CIIYO 8
Josiya Wakajisi Balongwe Bali Kabotu
Sena uyeeya kuti ncuuba-uba kucita zintu zili kabotu?— Bantu banji mbobayeeya oobo. Bbaibbele lilatwaambila kuti cakali ciyumu kapati kuli Josiya kucita zintu zili kabotu. Pele wakajisi balongwe bali kabotu bakamugwasya. Atwiiye zinji kujatikizya Josiya alimwi abeenzinyina.
Bausyi Josiya bakali ba Amoni, mwami wa Juda. Amoni wakali mubyaabi alimwi wakali kukomba mituni. Josiya wakaba mwami wa Juda nobakafwa bausyi. Aciindi eeco wakajisi buyo myaka iili lusele yakuzyalwa! Sena uyeeya kuti wakali mubyaabi mbuli bausyi?— Peepe!
Zefaniya wakabacenjezya bantu kuti batakombi mituni
Nociba ciindi naakacili mwana, Josiya wakali kuyanda kumumvwida Jehova. Aboobo wakasala kumvwana buyo abantu bakali kumuyanda Jehova. Alimwi bakamugwasya Josiya kucita zintu zili kabotu. Ino mbaani bakali beenzinyina?
Umwi wakali Zefaniya. Zefaniya wakali musinsimi wakali kucenjezya bantu bamu Juda kuti bayoocitikilwa zintu zibyaabi ikuti kabakomba mituni. Josiya wakamumvwida Zefaniya alimwi wakali kukomba Jehova kutali mituni.
Aumwi iwakali mweenzinyina wa Josiya ngu Jeremiya. Bakali bamusela omwe alimwi bakalibambene kukkala ciindi nobakali kukomena. Bakali kumvwana kapati cakuti Josiya naakafwa, Jeremiya wakalemba lwiimbo lulibedelede kwaamba mbwaakali kumuyeeya Josiya. Jeremiya alimwi a Josiya bakagwasyanya kucita zintu zili kabotu alimwi akumvwida Jehova.
Josiya alimwi a Jeremiya bakagwasyanya kucita zintu zili kabotu
Ncinzi ncokonzya kwiiya kuli Josiya?— Nociba ciindi Josiya naakacili mwana, wakali kuyanda kucita zintu zili kabotu. Wakalizyi kuti wakeelede kumvwana abantu bamuyanda Jehova. Aboobo kosala balongwe bamuyanda Jehova alimwi ibakonzya kukugwasya kucita zintu zili kabotu!