Amubayiisye Bana Banu

Jeremiya Tanaakacileka

SENA mulaakulimvwa kuti tamukonzyi kubeleka mulimo umwi?—a Banji mbobalimvwa oobo. Awalo Jeremiya mbwaakalimvwa oobo. Nokuba boobo, tanaakatyompwa akaambo kazyintu nzyobakali kwaamba naa kucita bamwi. Atubandike icakapa kuti Jeremiya kamvwana a Leza nokuba kuti zimwi ziindi wakali kuyanda kucileka kucita mulimo ngwaakamupede Leza.

Katanazyalwa Jeremiya, Jehova Leza mwini-mwini, wakamusala kuti akabe musinsimi unakucenjezya bantu ibakali kucita zyintu zibi. Sena mulicizyi Jeremiya ncaakamwaambila Jehova nikwakainda myaka?— ‘Mebo nsikonzyi kukambauka, nkaambo ndicili mwana.’

Ino uyeeya kuti Jehova wakamwiingula buti Jeremiya?— Wakamwiingula kuti: ‘Utaambi kuti, ndicili mwana. Nkaambo uleelede kwiinka kubantu boonse, kufwumbwa nkundakutuma, amakani oonse ngendakulailila uleelede kwaamba ngao. Utayoowi.’ Nkaambo nzi? Jehova wakaamba kuti, “Ndi ayebo, nzookuvuna.”—Jeremiya 1:4-8.

Nokuba boobo, kweelana ambokwaambwa kale, Jeremiya wakazyi kutyompwa akaambo kakuti bantu bakali kumufwubaazya akaambo kakubelekela Leza. Wakaamba kuti, ‘buzuba boonse bantu balandiseka, bantu boonse balandiweela.’ Aboobo, wakayeeya kuti acileke. Wakaamba kuti: “Nsikoyeeya limbi makani aakwe [Jehova], nsikooyooamba limbi muzina lyakwe.” Sena wakacileka ncobeni?

Jeremiya wakaamba kuti, “ndajana kuti mumoyo wangu muli anga mulilo uuyakisya uujalilidwe mukati kazifuwa zyangu.” (Jeremiya 20:7-9) Nokuba kuti Jeremiya ziindi zimwi wakali kuyoowa, luyando ndwaakajisi kuli Jehova lwakali kumupa kuti atacileki. Atubone Jeremiya mbwaakagwasyigwa akaambo kakuti tanaakacileka.

Jehova wakamwaambila Jeremiya kuti abacenjezye bantu kuti Jerusalemu uyakunyonyoonwa ikuti bataleki kucita zyintu zibi. Jeremiya naakabaambila, bantu bakanyema akwaamba kuti: “Oyu muntu uleelede kufwa.” Nokuba boobo, Jeremiya wakabakombelezya kuti ‘baswiilile ijwi lya Jehova.’ Amane wakaamba kuti: ‘Naa mwandijaya, muyooliletela mulandu wakutila bulowa bwamuntu uutakwe kaambo, nkaambo Jehova nguwakandituma kuli ndinywe kuti nkakambauke majwi aaya oonse.’ Sena ulizyi cakazyi kucitika?—

Ibbaibbele lyaamba kuti: “Mpoonya awo basilutwe abantu boonse bakaambila bapaizi abasinsimi kuti, Muntu oyu teelede kufwa pe, nkaambo watwaambila muzina lya-Jehova Leza wesu.” Aboobo, Jehova wakamukwabilila Jeremiya akaambo kakuti wakazumanana kubeleka mulimo ngwaakamupa kakunyina kuyoowa. Lino atubone cakamucitikila musinsimi umwi wa Jehova wiitwa kuti Uriya.

Ibbaibbele lyaamba kuti, ‘Uriya wakasinsima kujatikizya Jerusalemu alimwi majwi ngaakali kubelesya akali mbuli a Jeremiya.’ Pele Mwami Jehoyakimu naakamunyemena Uriya, sena mulizyi Uriya ncaakacita?— Wakayoowa alimwi wakacileka kucita mulimo wa Leza akuccijila ku Egepita. Aboobo, mwami wakatuma bantu kuti bakamuyandaule. Nibakamuleta, sena ulizyi ncaakacita mwami mubi ooyu?— Wakamujaya Uriya apanga!—Jeremiya 26:8-24.

Ino nkaambo nzi ncokonzya kwaamba kuti Jehova wakamukwabilila Jeremiya ikutali Uriya?— Nokuba kuti Jeremiya wakali yoowede mbubwenya mbuli Uriya, pesi tanaakacileka kumubelekela Jehova alimwi tanaakaccija. Ino ncinzi ncotukonzya kwiiya kucikozyanyo ca Jeremiya?— Ncotwiiya ncakuti, zimwi ziindi cilakonzya kutukatazya kucita ncayanda Leza, pesi lyoonse tweelede kumusyoma akumumvwida.

Bupanduluzi buyungizidwe

Mibuzyo:

○ Ino mulimo nzi Jehova ngwaakamupa Jeremiya?

○ Ino ncinzi cakapa kuti Jeremiya ayeeye kuuleka mulimo ngwaakapegwa?

○ Ino ncinzi cakapa kuti Jeremiya akwabililwe, ikutali Uriya?

○ Ino ncinzi ncowayiiya kucikozyanyo ca Jeremiya?