CIIYO 18
Ino Tubagwasya Buti Bakwesu Bali Mumapenzi?
Dominican Republic
Japan
Haiti
Ikuti kwacitika ntenda, Bakamboni ba Jehova cakufwambaana balapanga bubambe bwakugwasyilizya banyina aabo bacitikilwa ntenda. Milimo iili boobu itondezya luyando lwini-lwini luliko akati kesu. (Johane 13:34, 35; 1 Johane 3:17, 18) Ino bakwesu tubagwasya buti?
Tulasanga mali. Ciindi nikwakali nzala mpati mu Judaya, Banakristo bakusaanguna baku Antiokeya bakatuma mali kubanyina bakumuuya. (Milimo 11:27-30) Mbubwenya buyo, ikuti twazyiba kuti bakwesu kubusena bumwi basikilwa mapenzi, tulasanga zintu zisiyene-siyene akuzituma kumbungano yakubusena ooko kutegwa bape baabo ibali mumapenzi aataambiki.—2 Bakorinto 8:13-15.
Tulabagwasya. Baalu ibali kubusena ooko kwacitika ntenda, balabalangaula basimbungano boonse kutegwa basinizye kuti boonse nkobali alimwi bali kabotu. Kkomiti yabasikugwasyilizya ilakonzya kulanganya mulimo wakutuma zyakulya, maanzi aakunywa mabotu, zyakusama, aakukkala, alimwi akugwasyilizya mumulimo wabusilisi. Bakamboni banji ibajisi luzyibo mumilimo iiyandika balabelesya mali aabo kuunka kubusena kwacitika ntenda kutegwa bakagwasyilizye kuyakulula maanda aabakwesu alimwi a Maanda a Bwami aakanyonyooka. Lukamantano luliko mumbunga alimwi aluzyibo ndotwajana kwiinda mukubelekela antoomwe lulatugwasya kufwambaana kujana lugwasyo ndobayandika bakwesu. Nokuba kuti tugwasyilizya kapati “ibaciinga cesu calusyomo,” tulabagwasyilizya bamwi ikuti kacikonzyeka, tacikwe makani acikombelo nkobazulilwa.—Bagalatiya 6:10.
Tulapa lugwasyo lwakumuuya alwamumizeezo. Aabo ibacitikilwa ntenda inga bayandika luumbulizyo kapati. Muziindi zili boobo, tulajana nguzu kuzwa kuli Jehova, “Leza siluumbulizyo loonse.” (2 Bakorinto 1:3, 4) Tulabandika zisyomezyo zyamu Bbaibbele abaabo ibacitikilwa ntenda, kuyumya lusyomo lwabo muzisyomezyo zyakuti lino-lino Bwami bwa Leza buyoomanizya macise oonse akupenga.—Ciyubunuzyo 21:4.
Nkaambo nzi Bakamboni ncobafwambaana kubweza ntaamu akugwasya banyina ikuti kwacitika ntenda?
Nduumbulizyo luli buti lwakumuuya ndotukonzya kupa kuli baabo ibacitikilwa ntenda?