Josiya Wakali Kuuyanda Kapati Mulawo wa Leza

Josiya wakaba mwami wa Juda kajisi myaka yakuzyalwa iili 8. Mumazuba aayo, bantu bakali kusyoma masalamuzi akukomba baleza bakubeja. Ciindi Josiya naakakkwanya myaka iili 16, wakasola kwiiya mbwakonzya kukomba Jehova munzila iili kabotu. Naakali amyaka iili 20, wakatalika kunyonyoona baleza bakubeja alimwi azipaililo mucisi coonse. Naakaba amyaka iili 26, wakabikka bubambe bwakuti tempele lya Jehova libambululwe.

Mutempele, mupaizi mupati Hilikiya wakajana bbuku lyakuvwunga lya Mulawo wa Jehova—ambweni ndebbuku ndyaakalemba Musa. Mulembi wamwami Safani wakalileta bbuku lyakuvwunga eelyo kuli Josiya akutalika kumubalila Mulawo cakupozya. Josiya naakali kuswiilila, wakazyiba kuti bantu tiibakali kumumvwida Jehova kwamyaka minji. Mwami Josiya wakaambila Hilikiya kuti: ‘Jehova ulinyemede kapati. Koya ukaambaule anguwe. Jehova ulatwaambila ncotweelede kucita.’ Jehova wakaingula kwiinda mumusinsimi mukaintu Hulida: ‘Bantu ba Juda bandizangila. Bayoosubulwa ciindi Josiya aakuleka kuba mwami, nkaambo walo ulalicesya.’

Ciindi Mwami Josiya naakaumvwa mulumbe, wakaunka kutempele akwiita ba Juda boonse. Mpoonya wakaubala Mulawo wa Jehova cakupozya kulimbabo. Josiya alimwi abantu boonse bakasyomezya kuti banoomumvwida Jehova camoyo woonse.

Kwakaindide myaka minji kuzwa ciindi ba Juda nobakasekelelede Pobwe Lyakwiindilila. Pele ciindi Josiya naakabala mu Mulawo kuti Pobwe Lyakwiindilila lyeelede kusekelelwa mwaka amwaka, wakaambila bantu kuti: ‘Tulacita Pobwe Lyakwiindilila kuli Jehova.’ Mpoonya Josiya wakalibambila kupa zituuzyo zinji alimwi wakabikka bubambe bwakuti kube baimbi kutempele. Kumane bantu bakacita Pobwe Lyakwiindilila, mpoonya lyakatobelwa a Pobwe lya Zinkwa Zitakwe Bumena lyalo ilyakatola mazuba aali 7. Kwakanyina Pobwe Lyakwiindilila lyakali mbuli leeli kuzwa mumazuba aa Samuele. Josiya wakali kuuyanda kapati Mulawo wa Leza. Sena ulakkomana kwiiya kujatikizya Jehova?