena uciciyeeyede mubbi mutaanzi Saatani ncaakali kuyanda?— Wakali kuyanda kuti bantu kabamukomba muciindi cakukomba Leza. Aboobo, Saatani wakali kubba eelyo naakazula ba Adamu a Eva kuti bamumvwide.

Eelyo muntu najisi cintu, ulijisi nguzu zyakuzumizya weelede kucibelesya. Mucikozyanyo, ulakonzya kuunka mukusobana abana bambi muŋanda yabo. Sena inga kacili buyo kabotu ikubweza cintu cimwi kuzwa kooko akucitola nkomuzwa?— Inga kacitaluzi pe, ccita kuti bausyi naa banyina mweenzinyoko bakuzumizya kucibweza. Ikuti wabweza cintu cimwi muŋanda kakunyina kubalomba bazyali bako nkokuti wabba.

Ino nkaambo nzi nconga wasunkwa kuti ubbe?— Nkaambo uyanda cintu citali cako. Nokuba kuti kunyina muntu uumbi uunga wakubona nocibweza, ino nguni uukonzya kukubona?— Ngu Jehova Leza. Alimwi tweelede kunooyeeya kuti Leza ulakusulaika kubba. Aboobo, luyando ndojisi kuli Leza alimwi akuli simukobonyoko luyookugwasya ikutabba.

Ibbaibbele lilacisalazya kuti kubba ncibi. Walombwa kuti ubale kuli Marko 10:17-19; Ba-Roma 13:9; alimwi a Ba-Efeso 4:28.

[Cifwanikiso icili apeeji 129]

Ino nkaambo nzi Judase ncaakabba?

[Zifwanikiso izili apeeji 130]

Ino nzintu nzi zibyaabi ba Akani a Davida nzyobali mukuyeeya?

[Cifwanikiso icili apeeji 130]

Muunzila nzi Abisalomu mwaakali mubbi?