Ino Bbaibbele Mulibona Buti?
Sena muyeeya kuti . . .
ndibbuku lyabusongo bwabantu?
ndibbuku lijisi twaano twakubeja?
ndi Jwi lya Leza?
NCOLYAAMBA BBAIBBELE
“Magwalo oonse akasololelwa a Leza.”—2 Timoteyo 3:16, Busanduluzi bwa Nyika Mpya.
MBOMUKONZYA KUGWASYIGWA
Mulakonzya kujana bwiinguzi bukkazyika moyo kumibuzyo iikatazya mubuumi.—Tusimpi 2:1-5.
Mulakonzya kujana busolozi bugwasya mubuumi bwabuzuba abuzuba.—Intembauzyo 119:105.
Mulakonzya kuba abulangizi bwini-bwini bwakumbele.—Baloma 15:4.
SENA NCOBENI TULAKONZYA KUSYOMA NCOLYAAMBA BBAIBBELE?
Inzya, akaambo katwaambo ootu totatwe:
Kweendelana kugambya. Bbaibbele lyakalembwa abantu baindene-indene babalilwa ku 40 mumyaka iinda ku 1,600. Bunji bwabo kunyina nobakabonana. Nokuba boobo, bbuku eeli lyoonse lileendelana, lijisi kaambo kapati komwe.
Makani aakaindi aasyomeka. Kanji-kanji bantu ibalemba makani aakaindi balasisa kuzundwa kwabantu babo. Mukwiimpana, basikulemba Bbaibbele cakusyomeka bakalemba kulezya kwabo beni alimwi akulezya kwabantu bamucisi cabo.—2 Makani 36:15, 16; Intembauzyo 51:1-4.
Businsimi busyomeka. Bbaibbele lyakasinsima kunyonyoonwa kwamunzi wa Babuloni wansiku myaka iibalilwa ku 200 lunyonyooko kalutanacitika. (Isaya 13:17-22) Tiilyakaamba buyo mbowakali kuyoozundwa munzi wa Babuloni, pele lyakaamba amuntu wakali kuyoouzunda!—Isaya 45:1-3.
Businsimi bumbi bunji bwamu Bbaibbele bwakazuzikizyigwa kabotu-kabotu kweelana ambobwakasinsimwa. Sena eeci tacili ncotweelede kulangila kuzwa ku Jwi lya Leza?—2 Petulo 1:21.
INO MUYEEYA BUTI?
Ino Jwi lya Leza inga lyabusumpula buti buumi bwanu?
Ibbaibbele lilawiingula mubuzyo ooyu mulugwalo lwa ISAYA 48:17, 18 alwa 2 TIMOTEYO 3:16, 17.