Jeremiya Tanaakaleka Kwaambila Bantu Kujatikizya Jehova

Zimwi ziindi bantu balatufwubaazya naa kutunyemena twabaambila makani aajatikizya Jehova. Eeci inga catupa kuyanda kucileka kwaambila bamwi kujatikizya Leza. Sena kuli nowakalimvwide boobo?— Bbaibbele lilatwaambila kujatikizya mwaalumi umwi wakali kumuyanda Jehova pele iwakali kuyanda kucileka kwaambila bamwi kujatikizya nguwe. Zina lyakwe wakali Jeremiya. Atwiiye zinji kujatikizya nguwe.

Ciindi Jeremiya naakali mukubusi, Jehova wakamwaambila kuti acenjezye bantu kuti bacileke kucita zintu zibi. Eeci cakamuyumina Jeremiya, alimwi wakayoowa. Wakaambila Jehova kuti: ‘Tandizyi cakubaambila. Ndili mwana muniini.’ Pele Jehova wakamwaambila kuti: ‘Utayoowi. Ndilakugwasya.’

Aboobo Jeremiya wakatalika kubacenjezya bantu kuti bayoosubulwa kuti tiibacinca. Sena uyeeya kuti bantu bakacita ncaakabaambila Jeremiya?— Peepe. Bakamufwubaazya alimwi akumunyemena. Mane bamwi bakali kuyanda kumujaya! Ino uyeeya kuti Jeremiya wakalimvwa buti?— Wakayoowa akwaamba kuti: ‘Tandikaambi limbi makani aajatikizya Jehova.’ Pele sena wakaleka ncobeni?— Peepe tanaakaleka. Wakali kumuyanda kapati Jehova cakuti tanaakaleka kwaamba kujatikizya nguwe. Akaambo kakuti Jeremiya tanaakaleka, Jehova wakamufwutula.

Mucikozyanyo, aciindi cimwi, baalumi babyaabi bakamufwusa Jeremiya mucilindi mwakali mankandya. Tanaakajisi cakulya naaba maanzi. Baalumi aabo bakali kuyanda kumusiya Jeremiya oomo kutegwa afwe. Pele Jehova wakamufwutula.

Ncinzi ncokonzya kwiiya kucikozyanyo ca Jeremiya?— Nokuba kuti zimwi ziindi wakali kuyoowa, tanaakaleka kwaamba makani aajatikizya Jehova. Ciindi nowaamba kujatikizya Jehova, bantu inga batalika kukufwubaazya naa kukunyemena. Ulakonzya kufwa nsoni naa kuyoowa. Pele toyelede kuleka kwaamba kujatikizya Jehova. Lyoonse unookugwasya mbuli mbwaakagwasya Jeremiya.