Ino Makani Nzi Aayo Mabotu?

1. Ino makani nzi aazwa kuli Leza?

Leza uyanda kuti bantu kabapona buumi bukkomanisya anyika. Wakalenga nyika alimwi azintu zyoonse zili mulinjiyo akaambo kakuti ulabayanda bantu. Lino-lino ulabweza ntaamu kutegwa bantu bali muzisi zyoonse bakabe abuumi buli kabotu kumbele. Uyoozigwisya zintu zibaletela mapenzi bantu.​—Amubale Jeremiya 29:11.

Kunyina mfwulumende iyacikonzya kugwisya bugwebenga, malwazi, naa lufwu. Pele kuli makani mabotu. Lino-lino, Leza uyakugwisya mfwulumende zyabantu zyoonse akubikka yakwe. Balelwa bamfwulumende eeyi bayookkala muluumuno alimwi akupona kabotu.​—Amubale Isaya 25:8; 33:24; Daniele 2:44.

2. Nkaambo nzi makani mabotu ncaayandika kapati?

Kupenga kuyoomana ciindi Leza aakugwisya bantu babi anyika. (Zefaniya 2:3) Ino eeci ciyoocitika lili? Ijwi lya Leza lyakasinsima zintu zicitika mazuba aano iziyoosya bantu. Zintu zicitika zitondezya kuti ciindi cakuti Leza abweze ntaamu cili afwaafwi.​—Amubale 2 Timoteyo 3:1-5.

3. Ncinzi ncotweelede kucita?

Tweelede kwiiya makani aajatikizya Leza mu Jwi lyakwe, Ibbaibbele. Lili mbuli lugwalo luzwa kuli usyi bana siluyando. Lilatwaambila mbotukonzya kupona kabotu lino alimwi ambotukonzya kuyooba abuumi butamani anyika. Masimpe, bamwi inga tiibakkomana akaambo kakuti mwiiya Bbaibbele. Pele mbwaanga Leza utusyomezya zintu zibotu kumbele, tatweelede kulekela bantu kututyompya.​—Amubale Tusimpi 29:25; Ciyubunuzyo 14:6, 7.