Nkaambo Nzi Leza Ncajisi Mbunga?

1. Nkaambo nzi Leza ncaakabakamantanya bana Israyeli bansiku?

Leza wakabakamantanya baluzubo lwasikale Abrahamu ikuba cisi alimwi wakabapa milawo. Wakabaita kuti “Israyeli” alimwi wakabapa coolwe cakuba baiminizi babukombi bwakasimpe alimwi ajwi lyakwe. (Intembauzyo 147:19, 20) Aboobo, bantu bamuzisi zyoonse bakali kuyoolongezyegwa akaambo kacisi ca Israyeli.​—Amubale Matalikilo 22:18.

Leza wakasala bana Israyeli kuti babe bakamboni bakwe. Mbobakali kweendelezyegwa bana Israyeli kaindi cilatondezya bantu mbobakonzya kugwasyigwa kuti baitobela milawo ya Leza. (Deuteronomo 4:6) Aboobo, kwiinda mubana Israyeli, bantu abambi bakali kukonzya kumuzyiba Leza wakasimpe.​—Amubale Isaya 43:10, 12.

2. Nkaambo nzi Banakristo bakasimpe ncobakamantene?

Mukuya kwaciindi, Leza wakacileka kubakkomanina bana Israyeli, aboobo wakasala mbungano ya Bunakristo. (Matayo 21:43; 23:37, 38) Lino, mubusena bwabana Israyeli, Banakristo bakasimpe balabeleka kabali bakamboni ba Jehova.​—Amubale Milimo 15:14, 17.

Jesu wakabakamantanya basikumutobela kutegwa bakambauke akugwasya bantu kuba basikwiiya munyika yoonse. (Matayo 10:7, 11; 24:14; 28:19, 20) Mbotuli kumamanino aabweende bwazintu oobu, mulimo ooyu lino wasika mpoubelekwa kapati. Kwaciindi cakusaanguna, Jehova wakamantanya mamiliyoni aabantu mubukombi bwakasimpe kuzwa muzisi zyoonse. (Ciyubunuzyo 7:9, 10) Banakristo bakasimpe balikamantene kutegwa bakulwaizye alimwi akugwasyanya umwi amweenzinyina. Nyika yoonse, balakkomana kutambula malailile aamu Bbaibbele aakozyenye ciindi camiswaangano yabo.​—Amubale Bahebrayo 10:24, 25.

3. Ino mbunga ya Bakamboni ba Jehova iiliko mazuba aano yakatalika buti?

Muma 1870, kabunga kasyoonto kabasikwiiya Bbaibbele kakatalika kujana kasimpe kamu Bbaibbele ikakasweekede kwaciindi cilamfwu. Bakalizyi kuti Jesu wakakamantanya mbungano ya Bunakristo kutegwa kabakambauka, aboobo bakatalisya mulimo wakukambauka makani aa Bwami munyika yoonse. Mu 1931 bakapegwa zina lyakuti Bakamboni ba Jehova.​—Amubale Milimo 1:8; 2:1, 4; 5:42.

4. Ino Bakamboni ba Jehova beendelezyegwa buti?

Mumwaanda wamyaka wakusaanguna, mbungano zya Banakristo mumasena manji zyakali kugwasyigwa akabunga keendelezya kalo kakali kuzumina Jesu kuti ngo Mutwe wambungano. (Milimo 16:4, 5) Mbubwenya buyo amazuba aano, Bakamboni ba Jehova munyika yoonse baleendelezyegwa a Kabunga Keendelezya kabaalu basimide kumuuya. Kabunga Keendelezya nkekalanganya mitabi ya Bakamboni ba Jehova kwalo nkobasandulula, kusimba alimwi akumwaya mabbuku aagwasya kwiiya Bbaibbele mumyaambo iinda ku 600. Aboobo, Kabunga Keendelezya kalakonzya kukulwaizya alimwi akupa busolozi bwamu Magwalo kumbungano ziinda ku 100,000 nyika yoonse mboizulwa. Mumbungano iili yoonse, baalumi beelela balabeleka kabali baalu naa balangizi. Baalumi aaba balazilanganya caluyando mbelele zya Leza.​—Amubale 1 Petro 5:2, 3.

Bakamboni ba Jehova balikamantene mukukambauka makani mabotu alimwi akugwasya bantu kuba basikwiiya. Mbubwenya mbuli baapostolo, tulabakambaukila bantu kuŋanda aŋanda. (Milimo 20:20) Alimwi tulasololela ziiyo zya Bbaibbele kuli baabo balaaluyandisisyo lwakasimpe. Pele Bakamboni ba Jehova tabali buyo mbunga. Tuli mukwasyi uujisi Taata siluyando. Tuli bakwesu abacizyi babikkilana maano. (2 Batesalonika 1:3) Akaambo kakuti bantu ba Jehova bayanda kukkomanisya Leza alimwi akugwasya bantu, babamba mukwasyi wabantu bakkomene kapati anyika.​—Amubale Intembauzyo 33:12; Milimo 20:35.